Саршумори чорвои калон дар Тоҷикистон ба 2,3 миллион ва саршумори чорвои хурд ба 5,8 миллион расидааст. Пас чаро нархи гӯшт боло меравад?
Хабаргузории давлатии “Ховар” бо истинод ба Агентии омори Тоҷикистон хабар дод, ки то 1 октябри соли ҷорӣ саршумори чорвои калони шохдор назар ба аввали сол 20 ҳазору 400 сар ё 0,9 фоиз афзуда, ба 2 миллиону 368 ҳазору 500 сар расидааст. Аммо дар ҳамин давра саршумори гӯсфанду буз баракс 89,1 ҳазор сар ё 1,5 фоиз коҳиш ёфта, 5 миллиону 854 ҳазор сарро ташкил додааст. Тавлиди гӯшт дар кишвар, бино ба ин манбаъ, дар 9 моҳи аввали соли ҷорӣ 3,3 фоиз афзудааст. Ин дар ҳолест, ки сокинон аз боло рафтани нархи гӯшт ва дигар маҳсулоти хӯрока дар бозорҳои Тоҷикистон шикоят мекунанд.
Саршумори чорвои калон дар Тоҷикистон рӯ ба афзоиш аст
ДУШАНБЕ, 29.11.2020 /АМИТ «Ховар»/. Аз моҳи январ то 1 октябри соли равон дар ҳамаи категорияҳои хоҷагиҳо саршумори чорвои калони шохдор 2368,5 ҳазор сарро ташкил додааст. Саршумори чорвои калони шохдор нисбат ба ҳамин давраи соли гузашта 20,4 ҳазор сар ё 0,9 фоиз зиёд гардидааст. Дар ин бора АМИТ «Ховар» бо истинод ба Агентии омори назди Президенти Ҷумҳурии Тоҷикистон хабар медиҳад.
Дар ҳамин давра саршумори гӯсфанду буз 5854,3 ҳазор сарро ташкил дода, 89,1 ҳазор сар ё 1,5 фоиз афзоиш ёфтааст. Аз саршумори умумӣ 92,9 фоизи чорвои калони шохдор ва 81,0 фоизи саршумори гӯсфанду буз ба хоҷагиҳои аҳолӣ рост меояд.
Саршумори чорвои калони шохдор дар хоҷагиҳои ВМКБ 1,5 фоиз, вилояти Суғду Хатлон 0,9 фоизӣ ва дар навоҳии тобеи ҷумҳурӣ 0,7 фоиз зиёд гардидааст.
Мавриди зикр аст, ки аз моҳи январ то сентябри соли равон истеҳсоли гӯшти гов нисбат ба ҳамин давраи соли гузашта 103,3 фоиз афзудааст.
Ёдовар мешавем, ки аз 27 ноябр дар мамлакат Фестивал – намоиши чорвои зотӣ ҷараён дорад, ки он се рӯз идома меёбад. Ҳадафи чорабинӣ хушзоткунии чорвои калону майда, зиёд намудани нуқтаҳои бордоркунии сунъӣ дар ҷумҳурӣ, меъёрҳои ғизодиҳии чорво ва ҳифзи чорвои маҳаллӣ мебошад.
Дар Фестивал-намоиши мазкур аз тарафи хоҷагиҳои чорводорӣ ва шахсони алоҳида 320 сар чорвои калон, 1060 сар чорвои майда, 50 сар асп, аз қабили чорвои калони зотҳои сиёҳало, шветсузебумонанд, сименталӣ, сарсафед, моли майдаи зотҳои тоҷикӣ, ҳисорӣ, қароқулӣ маҳинпашм ва бузи тоҷикии серпашм ба намоиш гузошта мешаванд.