Раёсати корҳои дохилии вилояти Суғд дар барномаи телевизионии “Милитсия хабар медиҳад” сабтҳои видеоии мудҳишеро аз макони қатли ду зани фаррош дар Кумитаи замини ноҳияи Деваштич нашр кард ва гуфт, бар асоси натиҷаҳои тафтишоти муқаддамотӣ, корманди ин кумита Сабоҳиддин Мунавварзода он ду зани фаррошро барои тасодуфан шоҳиди сиёҳкориҳои ӯ шуданашон бераҳмона ба қатл расондааст.
Акбар Шарифӣ, сухангӯи милитсияи вилояти Суғд дар ин барнома гуфт, қатли ин ду зан фазои носолими корӣ ва рақобатҳои гуруҳӣ дар кумитаи замини ноҳияи Деваштичро рӯи об баровард.
Акбар Шарифӣ куштори ин ду зан дар таърихи 17 июли соли 2022-ро пурсарусадотарин ҳодисаи рӯзҳои охир нафақат барои Деваштич, балки барои вилояту ҷумҳурӣ номид ва гуфт, сару садои атрофи он мардумро ба таҳлукаи зиёд овард.
Ду сокини ҷамоати Ғазантарак Фозилова Мӯниса Раҳимовна, соли таваллудаш 1966, ва ҳамсари бародари ӯ Зокирова Умеда Қосимовна, соли тааллудаш 1977, вақте кушта шуданд, ки рӯзи якшанбе барои тоза кардани бинои кумитаи замин омаданд.Аввалин шуда аз кушта шудани онҳо посбони кумитаи замин Раҷаббой Олимов хабар ёфта, ба милитсия занг задааст.
Олимов дар ин барнома гуфт, вақте аз зинапояҳо баланд мешуд, ҷасади пур аз хунро дид, ки дар роҳрави қабати дуюми бино зери қолин пинҳон карда буданд. Ӯ гуфт, ҷасади дуюмро ҳанӯз нодида , бо шитоб ба милитсия занг зад. Ӯ гуфт, ба ҷуз аз дидани ҷасад ҳамчун бӯи сӯхторро ба машомаш мерасид.
Акбар Шарифӣ гуфт, дар натиҷаи тафтиш муайян карда шуд, ки фазои носолими корӣ дар кумитаи замин заминаро барои чунин оқибати фоҷиабор гузоштааст ва ду зани кушташуда қурбонии тасодуфӣ будаанд. Тавре маълум шудааст, мутахассиси пешбари кумитаи замин Мунавварзода Сабоҳиддин Ҷамолиддин, соли тааллудаш 1991, сокини ҷамоати Далёни боло, нисбат ба раис, муовин ва дигар кормандони ин кумита ба далели гӯё мамониати онҳо ба кори Мунавварзода қасд ва хусуматӣ шахсӣ доштааст. Он рӯзи наҳси 17 июл, Мунавварзода бехабар аз онки дар ин рӯзи истироҳати якшанбе фаррошон ҳам метавонанд ба кор биоянд, ба ҷои кор омада, бо мақсади тарс додан ва ба таҳлука андохтани онҳо даст ба ташкили далелҳои сунъии бадномкунанда зада, ҳамон рӯз бо истифода аз сӯзишвории дизелӣ утоқҳои кории раис ва муовини раиси кумитаро оташ задааст.
Ин кори ӯро тасодуфан Умеда Зокирова мебинад ва Мунавварзода аз тарси ин ки сирраш фош мешавад, ба қаровулхона раф та, корди хоҷагиро мегирад ва омада, Зокироваро бо чанд зарбаи корд зада, мекушад. Дар ин ҳангом Мӯниса Фозилова пайдо мешавад ва Мунавварзода боз ҳам аз тарси ин ки сирраш фош шуд, ин занро ҳам бо 13 зарбаи корд мекушад.
Аз Мӯниса Фозилова як писар ва аз Умеда Зокирова 3 духтари ноболиғ ятим монд.
Ҳоло ба зидди Сабоҳиддин Мунавварзода бар асоси моддаи 104 бо иттиҳоми куштани ду нафар парвандаи ҷиноятӣ кушодаанд. Ба ӯ то 25 соли зиндон ваё ҳабси умрбод таҳдид мекунад.
Кумитаҳои замин дар Тоҷикистони аҳолиаш рӯзафзун яке аз фасодзадатарин ниҳодҳо ба шумор мераванд. Ҳар моҳ чандин корманди ин ниҳод бо иттиҳоми гирифтани пора аз мардум дар ивази ҷудо карда додани қитъаи замин ваё дуруст кардани ҳуҷҷатҳои замин дастгир мешаванд.
ВКД Тоҷикистон ахиран хабар дод, ки дар нимаи аввали сол дар Тоҷикистон аз ҷумла 22 одамкушӣ ва сӯиқасд ба куштор ва 64 ҳолати қасдан расонидани зарари вазнин ба саломатӣ сабт шудааст. Дар нимаи аввали соли 2021 дар Тоҷикистон 20 куштор рух дода буд.