ҲАЛОКАТИ ЯК ЗАН ВА МАҶРУҲ ШУДАНИ ЯК НАВРАС ДАР САДАМАЕ ДАР РОҲИ РОҒУН
Маркази матбуоти ВКД Тоҷикистон хабар дод, ки рӯзи 3-юми июни соли 2022, тахминан соати 15:10, ронандаи автомашинаи тамғаи “Митсубиси”, Абасаев Абдулазиз, соли таваллудаш 1957, сокини шаҳри Роғун, ҳангоми ҳаракат дар роҳи автомобилгарди “Ваҳдат-Рашт-Лахш” аз уҳдаи идораи воситаи нақлиёт набаромада, ба девори канори роҳ бархӯрдааст.
Дар натиҷа мусофири автомашинаи мазкур Нуриддинова Навдагул Одинаевна, соли таваллудаш 1988, сокини шаӽри Роғун ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст ва ноболиғ, Абдуллозода Далери Даврон, соли таваллудаш 2006, ҷароҳати ҷисмонӣ бардошта, дар беморхона бистарӣ гардидааст.
Оид ба ин ҳодиса таҳқиқот идома дорад.
Аз аввали моҳи июн ин алакай дастикам панҷумин садамаи марговар дар роҳҳои Тоҷикистон аст.
Маркази матбуоти ВКД Тоҷикистон қаблан хабар дод, ки рӯзи 1 июн дар ду садама дар Норак ва Ҳисор ду ронанда ба ҳалокат расида, рӯзи 2 июн як наврас дар Душанбе зери чархи “Мерседес” ҷон бохт. Ҳамчунин рӯзи 1 июн бар асари бархӯрди се мошин дар роҳи Душанбе Бохтар дастикам як нафар: Фирӯзҷон, санаи таваллудаш 30 апрели соли 1997 ҷароҳатҳои вазнин бардошта, субҳи 2 июн дар бемористони шаҳри Бохтар ҷон додааст.
Бино ба иттилои ВКД, 2-юми июни соли 2022, тахминан соати 17:20, ронандаи автомашинаи тамғаи «Мерседес Бенс», Раҷабзода Сино Неъматҷон, соли таваллудаш 2003, сокини шаҳри Ҳисор, ҳангоми ҳаракат дар кӯчаи И.Сомонӣ ба самти кӯчаи Варзишгарони пойтахт, аз ӯҳдаи идораи воситаи нақлиёташ набаромада, пиёдагарди ноболиғ, Мусоҷонов Шоҳрух Акбаралиевич, соли таваллудаш 2007, сокини шаҳри Душанберо пахш намудааст.
Дар натиҷа ноболиғ, Мусоҷонов Ш.А. ҷароҳати вазнини ҷисмонӣ бардошта, дар роҳ ба бемористон ба ҳалокат расидааст.
Ҳамчунин рӯзи 1-уми июни соли 2022, тахминан соати 11:20, ронандаи автомашинаи тамғаи “Хундаи-Портер”, Назаров Ҷанҷол Мирович, соли таваллудаш 1961, сокини шаҳри Норак, ҳангоми ҳаракат аз самти деҳаи Ҷал-ҷал ба самти шаҳри Норак, ногаҳон фишораш баланд шуда, аз ӯҳдаи идораи воситаи нақлиёташ набаромада, автомашинаашро чаппа намудааст.
Дар натиҷа худи ронанда, Назаров Ҷ.М. ҷароҳати ҷисмонӣ бардошта, дар беморхона ба халокат расидааст.
Ҳамин тариқ, нимаи дуюми 1-июни соли 2022, тахминан соати 16:30, ронандаи автомашинаи тамғаи «Мерседес-Бенс», Салимов Тоҷиддин Акбархонович, соли таваллудаш 1996, сокини шаҳри Ҳисор, ҳангоми ҳаракат дар шоҳроҳи “Душанбе-Айнӣ-Ҳисор” аз уҳдаи идораи воситаи нақлиёташ набаромада, ба дарахтҳои арчаҳои канори роҳ бархӯрда, автомашинаро чаппа намудааст.
Дар натиҷа ронанда Салимов Т.А. ҷароҳати ҷисмонӣ бардошта, дар ҷойи ҳодиса ба ҳалокат расидааст.
Роҳҳои Тоҷикистон аз лиҳози шумори садамаҳо пурхатар шумурда мешаванд. Бино ба омори расмӣ, соли 2021 бар асари 1102 садамаи нақлиётӣ дар роҳҳои ин кишвар 395 нафар ба ҳалокат расида, 1 218 нафар ҷароҳати ҷисмонӣ бардоштаанд. Суръати баланди ҳаракат ва риоя накардани қоидаҳои ҳаракат дар роҳ, ҳамчунин роҳҳову мошинҳои фарсуда ва беэҳтиётии ронандагон ҳангоми истифода телефонҳои мобил аз иллатҳои умдаи садамаҳо, аз ҷумла садамаҳои марговар дар роҳҳои Тоҷикистон ном бурда мешаванд.