ИМОМИ МАСҶИДИ ЯККАЧАНОРРО АЗ БОЗДОШТ ОЗОД КАРДААНД (ВИДЕО)
Асадулло Исмоилов, имоми масҷиди маҳаллаи Яккачанори шаҳри Душанбе, ки шаби 19 ба 20 апрел пас аз анҷоми намози таровеҳ дар масҷид дастгир шуда буд, рӯзи 25 апрел, баъди камтар аз як ҳафтаи боздошташ озод шудааст. Дар ин бора рӯзи 26 апрел бародари ӯ Қадриддин Исмоилов ба Радиои Озодӣ хабар дода, гуфтааст, ки Асадулло Исмоилов ҳоло дар хонааш қарор дорад ва ӯ ба дидорбиниаш рафта буд. Аммо талошҳои Радиои Озодӣ барои тамос бо худи имоми масҷиди Яккачанор натиҷа надодааст. Наздиконаш гуфтаанд, ки ӯ бо худ телефони мобил надорад.
Асадулло Исмоилов дуюмин имоми масҷид буд, ки баъди ширкат дар маросими дафни Домулло Ҳикматуллоҳи Тоҷикободӣ дастгир шуданд.
Шоми 19 апрел, тақрибан ҳамзамон бо Асадулло Исмоилов, мақомоти амниятӣ Абдулҳақ Обидов, сархатиби масҷиди марказии ноҳияи Шоҳмансурро ҳам дастгир карданд. Мақомот гуфтанд, Махдуми Абдулҳақ ва 5 нафари дигари дастгиршуда бо ҷараёни мамнӯи мазҳабии Салафия алоқа доштанд. Вале манобеи “Бомдод” хабар доданд, ки Махдуми Абдулҳақ дар маросими дафни Домулло Ҳикматуллоҳ ӯро “пешвои бузург” ном бурда, гуфтааст, вақте чунин олимон аз байн мераванд, “мардум пешвоҳои ҷоҳилу гумроҳро барои худ пешво мегиранд.” Ба гуфтаи манобеи “Бомдод”, мақомот дар ин суханон ишора ба президенти Тоҷикистон Эмомалӣ Раҳмонро дидаанд, ки соли 2016 соҳиби унвони “Пешвои миллат” шуда буд.
Бино ба гузориши Радиои Озодӣ, Асадулло Исмоиловро мақомот рӯзи якшанбе, 25 апрел, баъди қариб як ҳафтаи боздошташ озод кардаанд. Қадриддин Исмоилов, бародари имоми масҷиди Яккачанор ба Озодӣ гуфтааст, ки бародараш дар хона қарор дорад, вале бо худ телефон надорад, ки бо хабарнигорон суҳбат кунад.
Қаблан гузориш шуда буд, ки Асадулло Исмоилов, имомхатиби масҷиди маҳаллаи Яккачанори пойтахти Тоҷикистон аз ҷониби мақомоти амниятӣ дастгир шудааст. Наздиконаш сабаби боздошти ӯро намедонистанд ва мегуфтанд, мақомоти амният “ӯро барои суҳбат” даъват кардаанд. Қадруддин Исмоилов яке аз бародарони Исмоилов гуфта буд, танҳо ҳаминро медонад, ки “барои суҳбат даъват шудааст”, вале мавзуи суҳбатро намедонад.
“Ин давлат аст, ҳукумат аст, умедворам дида мебароянд. Бегуноҳияш исбот шавад, ҷавоб медиҳанд. Ӯ доим ба фоидаи давлату ҳукумат ва халқу ватан сухан мегуфт ва бо гуруҳҳои навбаромади “Салафӣ” сахт муқовимат мекард”, –гуфта буд Қадруддин Исмоилов рӯзи 23 апрел дар суҳбат бо Радиои Озодӣ.
Ба гуфтаи наздиконаш, Асадулло Исмоиловро шаби 19 ба 20 апрел пас аз анҷоми намози таровеҳ дар масҷиди Яккачинори пойтахт дастгир карда, субҳи 20 апрел хонааш дар деҳаи Теппаи Самарқандии ноҳияи Рӯдакиро низ кофтукоб карданд ва қисме аз китобҳояшро бо худ бурданд.
