БОҚИР ГУФТ, ДАР НАТИҶАИ ҲАМЛАИ СУБҲИ 4 МАРТ АЗ ДАСТАШ ТИР ХӮРДААСТ (САДО)
Мамадбоқир Мамадбоқиров (Боқир), яке аз лидерҳои ғайрирасмии Вилояти Мухтори Кӯҳистони Бадахшон хабари мавриди ҳамлаи мусаллаҳона қарор гирифтанашро тасдиқ кард ва гуфт, аз дасташ тир хӯрдааст. Боқир рӯзи 4 март ба Радиои Озодӣ гуфт, ҳангоми ҳаракат ба маркази Хоруғ дар яке аз посгоҳҳо ба сӯяш ҳамла сурат гирифт. “Писарам низ дар мошин буд. Тир ба дасти ростам бархӯрд. Устухон зарар надидааст. Як духтури шинос ҷароҳатро баст,” — гуфтааст ӯ.
Боқир ҳамчунин гуфт, баъди ин ҳодиса мардум дар назди хонааш ҷамъ омада буданд, вале ӯ аз ҳама хост, ки барои ин даст ба ҳеч коре назананд, худаш ҳал мекунад.
Ин ҳамла дар ҳоле сурат гирифт, ки мақомот беш аз як моҳ боз аз Боқир талаб доранд, ки ба тафтишот ҳозир шавад. Ӯ дар суҳбат бо Озодӣ тасдиқ кард, ки ин талабро рад кардааст.
“Ба ман гуфтанд, ки таслим шавед, ҷарима мекунем ва пулро ҳам худамон месупорем. Қабул накардам. Ҳатто вохӯрӣ бо ягон генералро қабул накардам”, – гуфтааст ӯ.
Дар ҳамин ҳол, Шариф Назарзода, сардори Раёсати корҳои дохилии Бадахшон ба Озодӣ гуфтааст, аз ҳодисаи ҳамла ба Боқир хабар надоранд. “Ба мо дар ин бора ягон муроҷиат нашудааст,” – гуфтааст генерал Назарзода, ки тоза чанд рӯз пеш ба ҳайси сардори милитсияи вилоят аз Душанбе ба Бадахшон фиристода шуд.
Қаблан Pamir Daily News, пойгоҳи хабарие, ки ҳаводиси Бадахшонро пайгирӣ мекунад, бо такя ба манобеи худ хабар дод, ки афроди либоси мулкӣ дар тан субҳи 4 март дар наздикии бинои раёсати Кумитаи давлатии амнияти миллӣ (КДАМ) дар Хоруғ кӯшиш кардаанд, ки пеши роҳи мошини Боқирро бигиранд.
Як манбаи ин нашрия гуфт: “Ин ҳодиса вақте рӯй дод, ки Мамадбоқиров фарзандонашро ба дарс ба литсейи Оғохон, ки дар наздикии бинои КДАМ ҷойгир шудааст, мебурд. Дар роҳ як мошини номаълум кӯшиш кардааст, ки роҳи Боқирро бандад, вале ӯ тавонистааст, ки аз он убур кунад. Баъди ин афроди ношиноси либоси мулкӣ дар тан аз мошин баромада, ба тарафи мошини Боқир тир паррондаанд”. Аммо шоҳиди дигари ҳодиса гуфтааст, ки он нафарон ба ҳаво тир холӣ карданд, на ба сӯи мошини Боқир.
Маълум нест, ки он нафароне, ки кӯшиши боздошти Боқирро карданд, аз кадом ниҳоди қудратӣ буданд? Мақомоти расмӣ то кунун ин ҳодисаро шарҳ надодаанд.
Мамадбоқир Мамадбоқиров (Боқир), яке аз лидерҳои ғайрирасмии Бадахшон, аз фармондеҳони собиқи Иттиҳоди нирӯҳои мухолифини тоҷик аст, ки баъди имзои созишномаи сулҳи сорли 1997 аз ҳисоби квотаи сифоизаи мухолифин фармондеҳи як қисми ҳарбии нирӯҳои марзбонӣ таъйин шуд ва соҳиби рутбаи полковник шуд.
Ба зидди Боқир ахиран бо иттиҳоми таҳқир ва латтукӯби намояндаи давлат парвандаи ҷиноятӣ кушодаанд. Раиси идораи маорифи вилояти Бадахшон Лутфулло Наврӯзов Боқирро ба он айбдор кард, ки гӯё шоми 29 январ ӯро таҳқиру латтукӯб карда ва аз хонааш дар қабати болоии бинои идораи маориф, ки дар маҳаллаи Бархоруғ, маҳалли зисти Боқир ва аксари тарафдоронаш ҷойгир шудааст, рондааст. Боқир таҳқиру латтукӯби Наврӯзовро рад мекунад ва мегӯяд, “бо муаллим танҳо як суҳбати падарона кардам”. Боқир мегӯяд, ки Наврӯзов ӯро тавассути ТВ бе ягон асос “террорист” номид ва муаллимони дигарро ҳам маҷбур мекард, ки аз тариқи ТВ ба зидди Боқир ва дигар лидерҳои ғайрирасмии Бадахшон гап зананд. Мақомот ин лидерҳои ғайрирасмӣ, аз ҷумла Боқирро “саркардагони гуруҳҳои муташаккили ҷиноӣ” ном мебаранд.
Мақомоти ҳифзи ҳуқуқ дар пайи кушодани парвандаҳои ҷиноятӣ ба зидди Боқир ва тарафдоронаш аз вай талаб доранд, ки ба тафтишот ҳозир шавад ва ҳамчунин 6 сокини дигари Бархоруғро, ки ба латтукӯби кормандони милиса ва амният дар рӯзҳои эътирозҳои 25-28 ноябр дар Хоруғ айбдор мешаванд, бисупорад. Боқир ин талабро қабул накард ва инак беш аз як моҳ боз сокинони Хоруғ нигарони роҳандозии амалиёти махсус барои боздошти Боқиру тарафдорони ӯ мебошанд. Сокинон барои мамониат ба ин, дар роҳҳое, ки ба сӯи хонаи Боқир мебаранд, навбатдории шабонарӯзӣ ташкил кардаанд.