ҲАЛОКАТИ ПИЁДАГАРДИ ШАХСИЯТАШ НОМАЪЛУМ ДАР РӮБАРӮИ БИНОИ “ШАРҚИ ОЗОД” (ГЖК)
Маркази матбуоти ВКД Тоҷикистон хабар дод, ки шаби 23-юми апрели соли 2023, тахминан соати 20:30, ронандаи мошини тамғаи “Лексус-АС 250”, Қувватов Анушервон Зарифшохоҷаевич, соли таваллудаш 2002, сокини шаҳри Душанбе, ҳангоми ҳаракат аз самти кӯчаи Айнӣ ба самти кӯчаи Н.Қарабоев, дар рӯ ба рӯи бинои чопхонаи “Шарқи Озод” (ГЖК), аз уҳдаи идораи воситаи нақлиёт набаромада, пиёдагарди марди шахсияташ номаълум, синнаш тахминан 50-55 соларо пахш намудааст. Дар натиҷа, пиёдагард ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст.
Тафсилоти дигари ҳодиса феълан нашр нашудааст. ВКД гуфт, аз рӯи ҳодисаи мазкур таҳқиқот идома дорад.
Бинои чопхонаи “Шарқи Озод” (ГЖК) дар хиёбони Саъдии Шерозӣ дар байни пули корхонаи нассоҷӣ (Текстилкомбинат) ва Сирки Тоҷик ҷойгир шудааст.
Маркази матбуоти ВКД Тоҷикистон қаблан бархе тафсилоти садамаи шаби 22 апрел дар маркази Душанберо, ки дар он ду нафар, аз ҷумла Парвиз Шарифзода, устоди сисолаи Академияи хидмати давлатӣ ва писари додраси Додгоҳи Қонуни асосӣ Асрор Шарифзода ба ҳалокат расиданд, нашр кард. Парвиз Шарифзода ва хешованди ҳалокшудааш Илҳом Баротовро рӯзи 23 апрел дар зодгоҳашон, ноҳияи Варзоб ба хок супурданд.
Бино ба иттилои ВКД, шаби 22-юми апрели соли 2023, тахминан соати 21:15, ронандаи мошини тамғаи «Тойота Кемри», Тӯраев Абӯбакр Ҳасанович, соли таваллудаш 2003, сокини шаҳри Душанбе, ҳангоми ҳаракат бо роҳи мошингарди кӯчаи Сомонии шаҳри Душанбе аз самти хиёбони Рӯдакӣ ба самти кӯчаи Сино, дар рӯ ба рӯи варзишгоҳи марказӣ, ба самти муқобили ҳаракат баромада, бо мошини тамғаи «Опел-Вектра», таҳти идораи ронанда Шарифзода Парвизи Асрор, соли таваллудаш 1993, сокини шаҳри мазкур, ки бо роҳи худ ҳаракат мекард, бархӯрдааст.
Дар натиҷа, ронандаи автомашинаи тамғаи «Опел- Вектра» Шарифзода П. ва мусофири он Баротов Илҳом, соли таваллудаш 1991, сокини ноҳияи Варзоб, ҷароҳатҳои вазнини ҷисмонӣ бардошта, дар ҷойи ҳодиса ба ҳалокат мерасанд.
Мусофирони дигари “Опел” ноболиғон: Баротова Фотима Илҳомовна, соли таваллудаш 2017 ва Баротов Азиз Равшанович, соли таваллудаш 2010, ҷароҳатҳои гуногуни ҷисмонӣ бардошта, дар беморхона бистарӣ гардидаанд.
Инчунин ронандаи «Тойота Кемри» Тӯраев А. ва мусофираш Узоқова Амина Баҳромовна, соли таваллудаш 2004, сокини пойтахт, ҷароҳатҳои ҷисмонӣ бардошта, дар беморхона бистарӣ гардидаанд. Бино ба иттилои радиои Озодӣ, Абӯбакр Тӯраев писари як соҳибкор будааст.
Роҳҳои Тоҷикистон аз лиҳози садамаҳо пурхатар ба шумор мераванд. Соли 2022 бар асари 1096 садама дар роҳҳои ҷумҳурӣ 416 нафар ба ҳалокат расида, 1197 тани дигар маҷруҳ шуданд. Соли 2021 бошад дар роҳҳои Тоҷикистон дар натиҷаи 1102 садама 395 нафар ҷон бохта, 1217 тани дигар ҷароҳат бардоштанд.