ДАР ДАНҒАРА ЯК ҶАВОН ЯК МАРДИ 39-СОЛАРО 3 ЗАРБАИ КОРД ЗАДААСТ
Як ҷавони 18-солаи сокини ноҳияи Данғара ба он гумонбар мешавад, ки шоми 31 март, тахминан соати 17:30, дар ҳавлии коллеҷи политехникӣ бо марди 39-солаи сокини ин ноҳия ҷангу ҷанҷол карда, ӯро 3 корд задааст. Ҷабрдидаро бо ҷароҳатҳои вазнин дар бемористон бистарӣ кардаанд.
хххххххххххх
Як навраси 16-сола дар Ҳисор ба он гумонбар мешавад, ки рӯзи 1 апрел аз хонаи сокини 30-солаи ин шаҳр аз дохили ҷузвдон 16 ҳазор сомониро дуздидааст.
Аз навори хабарҳои рӯзи 2 апрели маркази матбуоти ВКД Тоҷикистон
Расонидани ҷароҳати вазнин
Дар натиҷаи баргузор намудани чорабиниҳои оперативӣ-ҷустуҷӯӣ аз ҷониби кормандони милитсия ҷавони 18-солаи сокини ноҳияи Данғара, бо гумони қасдан расонидани зарари вазнин ба саломатӣ дастгир карда шуд.
Номбурда, 31-уми марти соли 2022, тахминан соати 17:30-дақиқа, бо марди 39-солаи сокини ноҳияи мазкур ҷангу ҷанҷол карда, бо корд 3 маротиба ба узвҳои баданаш задааст.
Дар натиҷа, ҷабрдида ҷароҳатҳои вазнини ҷисмонӣ бардошта, дар беморхона бистарӣ гардидааст.
Аз рӯи ин ҳодиса тафтишот идома дорад.
Боздошти ноболиғи 16-сола бо ҷурми дуздӣ
Ба ШВКД дар шаҳри Ҳисор бо ариза марди 30-солаи сокини шаҳри мазкур муроҷиат намудааст, ки 1-уми апрели соли 2022, тахминан соати 11:30-дақиқа, шахси номаълум бо роҳи пинҳонӣ ба хонаи истиқоматиаш даромада, аз дохили ҷузвдон 16 ҳазор сомониро дуздида, аз ҷойи ҳодиса ғайб задааст.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ноболиғи 16-солаи сокини шаҳри зикргардида ҳамчун гумонбар дар содир намудани ҷинояти дуздӣ дастгир карда шуд.
Аз рӯи ин ҳодиса тафтишот идома дорад.