ДАРГУЗАШТИ ЭШОНИ ҚОРӢ, АМАКИ ҚОРӢ СИРАТУЛЛО
Рӯҳонии маъруф дар водии Вахш Қорӣ Мирзомуддин Раупов, маъруф ба Эшони Қорӣ, амаки Қорӣ Сиратулло Раупов, яке аз машҳуртарин қориёни “Қуръон”, субҳи 22 июл дар синни 65 аз олам чашм пӯшид. Яке аз наздикони марҳум ба пойгоҳи хабарии “Бомдод” гуфт, Эшони Қорӣ соати 7:30 аз бемории саратони шуш даргузашт.
“Қорӣ Мирзомуддин тақрибан як сол пеш ба бемории рак ё саратони шуш дучор шуд. Якбора аз по зад ва ҳаито моҳи марти соли ҷорӣ барои табобат ба худи Деҳлии Ҳиндустон рафта буд, аммо ба дардаш дармон наёфт. Гардиши тақдирро бубинед, ки тоза 20 рӯз пеш барои худаш аз Дубай мошини “Тойота” фармоиш дода буд, ки бояд барояш меоварданд, вале насибаш накард. Насибаи умраш то ҳамин субҳи 22 июл будааст”, – гуфт ҳамсуҳбати “Бомдод.”
Маросими намози ҷанозаи Қорӣ Мирзомуддин баъди пешин дар ноҳияи Вахш доир мешавад.
Қорӣ Мирзомуддин Раупов соли 1956 дар ноҳияи Қумсангир (ҳоло Ҷайҳун) ба дунё омадааст. Ӯ дар тарбияи қориёни мураттаби “Қуръон” саҳми зиёд дошт ва ба гуфтаи наздиконаш, беш аз 100 қории мураттаб тарбия кардааст. Аз ҷумла Қорӣ Шарҳиддин, писараш Сиратулло, ҷияанш Қорӣ Ирфониддин, имомхатиби масҷиди ҷомеи шаҳри Бохтар, ки соли гузашта қурбони коронавирус шуд, аз шогирдони Эшони Қорӣ ба шумор мераванд. Ҳамин тавр, Қорӣ Ҳайдар ва Қорӣ Саиднуриддин, нафаре, ки соли 1994 дар сабқати ҷаҳонии қориён дар Донишгоҳи Ал-Азҳари Миср ғолиб омад, низ аз парвардаҳои мактаби қоригии Қорӣ Мирзомуддин будаанд.
Эшони Қорӣ баъди аз ҷониби давлат манъ шудани тадриси улуми динӣ чанд соли охир рӯ ба тиҷорат оварда буд. Ӯ се дафъа Ҳаҷ кардааст: Соли 2004 аз ҳисоби худ ба зиёрати Хонаи Худо рафта, солҳои 2005 ва 2006 ба ҳайси роҳбалад аз ҷониби муфтиёт ба Маккаву Мадина сафар карда буд.
Эшони Қорӣ, бино ба иттилои дарёфтӣ, 4 зан дошт. Аз зани аввалаш 6 духтару як писар ва аз зани дуюмаш 4 духтар ва 2 писар дошт. Дар бораи фарзанд доштан ё надоштанаш аз ду завҷаи дигар маълумот дастрас нашуд.
Яке аз шогирдони аз ҳама маъруфи ӯ Қорӣ Сиратулло Раупов, писари бародараш Абдухолиқ аст, ки шуҳрати тиловату қироаташ ба берун аз Тоҷикистон, ҳатто то давлатҳои Араб рафтааст ва видеоҳои “Қуръон” хонданаш дар Интернет хеле зиёданд.