Дар фурудгоҳи шаҳри Сургути Русия кормандони боҷхона (гумрук) ду нафарро ҳангоми кӯшиши интиқоли маблағҳои бузурги пули нақд дастгир кардаанд. Хадамоти матбуоти боҷхонаи Тюмен хабар дод, ки аз ҷумла як шаҳрванди Тоҷикистон, ки бо хатсайри Сургут — Тошканд парвоз мекард, мехост бо худ дар бағочаш 1,6 миллион рубл бубарад. Ин мусофирро ҳангоми аз “роҳрави сабз” гузаштанаш манъ кардаанд.
Аз Русия ва Иттиҳоди иқтисодии АвроОсиё бидуни эъломияи гумрукӣ баровардани маблағи беш аз 10 ҳазор доллар мумкин нест. Ба ин далел, маблағи баробари 10 ҳазор долларро бо қурби расмӣ ҳисоб карда, ба ин шаҳрванди Тоҷикистон баргардондаанд ва пулҳои боқимондаи ӯро, ки наздики як миллион рубл, дақиқтараш, 999 ҳазору 626 рублро ташкил медод, то замони баррасии қазияаш дар додгоҳ мусодира карда шудааст.
Ба зидди ҳарду парвандаҳои маъмурӣ кушодаанд.
Моддаи 16,4 барои бидуни эъломия аз марзи Иттиҳоди иқтисодии АвроОсиё (ЕАЭС) берун бурдани маблағи аз меъёр бештар ҳамчун ҷазо ҷарима ба андозаи аз 50% то ду баробари маблағи ёфтшуда ваё мусодираи ин маблағи ёфтшударо пешбинӣ мекунад.
Ин нахустин мавриди дар боҷхонаи Сургут бо маблағҳои бузург ба даст афтодани муҳоҷирони тоҷик нест. Дар аввали моҳи апрел дар инҷо аз бағочи дастии як мусофире, ки ба шаҳри Хуҷанди Тоҷикистон парвоз мекард, 1 миллиону 585 ҳазор рубл пули нақд пайдо карда буданд.
Хадамоти матбуотии гумруки вилояти Тюмен рӯзи 6 апрел хабар дода буд, ки ин мусофир дар хатсайри Сургут –Хуҷанд сабти ном карда, тавассути “роҳрави сабз” ба самти толори парвоз раҳсипор буд, ки ӯро кормандони гумрук манъ карданд.
Игор Галузин, сардори посгоҳи гумрукии Сургут гуфт: “Дар ҷараёни пурсиши даҳонӣ маълум шуд, ки ӯ бо худ ба Ҷумҳурии Тоҷикистон маблағи беш аз 10 ҳазор доллари Амрикоро бурда истодааст. Ҳангоми боздошт, тибқи қурби Бонки Русия, 745 ҳазор рубл аз пулҳои бо худ доштаи ин муосфир аз меъёри барои бурдани пул иҷозатдодашуда бештар буд”.
Дар пайи анҷоми назорати гумрукӣ, 840 ҳазор рубл, яъне маблағи баробари 10 ҳазор доллари Амрикоро ба ин мусофир баргардондаанд, вале 745 ҳазор пули аз меъёр зиёдатиашро мусодира кардаанд. Дар робита ба ин ҳолат бар асоси моддаи 16,4 Кодекси ҳуқуқвайронкуниҳои маъмурии Русия парвандаи маъмурӣ кушодаанд. Ин парванда алакай ба додгоҳ супурда шуда буд.
Ҳукумати Русия дар пайи эъмоли таҳримҳои сангини байнмалмилалӣ баъди ҳамлаи нирӯҳояш ба Украина интиқоли пул ба хориҷи ин кишварро таҳти назорати шадид гирифта, хеле маҳдуд кардааст. Ҳоло ба берун аз Русия баровардани маблағи беш аз 10 ҳазор долларро манъ кардаанд.
Ба ин далел, аз муҳоҷирони тоҷик даъват мекунем, ки ҳангоми аз Русия баровардани пулҳои коркардаашон хеле эҳтиёт кунад, то пулҳои бо азоб бадастовардаашон мусодира нашавад.