ДАР ШАҲРИ БОХТАР АЗ КИСАИ ЯК МАРДИ МАСТ 8 ҲАЗОР СОМОНИАШРО КАШИДА ГИРИФТААНД
Аз навори хабарҳои маркази матбуоти ВКД Тоҷикистон аз 12.07.2023
Боздошт гардидани ҷавони 25-сола бо ҷурми ғоратгарӣ
Ба ШВКД дар шаҳри Бохтар аризаи марди 37-солаи сокини ноҳияи Рӯдакӣ ворид гардидааст, ки 9-уми июли соли 2023, тахминан соати 01:40-дақиқа, ҳангоми дар кӯчаи Айнии шаҳри Бохтар дар ҳолати мастӣ қарор доштанаш шахси номаълум бо роҳи ошкоро аз ҷайбаш 8 ҳазор сомониашро тасарруф намуда, аз ҷойи ҳодиса ғайб задааст.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ҷавони 25-солаи сокини шаҳри мазкур бо гумони содир намудани ҷинояти ғоратгарӣ дастгир карда шуд.
Оид ба ин ҳодиса тафтишот идома дорад.
Ошкор гардидани ҷиноятҳои дуздӣ
Ба ШВКД-1 дар ноҳияи Фирдавсӣ аризаи марди 33-солаи сокини шаҳри Душанбе ворид гардидааст, ки 7-уми июли соли 2023, шахси номаълум бо роҳи пинҳонӣ вориди манзили истиқоматиаш шуда, аз онҷо 16 ҳазор сомониро дуздида аз ҷойи ҳодиса ғайб задааст.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия ноболиғи 16-солаи сокини шаҳри Душанбе ҳамчун гумонбар дар содир намудани ҷинояти дуздӣ дастгир карда шуд.
Инчунин, парвандаи ҷиноятӣ бо моддаи 244 қисми 2 Кодекси ҷиноятии Ҷумҳӯрии Тоҷикистон нисбати марди 41-солаи сокини ноҳияи Ҷ.Расулов оғоз карда шудааст.
Номбурда, 24-уми июни соли 2023, тахминан соати 10:00, аз бошишгоҳи саҳроии хоҷагии деҳқонии ба номи «Раҳмонқул-Бобо», воқеъ дар ҷамоати деҳоти Ғулакандоз, ки ба марди 41-солаи сокини ноҳияи мазкур тааллуқ дорад, 5 ҳазору 800 сомониро тасарруф намуда аз ҷойи ҳодиса ғайб задааст.
Оид ба ин ҳодисаҳо тафтишот идома дорад.
Ифшо гардидани кирдорҳои қаллобӣ
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 36-солаи сокини шаҳри Душанбе бо гумони содир намудани кирдори қаллобӣ дастгир карда шуд.
Номбурда, моҳи майи соли 2021 ба боварии марди 34-солаи сокини ноҳияи Шуғнон даромада, аз ӯ 1-адад автомобили тамғаи “Мерседес-Спринтер”-ро ба маблағи 115 ҳазор сомонӣ харидорӣ намуда, 27 ҳазор сомониашро дода, боқимонда 88 ҳазор сомониашро то ҳол барнагардонидааст.
Инчунин, дар натиҷаи баргузор намудани чорабиниҳои оперативӣ-ҷустуҷӯӣ аз ҷониби кормандони милитсия марди 61-солаи сокини ноҳияи Рудакӣ ҳамчун гумонбар дар содир намудани кирдори қаллобӣ дастгир карда шуд.
Номбурда, бо маслиҳати пешакӣ бо писараш марди 32-солаи сокини ҳамон ҷо бо роҳи фиреб ба боварии марди 35-солаи сокини шаҳри Панҷакент, даромада аз ӯ 550 ҳазор сомонӣ гирифта ваъда додаанд, ки дар муддати 45 шабонарӯз барояш 1-адад автомашинаи боркаши тамғаи «Ҷакман» соли бароришаш 2023-ро харидорӣ карда медиҳанд, аммо номбурдагон маблағҳои гирифтаашонро ба манфиати шахсии худ сарф кардаанд.
Аз рӯи ҳодисаҳои мазкур тафтишот идома дорад.