ДУ ҚАЛЛОБӢ: ЯКЕ 21 ҲАЗОР ДОЛЛАРРО 6 СОЛ БОЗ НАМЕДОД, ДУИ ДИГАР – 20 ҲАЗОРРО 10 СОЛ БОЗ
Маркази матбуоти ВКД Тоҷикистон рӯзи 10 феврал аз ошкор шудани боз ду ҳолати қаллобӣ хабар дод. Аз ҷумла ба ШВКД-1 дар ноҳияи Шоҳмансур бо ариза марди 66-солаи сокини пойтахт муроҷиат намудааст, ки 2-юми марти соли 2016 марди 38-солаи сокини шаҳри Душанбе, ки қаблан ҳам бар асоси моддаи 247 Кодекси ҷиноятии Ҷумҳурии Тоҷикистон барои қаллобӣ суд шудааст, бо роҳи фиреб ба бовариаш даромада, аз ӯ 21 ҳазор доллари амрикоӣ гирифта, то ҳол маблағашро барнагардонидааст.
Инчунин аз ҷониби кормандони ШВКД дар шаҳри Ваҳдат зимни гузаронидани чорабиниҳои оперативӣ-ҷустуҷӯӣ мардони 46 ва 58-солаи сокинони шаҳри мазкур бо гумони қаллобӣ дастгир карда шуданд. ВКД гуфт, номбурдагон соли 2012 бо роҳи фиреб ба боварии марди 66-солаи сокини ҳамин шаҳр даромада, аз ӯ 20 ҳазор доллари амрикоӣ гирифта, ӯро фиреб додаанд.
Нисбати номбурдагон аз тарафи Раёсати тафтишотии ВКД Ҷумҳурии Тоҷикистон бар асоси моддаи 247 қисми 4 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шуда, тафтишот идома дорад.
