ВИДЕО АЗ ҶОИ ҲОДИСА: СЕЛ ДАР ЛАХШ ПУЛИ ДЕҲАИ ОБШОРОН (СОБИҚ СУГАТ)-РО ШУСТА БУРД
Яке аз сокинони ноҳияи Лахш (собиқ Ҷиргатол) бо ирсоли як видео хабар дод, ки сел рӯзи 28 июли соли 2023 пули деҳаи Обшорон (собиқ Сугат) дар ҷамоати Сурхобро шуста бурд. Ин пул ягона василае буд, ки ин деҳаро ба маркази ноҳияи Лахш мепайваст. Ба гуфтаи сокинон, вайрон шудани пул деҳаи Сугатро дар инзивоъ қарор додааст ва онҳо имкони рафтан ба маркази ноҳия, аз ҷумла барои хариди бозор ё барои табобат дар бемористонро надоранд.
Кумитаи ҳолатҳои фавқулоддаи Тоҷикистон қаблан хабар дод, ки 28 июл, тахминан соати 18:05, дар натиҷаи болоравии дамои ҳаво сатҳи об дар рӯдхонаи Сугат дар минтақаи Арчакаппаи ноҳияи Лахш боло рафта, боиси омадани сел шуд. Сел ҷараёни ҳаракати дарёи Сурхобро муддати 30 дақиқа баст. Кумита гуфт, дар айни замон ҳудудан 300-400 метр роҳи мошингард баста буда, ҳаракати нақлиёт муваққатан боздошта шудааст ва ҳоло корҳои бартарафсозии паёмадҳои ин офати табиӣ идома доранд.
Кумитаи ҳолатҳои фавқулоддаи Тоҷикистон қаблан хабар дод, ки рӯзи 28 июли соли 2023 дар чанд минтақаи ҷумҳурӣ, аз ҷумла дар Лахшу Айнӣ, Панҷакент ва Исфараю Деваштичу Истаравшан боришоти шадид ба амал омада, дар Лахшу Айнӣ ва Панҷакенту Исфара сел омадаст.
Аз ҷумла нимаи дуюми рӯзи 28 июл наздик ба соати 14:30, бар асари боронҳои пуршиддат дар қаламрави ҷамоати Урметани ноҳияи Айнии вилояти Суғд сел омад, ки дар натиҷа роҳи дорои аҳамияти маҳаллӣ, хонаҳои истиқоматии сокинон ва иншоотҳои ёрирасон зери об монданд ва қисман зарар диданд.
Бино ба маълумоти пешакӣ, сел дар ин деҳаи бузурги ноҳия ба 63 хоҷагӣ зарар расонд, ки аз он 7 хонаи истиқоматӣ ва 56 иншооти ёрирасону қитъаҳои наздиҳавлгӣ буданд.
Ба ҷойи ҳодиса гурӯҳи кории Кумитаи ҳолатҳои фавқулодда эъзом шуд. Дар айни замон комиссияи ҳолатҳои фавқулода барои муайян кардани ҳаҷми зарари расида ва расонидани кумакҳои аввалия ба зарардидагон ба кор оғоз кардааст.
Кумитаи ҳолатҳои фавқулодда гуфт, хушбахтона, сел дар Урметан талафоти ҷонӣ надошт.
Ҳамин тавр, соати 14:45 боронҳо боиси омадани сел дар ҳудуди ҳеҳаҳои Ёрӣ, Лоиқ Шералӣ ва ҷамоати деҳоти Амондараи шаҳри Панҷакент шуд. Дар натиҷа роҳҳои байни деҳаҳо, заминҳои кишовразӣ дар қаламрави деҳаҳои Рой, Раводии фамоати деҳоти Амондара зара диданд
Талафоти ҷониву хисороти дигар нест.
28 июли соли 2023 наздик ба соати 17:35 бар асари боронҳо дар ҳудуди маҳаллаи Хушоботи деҳаи Ворухи ноҳияи Исфара сел омад. Хушбахтона, манзили истиқоматии сокинон аз ин сел зарар надид.
Ҳамчунин аз боронҳои пуршиддат омадани селҳо дар қаламрави ноҳияҳои Истаравшан ва Деваштич ба қайд гирифта шуданд.
Кумитаи ҳолатҳои фавқулодда хотиррасон кардааст, ки бино ба маълумоти Агентии ҳавошиносии Тоҷикистон рӯзҳои 29-32 дар ноҳияҳои ғарбии Вилояти Мухтори Кӯҳистони Бадахшон, вилояти Суғд ва навоҳии тобеъи ҷумҳурӣ хатари омадани селҳо, болоравии сатҳи оби дарёҳо, ярч ва резиши санг боқӣ мемонад.
Дар ҳамин иртибот Кумита ба сокинон ва меҳмонони кишвар муроҷиат мекунад, ки дар ин рӯзҳо ҳамнгоми будубош дар соҳили обҳо қоидаҳои бехатариро ҷиддан рияо намоянд. Маслиҳат дода мешавад, ки сайёҳон хати ҳаракати худро ба ин ё он гӯшаи кишвар дар ҳамкорӣ бо мутахассисони КҲФ таҳия намоянд. Бахусус сафар бо роҳҳои кӯҳӣ, ки хатари баногаҳ омадани селҳо ба асари об шудани пиряхҳо вуҷуд дорад.
Кумита ҳамчунин аз аҳолӣ хоҳиш мекунад ҳангоми ҳаракат аз роҳҳои кӯҳиву ағбаҳо, ҳангоми ғунучини ҳезуму гиёҳҳои кӯҳӣ, моҳидориву шикор эҳтиёт кунанд.
Сокинони навоҳи кӯҳистониву доманакӯҳҳо ҳангоми чорвочаронӣ дар наздикиои соҳили обҳо низ бояд вобаста ба вазъ эҳтиёт намоянд.
Кумита ҳамчунин аз аҳоли хоҳиш мекунад ба хотири пешгирӣ аз хатари селҳои эҳтимолӣ сар вақт ҷӯйборҳо, каналҳо ва селроҳаҳои минтақа ва макони зисти худро аз ҳар гуна хасу хаспораҳо тоза кунанд, то оби сел бемамониат ба як маҷрои бехатар ҷорӣ шавад.
Аксҳои КҲФ аз Урметан:
