НОМҲОИ НАВ ДАР ҚАЗИЯИ ШУҲРАТ ИСМАТУЛЛОЕВ: РАИСИ СОБИҚИ “ТОҶИК ЭЙР” ВА ҚАМАРУ БИЛОЛ
Нашрияи “СССР”, чопи Душанбе рӯзи 20 июли соли 2023 дар бораи чанд номи нав дар қазияи рабудан ва бо шиканҷа куштани муовини аввали раиси “Ориёнбонк” Шуҳрат Исматуллоев хабар дод. Ба иттилои манобеи “СССР”, яке аз 5 нафари боздоштшуда дар чорчӯби ин парванда Қамар Азизов аст, ки гӯё аз ӯ чун гумонбари хабарбиёру хабарбар ё худ ”наводчик” ҳадс мезананд.
“Гуфта мешавад, ин нафар бо Исматуллоев бизнеси ҳамҷояи бинокорӣ ё худ “домсозӣ” доштааст. Дар баробари ин, Билол Азизов, писари Қамар Азизов, ки то ин дам ба ҳайси намояндаи ширкати ҳавопаймоии “Сомон Эйр” фаъолият мекард, аз кор озод шудааст. Мақомот то кадом андоза даст доштани Билолро дар ҷинояти одамрабоӣ месанҷанд”, – хабар медиҳад “СССР”.
Номи дигар дар ин парванда, ба иттилои нашрия, Малика ном бонуест, ки ҳоло ё дар Туркия ва ё дар Дубай қарор дорад. Аммо “СССР” эътироф мекунад, ки овозаҳо дар бораи олудагии Малика ба ин қазияи пурсарусадо дар ҳоли ҳозир дар сатҳи ҳадсу тахминҳост ва нашрия то кадом дараҷа ба ҳақиқат наздик будани ин гумонҳоро санҷида наметавонад.
“СССР” дар айни замон, аз бархе фарзияҳо дар мавриди эҳтимоли иртибот доштани Рустам Холиқов, раиси собиқи ширкати ҳавопаймоии “Тоҷик Эйр” бо рабудани Исматуллоев хабар додааст. Аз ҷумла, ба иттилои ин нашрия, Рустам Ашӯров, яке аз одамрабоён, ки баъди 10 рӯзи рабудани Исматуллоев дар роҳи фирор ба Аврупо дар Молдова кушта шуд, бо Рустам Холиқов риштаи хешутаборӣ дошта, бародари Рустам Ашӯров, Ашуров Неъмат Каримович домоди Холиқов Рустам, яъне шавҳари Таҳмина Холиқова – духтари калонии Рустам Исуфович мебошад. Ҳамин тавр, меафзояд нашрия, саркардаи одамрабоён Дилшод Саидмуродов (машҳур бо лақабҳои «Дилшоди СБ» ё «Дилшоди красавчик»), ки аз кишвар фирор кард ва феълан тавассути Интерпол дар ҷустуҷӯ қарор дорад, низ дар навбати худ, дӯсти оилаи Холиқовҳо, дӯсти хеле ва хеле наздики Холиқов Сӯҳроб (писари Холиқов Р.И.) будааст.
Рустам Холиқов дар робита ба як парвандаи коррупсионӣ ба маблағи миллионҳо доллар аз моҳи майи соли ҷорӣ дар боздошт қарор дорад.
Ин дар ҳолест, ки бино ба иттилои манобеи пойгоҳи хабарии “Бомдод”, бо гузашти инак қариб як моҳ аз рабудан ва куштани муовини аввали раиси “Ориёнбонк” Шуҳрат Исматуллоев мақомот то ҳол ҷасади ӯро пайдо накардаанд. Макони будубоши саркардаи одамрабоён Дилшод Саидмуродов, муллақаб ба “Дилшоди СБ” ва “Дилшоди Красавчик” низ то ҳол мушаххас нашудааст.
Манобеи “Бомдод” мегӯянд, ҷустуҷӯи ҷасади Исматуллоев аз маркази ноҳияи Айнӣ то марзи Ӯзбекистон қад қади соҳили дарёи Зарафшон ва ҳам қад қади дарёи Варзоб аз нақби “Истиқлол” то даруни шаҳри Душанбе идома дорад, вале то ҳол натиҷае надодааст.
Мақомот ва наздикони бонкдори маъруф дар қад қади дарёи Зарафшон бо ваъдаи ҷоизаи бузург лӯлиён ё ҷӯгиҳои сокини Панҷакентро, ки ҳамчун ғаввосу дарёгард дар ҳавзаи Зарафшон ном баровардаанд, низ ба ҷустуҷӯи Шуҳрат Исматуллоев ҷалб кардаанд. Маъмулан аксари ҷасадҳои дар Зарафшон ғарқшударо ҳамин лӯлиҳо пайдо мекунанд ва аз обҳои пурхурӯши ин дарё берун мекашанд.
Куҷо будани саркардаи одамрабоён “Дилшоди Красавчик” ва чанд шарики ӯ, ки низ тавонистанд аз Тоҷикистон фирор кунанд, то ба ҳол номаълум боқӣ мемонад.
Шуҳрат Исматуллоев, ки 49 сол дошт, дар гузашта раҳбари намояндагии ширкати пулфиристии “Вестерн Юнион” дар Тоҷикистонро бар уҳда дошта, чандин соли охир муовини аввали раиси “Ориёнбонк” ва амалан дасти рости раиси ин бонк Ҳасан Асадуллозода буд. Ӯро шоми 23 июн аз назди хонааш дар кӯчаи Закариёи Розии ноҳияи Исмоили Сомонӣ 4 нафар ба мошини рангаш сиёҳи “Ҳюндай Соната” бор карда, бурданд.
Бино ба иттилои Додситонии кулли Тоҷикистон, гуруҳи муташаккили ҷиноятии Дилшод Саидмуродов нақшаи рабудани Исматуллоевро ҳанӯз моҳи марти соли 2022 кашида буд. Ба иттилои додситонӣ, ин даста беш аз 10 нафарро дар бар мегирифт, ки аз ин шумор 5 нафар дастгир шуда, бақия фирор кардаанд. Аз ҷумла рӯзи 24 июн, билофосила баъди бо шиканҷа куштани Шуҳрат Исматуллоев дар деҳаи Шодоби ҷамоати Чорбоғи ноҳияи Варзоб Дилшод Саидмуродов ва Акбар Ахмедов ба Маскав ва Шоҳрух Хоҷаев ба Туркия парвоз кардаанд. Рӯзи 25 июн Рустам Ашӯров, нафари чоруме, ки дар рабудани Исматуллоев иштироки бевосита дошт, ба Туркия ва аз онҷо рӯзи 30 июн ба Молдова фирор кард. Вале ӯро ба Молдова роҳ надоданд ва Ашӯров аз тарси ин ки ӯро бозпас мефиристанд туфангчаи марзбони молдованро кашида гирифта, ӯ ва як подполковник аз хадамоти амнияти фурудгоҳи Кишинёвро кушт. Ашӯров сипас ҳангоми боздошташ 10 тир хӯрд ва рӯзи 3 июл дар бемористон ҷон дод.
Рустам Ашӯров дар охирин занги телефонӣ ба модараш аз фурудгоҳи Кишинёв баъди куштани ду афсари молдован ва пеш аз боздошти худаш эътироф карда буд, ки Исматуллоевро Дилшод Саидмуродов шиканҷа дода кушт ва ӯ мурдаашро бурда, ба дарё партофт.
Гуфта мешавад Дилшод Саидмуродов рӯзи 23 июн, яъне ҳанӯз қабл аз рабудани Исматуллоев, фарзандонашро ҳамроҳи дояи онҳо ба Маскав фиристода, худаш субҳи 24 июн, билофосила баъди куштану ба дарё партофтани гаравгон, ҳамроҳи ҳамсари дуюмаш ба Маскав фирор кардааст. Нашрияи “СССР” хабар дод, ки “Дилшоди Красавчик” аз тарифи толори СИПи фурудгоҳи Душанбе парвоз кардааст.
Бино ба иттилои манобеи пойгоҳи “Бомдод”, ӯро дар фурудгоҳи Маскав ҳамсабақони донишгоҳиаш пешвоз гирифта, ба як пойгоҳи ширкати хусусии ҳарбии ЧВК “Вагнер” ба сарзаминҳои ишғолшудаи Украина фиристодаанд ва эҳтимол меравад, ки “Дилшоди Красавчик” баъдан аз Украина ба ягон пойгоҳи дигари “Вагнер”, барои мисол, ба Беларус ё ягон кишвари Африқо интиқол дода шавад ё алакай шуда бошад. Чанд рӯз пеш хабар омад, ки як гуруҳи бузурги ҷангҷӯёни ЧВК “Вагнер” дар 60 мошин аз Русия вориди Беларус шудаанд.
Барои Муовини Ҳасан Асадуллозодаро дӯздидан ҳадди ақал 1000-нафар даркор, ки якдилона тарҳи дӯздиро ҳамоҳанг ва омода бикунанд, бо иштироки 5-6 нафар кор иҷро намешавад. Бинобар ин, тӯъмаи прокуратура рӯз аз рӯз меафзояд. Аз рӯзҳои аввал гуфта будам, ки интиқоми Ҳасан Асадуллозода интиқоме, ки дар 50-аср як бор рух медиҳад, хоҳад буд, чун Ҳасан кадри бисёр муҳимеро аз даст додааст, баъид нест, ки бонкашро муфлис эълон кунад. Таъсири ин ҳодиса ба ҷомеа ҳам мерасад, зеро минбаъд мақомот саркӯбро шаддиттар мекунад.