ФАВРӢ! ҚАТЛИ БЕРАҲМОНАИ 4 УЗВИ ЯК ОИЛА, АЗ ҶУМЛА 3 КӮДАК, ДАР НОҲИЯИ ҶАЙҲУН (СОБИҚ ҚУМСАНГИР)
Субҳи 12 июн дар деҳаи Тарғоқи ноҳияи Ҷайҳун (Қумсангири собиқ) дар ҷануби Тоҷикистон дастикам чор узви як оила, аз ҷумла 3 кӯдак, бераҳмона бо табар кушта шудаанд. Дар ин бора Радиои Озодӣ хабар дод. Озодӣ гуфт, сабаб ва тафсилоти ҳодиса ҳанӯз дастрас нашудааст, вале бино ба иттилои тасдиқношуда, ҳамаи ин 4 нафарро бо табар куштаанд. Ҳамсуҳбати Озодӣ гуфтааст, ки марди ин хонавода 39 сол дошта, деҳқон буд. Ба гуфтаи ӯ, деҳаи Тарғоқ ҳоло “милисаборон аст” ва “касеро дохил ё берун шудан намемонанд.”
Рӯзи 12 июн дар шуъбаи корҳои дохилии ноҳияи Ҷайҳун ба Радиои Озодӣ гуфтанд, ҳодиса субҳи шанбе рух дода, ҳамаи қурбониён аз як оила мебошанд. Мақомот тафсилоти дигар намедиҳанд. Сухангӯи ВКД Тоҷикистон ҳам гуфтааст, ки аз ин хабар огаҳӣ дорад, вале ҷузъиёти бештар дертар нашр мешавад.
Ноҳияи Ҷайҳун дар ҷануби Тоҷикистон дар наздикии марзи Тоҷикистон бо Афғонистон ҷойгир аст. Дар Ҷайҳун 126 ҳазор нафар ба сар мебаранд. Аксар сокинони Ҷайҳун ба деҳқонӣ машғул мебошанд. Ин ноҳия қаблан Қумсангир ном дошт ва соли 2016 ба Ҷайҳун табдили ном кард.