ГЕНЕРАЛ ШОҲ ИСКАНДАРОВ: РАИСИ НОҲИЯИ РАШТ ЯК ҲАРОМХӮР БУД
Генерал Муҳаммадшоҳ Искандарзода, маъруф ба генерал Шоҳ Искандаров, рӯзи 24 январи соли 2023 дар Фейсбук дар як вокуниш ба хабари боздошти раиси ноҳияи Ғарм Раҳимҷон Муқимӣ бо иттиҳоми гирифтани пора дар чунин амалҳои бад даст доштани Муқимиро тасдиқ карда ва ӯро “як ҳаромхӯр” номида, афзудааст, ки мардум аз порагирии раиси ноҳия ба дод омадаанд.
“Қасам ба Худо, рост аст. Як ҳаромхӯр аст раиси нохияи Рашт. Ман, генерал Шоҳ Искандаров, зодаи ҳамон минтақа хастам. Мардум аз порагирии раиси ноҳия ба дод омадагиянд. Роҳбари дастгоҳи раиси ноҳия бе иҷозати раис нафас намекашад. Бисёр тарафдорӣ накунед, вақт нишон медиҳад”, навиштааст Шоҳ Искандаров.
Генерал дар идома байти машҳурро иқтибос кардааст ки:
Қамчини Худо садо надорад,
Вақте ки занад, даво надорад.
Даҳҳо нафар зери ин изҳори назари генерал Шоҳ Искандаров тугмаи лайкро зер кардаанд ва яке хитоб ба ӯ навиштааст: “Чунин порахӯрҳо бояд дар маҳбас бошанд, рафиқ генерал”.
Шоҳ Искандаров дар посух ба ин корбар навиштааст: “Ҳатман дар назди қонун ҷавоб медиҳанд. Фақат Худованд ба онҳо муҳлат додааст. Лекин на ба манфиати онҳост. Ҳар касе амали бад кунад, ҳатман ҷазои бад мегирад. Бе шакку шубҳа!”
Генерал-майор Муҳаммадшоҳ Искандаров, маъруф ба Шоҳ Искандаров, аз ангуштшумор фармондеҳони собиқи мухолифин аст, ки баъди пайвастан ба сохторҳои ҳукуматӣ тавонист нуфуз ва ҷойгоҳи худро ҳифз кунад. Шоҳ Искандаров чандин сол фармондеҳии қисми низомии марзбонӣ дар ноҳияи Ҷиргатол (ҳоло Лахш) дар марз бо Қирғизистонро бар уҳда дошт ва сипас, баъди кумакаш ба мақомот дар саркӯби гуруҳҳои саркаши Мулло Абдулло Раҳимов ва Аловиддин Давлатов, маъруф ба Алии Бедакӣ дар солҳои 2010 ва 2011 ба кори милитсия гузашт ва ибтидо раҳбарии шуъбаи милитсияи шаҳри Турсунзода дар марз бо Ӯзбекистон ва сипас то соли 2020 раҳбарии шуъбаи якуми милитсияи шаҳри Исфараро дар марзи ноором бо Қирғизистон бар дӯш дошт. Аз соли 2020 Шоҳ Искандарзода сардори милитсияи шаҳри Бӯстон (собиқ Чкаловск) мебошад.
Хабари боздошти раиси ноҳияи Рашт ва раҳбари дастгоҳи ӯро рӯзи 23 январ аз байни расонаҳо аввалин шуда пойгоҳи хабарии “Бомдод” нашр кард.
Бино ба иттилои дарёфтии пойгоҳи хабарии “Бомдод”, кормандони Агентии мубориза бо коррупсияи Тоҷикистон субҳи душанбе, 23 январи соли 2023 раиси ҳукумати ноҳияи Рашт дар шарқи ҷумҳурӣ Муқимӣ Раҳимҷони Набизода ва раиси дастгоҳи ӯ Ортиқов Холмаҳмадро бо иттиҳоми гирифтани пора дастгир карданд.
Мақомоти расмӣ, аз ҷумла мақомоти Агентии мубориза бо коррупсия то кунун расман ин хабарро тасдиқ ё рад накардаанд, вале ду манбаи гуногуни наздик ба Агентӣ ва ба ҳукумати ноҳияи Рашт дар давоми рӯзи 23 январ ба пойгоҳи хабарии “Бомдод” тасдиқ карданд, ки дар ҳақиқат ду мансабдори баландпояи ноҳияи Рашт: раиси ин ноҳия ва раҳбари дастгоҳаш ҳангоми гирифтани пора ба даст афтодаанд.
Ба гуфтаи ду манбаи дигар, Раҳимҷон Муқимӣ ва раҳбари дастгоҳаш тақрибан як моҳ боз бо иттиҳоми ғайриқонунӣ фурӯхтани заминҳо таҳти коркарди фаврӣ аз ҷониби кормандони Агентӣ қарор доштанд ва як рӯз қабл, яъне 22 январи соли 2023 роҳбарони Агентӣ шахсан аз президент Эмомалӣ Раҳмон барои гузарондани амалиёти боздошти раиси ноҳияи Рашт “ок” гирифтаанд.
Саъдулло Худоёров, блогери зодаи Рашт низ дар Фейсбук хабари боздошти раиси ин ноҳияро ҳамроҳи раҳбари дастгоҳаш тасдиқ карда, навишт, ки Муқимӣ ва Ортиқов ба гирифтани 10 ҳазор доллар ба сифати пора айбдор мешаванд.
Муқимӣ Раҳимҷон Набизода 26 июни соли 1962 дар ноҳияи Ғарм (ҳоло Рашт) таваллуд шуда, соли 1984 Донишгоҳи давлатии Тоҷикистонро бо ихтисоси баплангирии хоҷагии халқ хатм кардааст. Муқимӣ солҳои 1984-1986 иқтисодчии Раёсати хоҷагии қишлоқи Кумитаи иҷроияи ҳокимияти давлатии ноҳияи Ғарм, солҳои 1986-1990 мутахассиси пешбар оид ба назорат ва тафтишоти иттиҳодияи агросаноатии ноҳияи Ғарм, солҳои 1990-1992 нозири Кумитаи назорати халқии ноҳияи Ғарм, солҳои 1992-1994 корманди Нозироти андози ноҳияи Ғарм, солҳои 1994-2005 директори совхози “Тагоба”-и ноҳияи Рашт, солҳои 2005-2012 сардори Раёсати молияи ноҳияи Рашт, аз 07.02.2012 то 28.06.2012 муовини раиси ноҳияи Рашт ва солҳои 2012-2019 муовини якуми раиси ноҳияи Рашт кор кардааст.
Раҳимҷон Муқимӣ 26 феврали соли 2019 ба ҷои Қаноатшо Лоиқзода раиси ноҳияи Рашт таъйин шуд ва дар аввали кораш фармонҳои Лоиқзода дар хусуси хусусӣ кардани садҳо гектар заминҳои чарогоҳро бекор кард.
Афроди огоҳ мегӯянд, аҷаб нест, агар парвандаи зидди Муқимӣ интиқоми клани ҳамчунон пурнуфузи Лоиқзодаҳо бошад.
Муқимӣ соли 2000-ум бо мукофоти давлатии ордени “Дустӣ” сарфароз гардонида шудааст. Оиладор соҳиби 5 фарзанд мебошад.