МАРОСИМИ ПУРШУКУҲИ ИФТИТОҲИ УТОҚИ КОРИИ СОЗМОНИ “АВАНГАРД” ДАР НОРАК (19 АКС)
Рӯзи 12 апрел дар шаҳри Норак маросими пуршукуҳи ифтитоҳи утоқи кории гуруҳи ҷавонони “Авангард” доир шудааст. Бино ба иттилои расмӣ, утоқи кории “Авангард” дар маркази шаҳри Норак воқеъ буда, бо шароити лозимӣ” таъмин мебошад. Барои иштирок дар ин маросим як ҳайъати баландпоя аз дастгоҳи марказии ВКД бо шумули сардори РОПҲНҶ ВКД, полковники милитсия Бухоризода М.Ғ, муовини роҳбари дастгоҳи Вазири корҳои дохилии Ҷумҳурии Тоҷикистон, полковники милитсия Умарҷони Эмомалӣ, роҳбари гурӯҳи ҷавонони “Авангард” Қодиров Ф.М. ва чанде аз ҷавонони фаъоли гурӯҳ ба шаҳри Норак сафар кардаанд. Онҳо дар маросими ифтитоҳи утоқи кории “Авангард” ҷавононро “ояндаи миллат ва хазинаи тиллои двлат” номида, аз ҷавонони Норак хостаанд, ки “бо кору пайкори наҷибона ва оқилонаи худ сазовори боварии Пешвои миллат бошанд.”
Дар фарҷоми маросим ба як қатор ҷавонони фаъоли гурӯҳи “Авангард”- и шаҳр барои иштироки фаъолона дар корҳои ҷамъиятӣ ва ҳамкории судманд бо мақомоти корҳои дохилӣ тӯҳфаҳои хотиравӣ тақдим кардаанд.
“Авангард” як созмони наздик ба бархе доираҳои ВКД Тоҷикистон аст, ки соли 2015 таъсис ёфтааст ва ба гуфтаи Фирӯз Қодиров, яке аз раҳбарони кунуниаш, то имрӯз 22 ҳазор нафар узв дорад.
Ахиран Радиои Озодӣ дар як гузориши таҳқиқотӣ навишт, бо вуҷуди чанд соли фаъолият ва доштани ҳазорон узв, “Авангард” то ҳол расман дар вазорати адлия сабти ном нашудааст.
Аъзои “Авангард” аз ҷониби мақомот дар чорабиниҳои сиёсие, чун ташкили гирдиҳамоиҳо дар назди дафтарҳои сафоратҳои хориҷӣ ва созмонҳои байналмилалӣ дар Душанбе бо талаби ба Тоҷикистон супурдани роҳбарони фирории мухолифини тоҷик ва қатъи пуштибонии онҳо фаровон истифода мешаванд. Ба гуфтаи манобеи огоҳ, аъзои ин созмон мебошад, ки бо як лаҳни қабеҳ ба тарафдорони мухолифин ва ҳамин тавр, ба фаъолони ҷомиаи шаҳрвандӣ ва журналистони мустақил ҳамла мекунанд.
