ВидеоИқтисодРӯйдодҳои Бадахшон

ДАР ХОРУҒ НАХУСТИН БИНОИ 14-ҚАБАТА СОХТА МЕШАВАД

Бунёди бинои 14-ошёнаи истиқоматӣ дар чорроҳаи хиёбони марказии шаҳри Хоруғи Вилояти Мухтори Кӯҳистони Бадахшон дар ҳоли анҷомёбист. Коргарон ба бетонпӯшкунии охирин ошёнаи ин бино оғоз намуда, то охири сол онро ба анҷом мерасонанд. Дар ошёнаи аввали бино марказҳои савдову хизматрасонӣ ҷойгир мешаванд. Ин нахустин бинои 14-ошёна дар шаҳри Хоруғ аст, иттилоъ додааст мухбири минтақавии АМИТ «Ховар» Файз МИРАСАН.

Таҳкурсии ин бинои истиқоматӣ дар чорроҳаи хиёбони марказӣ соли гузашта ниҳода шуд ва дар зарфи як сол 90 фоизи корҳо ба анҷом расиданд. Бинокорони Ҷамъияти масъулияташ маҳдуди «Помирсоз», ки теъдодашон зиёда аз 50 нафар ва ҷавонон маҳаллӣ мебошанд, талош доранд, ки то тобистони соли оянда ин биноро мавриди баҳрабардорӣ қарор диҳанд.

Қаблан се бинои нуҳошёна дар маҳаллаи Носири Хисрав бунёд гардида буданд. Бинои мазкур на танҳо аз ҷиҳати баландӣ, балки аз намои зоҳирию дохилӣ низ нисбат ба биноҳои дигари истиқоматӣ фарқ дорад. Долону ҳуҷраҳои васеъ бо меъмориҳои хос сохта шуда, тирезаҳои калону рӯ ба офтоб хонаро на танҳо равшан, балки гарм низ нигоҳ медоранд. Илова бар ин бинокорон дар бунёди бино аз хиштҳои гарму маҳкам истифода бурдаанд, ки ҳарорати ҳавои хонаҳоро дар чаҳор фасли сол муътадил нигоҳ медорад. Дар шароити иқлими сарди вилоят, ки баъзан 7 моҳ идома меёбад, барои ҳар сокини ин минтақа гармии хона хеле муҳим мебошад.

Ба гуфти роҳбари Ҷамъияти масъулияташ маҳдуди «Помирсоз» Умедҷон Шарипов, «ин бино аз 140 хонаи як, ду ва сеҳуҷрадор иборат буда, ҳамаи хонаҳо бо меъёрҳои мутобиқ ба замони муосир сохта ва ороиш дода мешаванд. Корҳои асосии сохтмонӣ ба анҷом расонида шуданд. Ҳафтаи оянда коргарон ба андовакунии хонаҳо шурӯъ карда, онро дар фурсати кӯтоҳ ба анҷом мерасонанд».

Роҳбари ин ширкати сохтмонӣ гуфт, ки ҳарчанд ҳамаи намудҳои масолеҳи сохтмонӣ аз шаҳри Душанбе интиқол ёфтаанд, вале манзилҳои истиқоматӣ бо нархҳои арзон ба муштариён пешкаш мегарданд. Ногуфта намонад, ки то имрӯз аксари хонаҳои ин бинои баландошёна соҳибони худро пайдо кардаанд.

Ҳоло дар шаҳри Хоруғ сохтмони се бинои истиқоматии 4, 9, 12 ва 14-ошёна идома дошта, ҳар чаҳор бино соли оянда ба истифода дода мешаванд. Баъди ба истифода додани ин биноҳо қариб 500 хонаводаи маркази вилоят бо манзили истиқоматӣ таъмин мегарданд.

АКС: Мақомоти иҷроии ҳокимияти давлатии шаҳри Хоруғ

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд!

Back to top button