Ассотсиатсияи журналистони риштаи варзиши Тоҷикистон (АЖРВТ) даҳ варзишгари беҳтарини Тоҷикистонро дар соли 2022 эълон кард. Ҷойи аввали бидуни чаро шореҳони варзиш ба паҳлавони хушном Темур Раҳимов доданд, ки боз як соли пурбаррорро паси сар гузошт.
Ба иттилои раиси АЖРВТ Нарзулло Латифов, бар асоси натиҷагирии назархоҳии хабарнигорони варзишӣ ба даҳгонаи беҳтаринҳои сол намояндагони се намуди олимпӣ – бокс, варзиши сабук ва гуштини дзюдо, инчунин бокси касбӣ дохил шуданд. Дар умум, аз 10 варзишгар дар даҳгона 5 нафараш аз гуштини дзюдо, 4 нафараш аз бокс ва як нафараш аз варзиши сабук намояндагӣ мекунанд. Ба назари шореҳони варзиш, намояндагони риштаҳои дигари варзиш, мутаассифона, дар соли 2022 дастовардҳои чашмрасе надоштаанд.
“Дастовардҳои бузурги варзишии сол ба паҳлавони маъруфи 25-солаи тоҷик Темур Раҳимов марбут аст. Ӯ дар таърихи гуштини дзюдои тоҷик нахустин барандаи медали тиллои Grand Slam ва медали нуқраи World Judo Masters мебошад. Темур Раҳимов беҳтарин варзишгари сол эътироф гардид”, – гуфт Нарзулло Латифов
Рӯйхати даҳгонаи беҳтарин варзишгарони сол:
Темур РАҲИМОВ (гуштини дзюдо) – барандаи медали нуқраи чемпионати Осиё дар вазни +100 кг дар шаҳри Остона (Қазоқистон), медали тиллои Baku Grand Slam 2022 дар шаҳри Боку (Озарбойҷон), медали нуқраи Jerusalem Masters 2022 дар шаҳри Йерусалим (Исроил), медалҳои биринҷии Grand Slam 2022 дар шаҳрҳои Абузаби (Амороти Муттаҳидаи Араб), Телавив (Исроил) ва Анталия (Туркия), медали нуқраи чемпионати Аврупо дар шаҳри Гори (Гурҷистон) дар ҳайати дастаи “Red Star”-и Сербия.
Шодмон РИЗОЕВ (гуштини дзюдо) – барандаи медали нуқраи чемпионати Осиё дар вазни то 81 кг дар шаҳри Остона (Қазоқистон), медали биринҷии Бозиҳои V ҳамбастагии исломӣ дар шаҳри Қуния (Туркия).
Баҳодур УСМОНОВ (бокс) – барандаи медали биринҷии чемпионати Осиё дар вазни то 63,5 кг дар шаҳри Уммон (Урдун), медали тиллои мусобиқаи байналмилалии «Gee Bee Boxing Tournament-2022» дар шаҳри Ҳелсинки (Финляндия).
Муҳаммад АБРОРИДДИНОВ (бокс) – барандаи медали биринҷии чемпионати Осиё дар вазни +92 кг дар шаҳри Уммон (Урдун), медали нуқраи мусобиқаи байналмилалӣ дар шаҳри Алмаато (Қазоқистон).
Сомон МАҲМАДБЕКОВ (гуштини дзюдо) – барандаи медали биринҷии чемпионати Осиё дар вазни то 81 кг дар шаҳри Остона (Қазоқистон).
Комроншоҳ УСТОПИРИЁН (гуштини дзюдо) – барандаи медали нуқраи Бозиҳои V ҳамбастагии исломӣ дар вазни то 90 кг дар шаҳри Қуния (Туркия) ва медали нуқраи Гран-при дар шаҳри Алмада (Португалия).
Эмомалӣ НУРАЛӢ (гуштини дзюдо) – барандаи медали тиллои чемпионати ҷаҳон миёни ҷавонон дар вазни то 66 кг дар шаҳри Гуаякил (Эквадор).
Миҷгона САМАДОВА (бокс) – барандаи медали тиллои Ҷоми ҷаҳонӣ дар вазни то 57 кг дар шаҳри Белоярск (Русия).
Илдар АҲМАДИЕВ (варзиши сабук) – барандаи медали нуқраи Бозиҳои V ҳамбастагии исломӣ дар ҷаҳиш ба дарозӣ дар шаҳри Қуния (Туркия), медали тилло дар ҷаҳиш ба дарозӣ ва медали нуқра дар давидан ба масофаи 200 метр дар чемпионати Осиёи Марказӣ дар шаҳри Самарқанд (Узбекистон), медали биринҷии мусобиқаи байналмилалӣ дар давидан ба масофаи 60 метр дар шаҳри Остона (Қазоқистон).
Шавкатҷон РАҲИМОВ (бокси касбӣ) – қаҳрамони ҷаҳон дар вазни дуюми нимсабук дар шаҳри Абузабӣ (Амороти Муттаҳидаи Араб), ҷойи аввал дар радабандии IBF (Федератсияи байналмилалии бокс).
«Вале, мутаассифона, варзишгарони тоҷик дар соли 2022 натавонистанд дар чемпионатҳои ҷаҳон оид ба намудҳои олимпӣ медал ба даст биёранд. Инчунин имсол ягон намояндаи Тоҷикистон дар намудҳои олимпии варзиш ба гирифтани медали тиллои чемпионати Осиё мушарраф нашуд», – иброз дошт Нарзулло Латифов.