МУЛЛО ЯЪҚУБ АЗ КУШТА ШУДАНИ ДАҲҲО ЗОДАИ ТОҶИКИСТОН ДАР АФҒОНИСТОН ХАБАР ДОД
Мулло Муҳаммадяъқуб Муҷоҳид, сарпарасти вазорати дифоъ дар режими нави Толибон ва писари калонии асосгузори ин гуруҳи тундрав Мулло Умар, рӯзи 31 декабри соли 2023 дар як нишаст дар Кобул дар бораи кушта шудани даҳҳо зодаи Тоҷикистону Покистон ва боздошти даҳҳо атбои хориҷӣ дар ҳамлаҳои ахир ба масҷиду хонақоҳҳо ва мадрасаҳо дар Афғонистон хабар дод ва аз мақомоти Тоҷикистону Покистон хост, то монеи ба Афғонистон сарозер шудани шаҳрвандони туфангдорашон шаванд.
Бино ба гузориши рӯзномаи “8 субҳ”, Мулло Яъқуб гуфтааст, дар 12 моҳи гузашта даҳҳо шаҳрванди Тоҷикистон аз сӯи Толибон кушта ва садҳо тани дигар боздошт шудаанд. Ӯ рақамҳои дақиқтаре дар бораи тоҷикистониҳои дар Афғонистон кушта ё боздоштшуда ва ҷузъиёте дар бораи шахсияти онҳо наовард, вале афзуд, ки баъди тоҷикистониҳо дар ҷои дуюм дар миёни ҷангиёни хориҷӣ зодагони Покистон меоянд.
“Бештар аз 20 покистонӣ дар амалиёти нерӯҳои мо кушта шуданд ва садҳо тани дигар боздошт гардиданд”, – гуфтааст Мулло Яъқуб. Ӯ аз Тоҷикистону Покистон хост, “марзҳои заминӣ ва ҳавоии худро ба таври ҷиддӣ назорат кунанд ва монеи ба Афғонистон рафтани туфангдорон шаванд”.
Мақомоти Тоҷикистон ба ин баёнияи Мулло Яъқуб расман то ҳол вокуниш накардаанд, вале қаблан хабарҳое дар бораи иштироки фаъолонаи ҷангиёни тоҷикистонӣ дар ҳамлаҳои “ДОИШ Хуросон”, як гуруҳи низ тундрав, вале рақиби Толибон болои мактабҳову масҷидҳо ва алайҳи шахсиятҳои алоҳида дар Афғонистон хабарҳо ба даст расида буданд.
.Аз ҷумла гуфта мешуд, ки омилони асосии сӯиқасд ба волии аз сӯи Толибон таъйиншудаи вилояти Балх низ зодагони Тоҷикистон буданд. Муҳаммаддовуд Музаммил субҳи 9 марти соли 2023 бар асари таркиши маргталабона дар дафтари кораш кушта шуд.
Мақомоти Тоҷикистон аз ҳузури зодагони ин кишвар дар ҳайъати гуруҳҳои тундрав дар Афғонистон изҳори нигаронӣ мекунанд, вале бештар дар мавриди гуруҳи “Ҷамоати Ансоруллоҳ”, ки дар Афғонистон амал мекунад ва аз ҳампаймонҳои Толибон ба шумор меравад.
Дар давоми соли 2023 ду дафъа: моҳи апрел ва моҳи сентябр мақомоти амниятии Тоҷикистон аз безарар кардани ҷангиёни “Ансоруллоҳ”, ки гуфта мешуд, аз хоки Афғонистон вориди қаламрави Тоҷикистон шудаанд, хабар дода буданд. Аз ҷумла моҳи сентябр дар дараи Язгулом се нафари мусаллаҳ кушта шуданд. Мақомот гуфтанд, ки онҳо ҷангиёни “Ансоруллоҳ” буданд ва мехостанд дар арафаи иди истиқлоли Тоҷикистон амалҳои тахрибкоронаю террористӣ анҷом диҳанд.
“Ҷамоати Ансоруллоҳ”, ки дар Тоҷикистон созмони террористӣ шинохта шудааст, дар Афғонистон ташкил ёфта, асосан ҷангиёни зодаи Тоҷикистонро муттаҳид мекунад.
Рӯзномаи “8 субҳ” ҳамчунин хабар додааст, ки шумории зиёди ҷангиён аз Осиёи Марказӣ бо хонаводаҳои худ дар Афғонистон зери чатри Толибон ҳузур доранд ва ҳудуди 300 хонаводаи аъзои гурӯҳҳои “Ҳаракати исломии Ӯзбекистон” ва “Ансоруллоҳ” дар шимолу шарқи Афғонистон зиндагӣ ва фаъолият доранд.