БА ЗИДДИ АБДУСАЛОМ ОДИНАЗОДА ДАР АВСТРАЛИЯ БОЗ 14 ИТТИҲОМИ ДИГАР ЭЪЛОН КАРДААНД (ВИДЕО)
Олими биохимики 53-сола аз Тоҷикистон Абдусалом Одиназода дар Австралия бар асоси боз 14 моддаи қонуни ҷиноии ин кишвар ба терроризм айбдор мешавад. Дар ин бора Аздо ТВ бо такя ба нашрияи West Australian хабар додааст. Тафсилоти ин иттиҳоми нави зидди ин олими тоҷики баҳсбарангез дастрас нашудаст.
Абдусалом Одиназода, ки чандин сол боз дар Австралия кору зиндагӣ мекард, рӯзи 22 декабри соли 2020 дар ҷараёни як амалиёти вижаи пулиси зиддитеррор дар хонааш дар шаҳри Перт, маркази аёлати Австралияи Ғарбӣ бо иттиҳоми тарғиби терроризм дастгир шуда буд. Он вақт ӯ бар асоси 4 моддаи қонун айбдор мешуд.
Абдусалом Одиназода бо видеоҳои моҷаробарангезаш дар Ютуб ва Фейсбук, аз ҷумла бо ҳамлаҳояш ба исмоилиҳо ва ҳизби наҳзат ном бароварда буд. Охирин матлаби ӯ дар Фейсбук рӯзи 21 декабри соли 2020, як рӯз қабл аз ҳабсаш нашр шуда буд.
Абдусалом Одиназода, зодаи деҳаи Сурхи Исфара, чандин сол дар Австралия машғули корҳои илмӣ дар риштаи биохимия буд. Ӯ соли 2015 ба Тоҷикистон баргашт ва дар Донишгоҳи тиббӣ дарс медод. Вале дар поёни соли 2016 дубора Тоҷикистонро тарк кард ва ба Австралия баргашт. Одиназода дар видеоҳояш мавқеи тунд дошт, аз гуруҳҳои ифротиву террористӣ пуштибонӣ мекард ва ба роҳбарони оппозитсияи тоҷик ҳамла мекард. Мақомоти Австралия ӯро дар нашри матлабҳое дар Интернет айбдор мекунанд, ки ба ақидаи пулис, ба ҳамлаҳои ифротӣ дар хориҷ ташвиқ мекунанд.
Кормандони Гуруҳи муштараки зиддитеррористии аёлати Австралияи ғарбӣ тафтиши фаъолиятҳои Одиназодаро моҳи феврали соли 2020 дар пайи ошкор кардани видеоканали ӯ бо даъватҳо ба ҳамлаҳои ифротӣ оғоз кардаанд. Моҳи апрели соли 2020 пулис манзили ӯро кофтуков карда, чанд василаи электронии Одиназодаро мусодира карда буд.
Манзили Одиназода бори дигар рӯзи 22 декабр, дар пайи ҳабси ӯ мавриди кофтуков қарор гирифт. Ёвари комиссари пулиси федералии Австралия Скотт Ли гуфт, муфаттишон «садҳо соат»-ро барои таҳқиқ ба харҷ доданд, то кор то ба ҳабси Одиназода расид. Фармондеҳи пулиси аёлати Австралияи ғарбӣ Прайс Сканлан гуфт, ин боздошт ба аҳамияти ҳушёриву зиракӣ дар масоили терроризм дар Австралия таъкид мекунад. “Матлабҳои интернетие, ки ба анҷом додани ҳамлаҳои террористӣ даъват мекунанд, метавонанд одамонро дар ҳар гӯшаи ҷаҳон, аз ҷумла дар ҷомиаи мо, фаро бигиранд ва фавқулодда муҳим аст, ки мо нафарони масъул ба чунин даъватҳоро ошкор бикунем ва ба ҷавобгарӣ бикашонем», – гуфт Сканлан.
