ТОҶИКИСТОН АЗ АМРИКО БАРОИ ДАРЁФТИ ВАКСИНАҲОИ PFIZER ВА MODERNA КУМАК ХОСТ
Тоҷикистон хостори мусоидати Амрико барои ба Тоҷикистон ҷудо кардани ваксинаҳои Pfizer ва Moderna шудааст. Дар ин бора вазорати рушди иқтисод ва савдои Тоҷикистон дар сомонаи расмиаш бо натиҷагирӣ аз қисмати иқтисодӣ ва энергетикии машваратҳои сиёсии навбатӣ миёни Ҷумҳурии Тоҷикистон ва Иёлоти Муттаҳидаи Амрико, ки рӯзи 1 июл дар шаҳри Вашингтон доир шуд, хабар додааст. Вазорати иқтисод ҳамчунин хабар дод, ки соли 2021 кӯмаки USAID (Агентии рушди байналмилалии Амрико) ба Тоҷикистон дар ҳаҷми 46,5 млн. доллар пешбинӣ шудааст.
Бино ба гузориши сомонаи вазорати рушди иқтисод ва савдои Тоҷикистон, рӯзи 1июли соли 2021 Вазири рушди иқтисод ва савдо Завқизода Завқӣ Амин қисмати иқтисодӣ ва энергетикии машваратҳои сиёсии навбатӣ миёни Ҷумҳурии Тоҷикистон ва Иёлоти Муттаҳидаи Амрико дар шаҳри Вашингтонро якҷо бо Мэтт Марри муовини ёрдамчии Котиби давлатии ИМА оид ба иқтисод ва тиҷорат раисӣ карда, масъалаҳои истифодаи пурраи имкониятҳои савдо ва сармоягузории дуҷониба, ҳамгироии минтақавӣ, пешгирии тағйирёбии иқлим ва муҳити зист, коронавируси COVID-19 ва тандурустиро бо ҷониби ИМА муҳокима намуданд.
Қайд гардид, ки ҳамкориҳои тиҷоратию иқтисодӣ бо ИМА сол то сол рушд карда, ба сатҳи сифатан нав баромадаанд.
Ҷонибҳо ба мувофиқа омаданд, ки ҷиҳати истифодаи имкониятҳои васеи тиҷоративу иқтисодӣ ва сармоягузории ИМА барои манфиатҳои иқтисодиву сармоягузории Тоҷикистон дар самтҳои сафарбар намудани дастгириҳои молиявию техникии иловагӣ, аз ҷумла тавассути USAID ва Эксимбонки ИМА, таҳия ва татбиқи лоиҳаҳои сармоягузорӣ дар соҳаи энергияи сабз, пешгирии тағйирёбии иқлим ва ҳифзи муҳити зист, беҳтар намудани дастрасии аҳолӣ ба оби нӯшокӣ, ҳифзи хуқуқи моликияти зеҳнӣ, пешгирӣ ё кам кардани паҳншавии бемории сироятии COVID-19 ва ҳифзи тандурустиву иҷтимоии аҳолӣ ва аз байн бурдани монеаҳои мавҷуда корҳоро тақвият медиҳанд.
Дар робита ба ин иттилоъ дода шуд, ки соҳаҳои энергетика, саноати истихроҷи маъдан, нақлиёт ва коммуникатсия, сохтмон ва истеҳсоли масолеҳи сохтмонӣ, саноати сабук ва хӯрокворӣ, кишоварзӣ ва маҳсулоти он, инчунин сайёҳӣ ва бонкдорӣ самтҳои афзалиятноки ҳамкорӣ ва ҷалби таваҷҷуҳи махсуси сармоягузорони ИМА ба ҳисоб рафта, пешниҳод гардид, ки ҳамкориҳо дар ин замина бо мақсади тавсеа ва рушди ҳамкориҳои мутақобилан судманд дар сатҳи баланд ба роҳ монда шаванд.
Инчунин қайд гардид, ки кӯмаки USAID дар ҳаҷми 46,5 млн. доллар барои Тоҷикистон дар соли 2021 пешбинӣ шудааст.
Ҷониби Тоҷикистон мусоидати ИМА-ро ҷиҳати ба кишвар ҷудо намудани ваксинаҳои намуди Pfizer ва Moderna хоҳиш намуд.
Дар анҷоми вохӯрӣ ҷонибҳо омодагии худро барои ҳаматарафа густариши ҳамкориҳои тиҷоративу иқтисодӣ ва истифодаи самараноки ҳамкориҳои дуҷониба изҳор намуданд.