Асадулло Исмоилов 42 сол ва 6 фарзанд дошта, хатмкардаи Донишкадаи исломии Тоҷикистон (маъруф ба мадраса) буда, аз шогирдони Амонулло Неъматзода, собиқ муфтии Тоҷикистон ба шумор меравад. Ӯ нахуст имоми яке аз масҷидҳои ноҳияи Рӯдакӣ ва ахиран имомхатиби масҷиди Яккачанори Душанбе таъин шудааст.
Гуфта мешавад, Асадулло Исмоилов низ рӯзи 14 апрел дар маросими ҷанозаи Домулло Ҳикматуллоҳи Тоҷикободӣ дар деҳаи Ғилмони ноҳияи Тоҷикобод ширкат дошт. Ӯ алакай дуюмин имомхатиб буд, ки баъди маросими дафни Домулло Ҳикматуллоҳ дастгир шуд.
Шоми 19 апрел, тақрибан ҳамзамон бо имоми масҷиди Яккачинор, мақомоти КДАМ Абдулҳақ Обидов, сархатиби масҷиди марказии ноҳияи Шоҳмансурро низ дастгир карданд.
КДАМ рӯзи 22 апрел гуфт, Обидов ва 5 сокини дигари шаҳри Ваҳдат ва ноҳияи Рӯдакӣ ба пайравӣ ба ҷараёни дар Тоҷикистон мамнӯи экстремистии Салафия айбдор мешаванд. Вале манобеи сомонаи “Бомдод” қаблан хабар дода буданд, ки Махдуми Абдулҳақро дар пайи як суханронии пурсарусадояш дар маросими дафни Домулло Ҳикматуллоҳ дастгир кардаанд.
Домулло Абдулҳақ дар он маросим Домулло Ҳикматуллоҳро “яке аз пешвоҳои бузурги мо” ном бурда, аз он изҳори надомат мекунад, ки “вақте чунин инсонҳо дар миёни мардум боқӣ намонд, Худованд олимеро боқӣ нагузошт, мардум дигар пешвоёни ҷоҳил ва нодонро барои худ пешво мегиранд” ва ин “пешвоҳои ҷоҳилу нодон, ки аз илми Шариъат баҳрае надоранд, бидуни илму огоҳӣ барои мардум фатво содир мекунанд. Пасон онҳо худ гумроҳ ва дар натиҷа, дигаронро низ гумроҳ мекунанд.”
Бино ба иттилои ҳамсуҳбатони “Бомдод”, мақомоти амниятӣ дар ин муқоиса гӯё ишораҳо ба президенти кунунии Тоҷикистон Эмомалӣ Раҳмонро дидаанд, ки соли 2016 бо қабули як қонуни вижа “Пешвои миллат” эълон шуд.
Вале яке аз афроди наздик ба Домулло Абдулҳақ гуфт, мавъизаи ӯ дар маросими дафни Домулло Ҳикматуллоҳ ягон паёми сиёсӣ надошт ва манзураш аз “пешвоҳои ҷоҳилу нодон” танҳо он ходимони дин буд, ки бо дониши ба маротиб камтар аз шахсиятҳое, чун Домулло Ҳикматуллоҳ фатво содир мекунанд.
Домулло Ҳикматуллоҳ, яке аз муътабартарин аз рӯҳониёни суннатгарои тоҷик, рӯзи 13 апрел, дар рӯзи аввали моҳи шарифи Рамазон дар синни 80 аз олам чашм пӯшид ва рӯзи 14 апрел дар зодгоҳаш – деҳаи Ғилмони ноҳияи Тоҷикобод ба хок супурда шуд. Дар маросими дафни ӯ ҳазорон нафар аз пайравонаш ва ҳамин тавр, аксари рӯҳониёни матраҳ дар арсаи динии Тоҷикистон иштирок карданд. Аксари ин рӯҳониёни шинохта, аз ҷумла Домулло Абдулҳақ, дар маросими дафни Домулло Ҳикматуллоҳ суханронӣ карданд.