ҲУКМИ БОЗ ДУ ШАҲРВАНДИ ТОҶИКИСТОН БАРОИ ПУШТИБОНӢ АЗ ТЕРРОРИЗМ ДАР РУСИЯ (ВИДЕО)
Як шаҳрванди Тоҷикистон, ки дар шаҳри Абакан, пойтахти ҷумҳурии Хакасия дар минтақаи Сибири Русия ба сар мебурд, бо ҳукми додгоҳи ҳарбии якуми ҳавзаи шарқӣ бо ҷурми таблиғи ақидаҳои созмони террористии дар Русия мамнӯи “Катиба Тавҳид вал-ҷиҳод” ба дуюним соли зиндон маҳкум шуд. Дар ин бора рӯзи 12 ноябр раёсати ФСБ Хакасия хабар дод.
Бино ба ин манбаъ, додгоҳи ҳарбӣ ҳамчунин боз як шаҳрванди Тоҷикистонро, ки дар Абакан бо идеологи созмони террористӣ дар як хона зиндагӣ мекард, бо ҷурми хабар нарасондан ба мақомот 25 ҳазор рубл ҷарима баста, аз ҳаққи иқомат дар Русия маҳрум ва ба Тоҷикистон ихроҷ кард. ФСБ гуфт, ин нафар дар бораи фаъолиятҳои ҳамхонааш хабар дошт, вале ба мақомот хабар надод. ФСБ гуфт, дар пайи ихроҷ мақомоти амниятии Тоҷикистонро дар бораи барои чӣ ҷурм ихроҷ шудани ин шаҳрванд хабардор кардаанд.
Номи шаҳрвандони маҳкумшудаи Тоҷикистон нашр нашудааст. “Катиба Тавҳид вал-ҷиҳод” як созмони ифротии аз лиҳози ақида наздик ба ДОИШ аст, ки ҷангҷӯёни зодаи Осиёи Марказӣ дар Сурия ва Ироқ таъсис додаанд. Таҳти парчами он асосан ҷангҷӯёни ӯзбекзабон меҷангиданд. Ин гуруҳ бо қарори додгоҳи ҳарбии ҳавзаи Маскав аз 5 июни соли 2019 № 2-63/2019 созмони террористӣ эътироф шуда, фаъолияташ дар Русия манъ карда шудааст.
Ёдовар мешавем, раёсати ФСБ кишвари Красноярски Русия рӯзи 15 сентябр аз хунсо кардани фаъолияти як шуъбаи пинҳонкори созмони дар Русия мамнӯи “Катиба Тавҳид вал-ҷиҳод” ва боздошти ду узви фаъоли он хабар дод.
Дар видеое, ки ФСБ нашр кард, дида мешуд, ки мақомоти амниятии саропо мусаллаҳ вориди як нонвойхонаи муҳоҷирон мешаванд ва ҳамаро амр медиҳанд, ки рӯи фарши бино бихобанд. Афсарони ФСБ вориди ҳуҷраи дуюм шуда, дар онҷо ду нафари масти хобро пайдо мекунанд ва низ маҷбур мекунанд, ки дастҳояшонро ба пушт карда, рӯи фарш бихобанд.
Дар видео дида мешавад, ки афсарони ФСБ ҳудуди 10 муҳоҷирро рӯи фарш қатор хобондаанд.
“Дар натиҷаи гузарондани чорабиниҳои фаврию ҷустуҷӯб фаъолияти тарафдорони созмони террористии “Катиба Тавҳид вал-ҷиҳод” дар қаламрави кишвари Красноярск пешгирӣ карда шуд”, — гуфта мешавад дар иттилоияи ФСБ.
Гуфта мешавад, ки ду шаҳрванди яке аз ҷумҳуриҳои Осиёи Марказӣ ба Красноярск барои таблиғи идеологияи террористӣ ва ҷалби сокинони маҳаллӣ ба саффи созмони “Катиба Тавҳид вал-ҷиҳод” омада буданд. Нисбат ба онҳо бар асоси моддаи 205.1 ва 205.2 Кодекси ҷиноятии Русия бо иттиҳоми кумак ба фаъолияти террористӣ ва даъватҳои оммавӣ ба чунин фаъолият парвандаи ҷиноятӣ кушодаанд.
Дар солҳои охир даҳҳо тан аз муҳоҷирон аз кишварҳои Осиёи Марказӣ, аз ҷумла зодагони Тоҷикистон дар Русия бо иттиҳоми даст доштан дар фаъолиятҳои террористӣ боздошту зиндонӣ ва чанд нафараш ҳатто ҳангоми боздошт аз ҷониби кормандони ФСБ кушта шуданд. Наздикони бархеи онҳо ва ҳамчунин ҳомиёни ҳуқуқ мегӯянд, ки мақомоти амниятии Русия дар бисёр маврид пои муҳоҷирони беҳуқуқро беасос бо далелҳои бофтаю сохта бо мақсади болотар нишон додани натиҷаҳои бадастовардаи худ дар мубориза бо терроризм ба чунин парвандаҳо мечаспонанд.