Як марди 37-солаи зодаи Тоҷикистон, ки барои қаллобӣ дар ҷустуҷӯи федералӣ қарор дошт, дар ҳудуди вилояти Оренбурги Русия, дар марзи ин кишвар бо Қазоқистон дастгир шгудааст. Хадамоти матбуоти раёсати корҳои дохилии вилояти Оренбург рӯзи 17 январи соли 2023 хабар дод, ки марди дастгиршударо дар тавқифгоҳи муваққатӣ (ИВС, изолятор временного содержания) ҷой кардаанд ва дар ҳоли ҳозир бо ташаббускори ҷустуҷӯи ӯ – мақомоти ҳифзи ҳуқуқи Тоҷикистон масъалаи истирдоди ин нафар баррасӣ мешавад.
“Субҳи 17 январ дар гузаргоҳи мошингузари “Маштаково” дар марзи Русия бо Қазоқистон марди
37-солае дастгир шуд, ки аз моҳи августи соли 2020 барои содир кардани амалҳои қаллобӣ дар қаламрави Тоҷикистон таҳти ҷустуҷӯи федералӣ қарор доштааст. Дар ҳоли ҳозир қонуншиканро дар тавқифгоҳ ҷой карда, ташаббускори ҷустуҷӯро аз боздошташ хабардор карданд”, – гуфта мешавад дар иттилоияи пулиси вилояти Оренбург.
Тафсилоти дигар, аз ҷумла номи марди дастгиршуда нашр нашудааст. Муҳтавои парвандаи ӯ ва ин ки оё мушаххасан ба чӣ амалҳои қаллобӣ айбдор мешавад, низ гуфта нашудааст.
Дар рӯзҳои охир ин алакай дуюмин ҳолати боздошти зодагони Тоҷикистон аст, ки бо иттиҳоми амалҳои қаллобӣ таҳти ҷустуҷӯи байналмилалӣ қарор доштанд.
Як рӯз қабл гузориш дода будем, ки кормандони пулиси вилояти Қазоқистони шарқӣ дар ҷараёни чорабиниҳои фаврию ҷустуҷӯӣ дар ҳудуди шаҳри Уст-Каменогорск як шаҳрванди 27-солаи Тоҷикистонро боздошт карданд. Ин нафар аз ҷониби мақомоти ҳифзи ҳуқуқи Тоҷикистон бо иттиҳоми қаллобӣ таҳти ҷустуҷӯи байналмилалӣ қарор дода шуда буд.
Бар асоси маводи парвандааш, ин нафар ба он айбдор мешавад, ки моҳи августи соли 2021 бо роҳи фиреб ба боварии як ҷабрдида даромада, аз вай бо ваъдаи гирифтани виза ё раводиди сафар ба Латвия ва фиристоданаш ба ин кишвари узви Иттиҳоди Аврупо 2 ҳазору 325 доллар гирифтааст, вале ин пулҳои гирифтаашро ба манфиати худ сарф карда, ваъдаи ба ҷабрдида додаашро иҷро накардааст.
Дар раёсати корҳои дохилии вилояти Суғди Тоҷикистон нисбат ба ин нафар бар асоси қисми дуюми моддаи 247 Кодекси ҷиноятии ҶТ бо иттиҳоми қаллобӣ парвандаи ҷустуҷӯи кушода, нисбат ба ӯ чораи пешгирӣ дар намуди ба ҳабс гирифтанро таъйин кардаанд.
Баъди чанде муайян карда шуд, ки ин нафар ба ҷумҳурии Қазоқистон фирор кардааст ва ҳоло дар шаҳри Уст-Каменогорск ба сар мебарад. Моҳи январи соли 2023 кормандони пулиси Қазоқистон ӯро дастгир карданд ва алакай ба Тоҷикистон истирдод карданд.
Бар асоси қисми дуюми моддаи 247 ба вай барои қаллобӣ бо расондани зарари ҷиддӣ ба ҷабрдида ҳамчун ҷазо ҷарима ба андозаи аз 365 то 912 нишондиҳанда барои ҳисобҳо (як нишондиҳанда = 68 сомонӣ, ё тақрибан 6,5 доллар) ё маҳрум сохтан аз озодӣ ба мӯҳлати аз ду то панҷ сол таҳдид мекунад.
Солҳои охир мавридҳои қаллобӣ бо ваъдаи гирифтани додани виза ё раводиди сафар ба кишварҳоиАврупову Амрико дар Тоҷикистон хеле зиёд шудааст.