116 ҲОЛАТИ ГИРИФТОРӢ БА КОРОНАВИРУС ДАР ТОҶИКИСТОН ДАР 4 РӮЗИ ОХИР
Вазорати тандурустии Тоҷикистон шоми 24 январ хабар дод, ки дар як шабонарӯзи охир дар кишвар боз 31 ҳолати нави гирифторшавии шаҳрвандон ба коронавируси нави навъи COVID-19 сабт шудааст. Ин вазорат , ки аз 20 ноябр ба ин тараф ягон ҳолати нави коронавирусро тасдиқ намекард, дар чор рӯзи охир алакай дар бораи 116 мавриди нави сирояти коронавирус хабар дод.
Бо тасдиқи ин 116 ҳолати нави гирифтории шаҳрвандон ба коронавирус дар чор рӯзи охир шумораи расмии гирифторшудагон ба ин вирус аз оғози пандемия то шоми 24 январ дар Тоҷикистон, бар асоси омори расмии вазорати тандурустӣ, ба 17 ҳазору 211 нафар расид. Вазорат то имрӯз марги 124 нафарро ба иллати коронавирус расман тасдиқ кардааст.
Вале бисёриҳо бар инанд, ки шумори воқеии гирифторшудагон ва қурбониёни коронавирус дар Тоҷикистон хеле бештар аз ин омори расмист.
Эътирофи мавҷи нави коронавирус дар Тоҷикистон дар ҳолест, ки дар ин авохир ҳазорон нафар аз сокинони Тоҷикистон ва аксар бо тамоми аҳли оилаҳояшон гирифтори бемории сармохӯрдагии ғайриоддие шуданд. Табибон ин бемориро “зуком ё гриппи мавсимӣ” мегуфтанд, вале натиҷаҳои ташхиси даҳҳо нафаре, ки ба озмоишгоҳҳои хусусӣ муроҷиат карданд, нишон дод, ки онҳо гирифтори коронавирус шудаанд.
Рӯзи 20 январ дар ҷаласаи солонаи ҳукумати Тоҷикистон президент Эмомалӣ Раҳмон низ ба тундӣ аз вазорати тандурустӣ барои пинҳон кардани маълумоти воқеӣ дар бораи коронавирус интиқод кард ва аз ҷумла хитоб ба вазири тандурустӣ Ҷамолиддин Абдулллозода гуфт: “Мо киро фиреб дода истодаем? Мо худамонро фиреб дода истодаем!”
Гуфта мешавад, ки маҳз баъди интиқоди президент вазорати тандурустӣ маҷбур шуд, ки ҳолатҳои нави гирифторӣ ба коронавирусро эътироф ва нашр кунад. Ин вазорат аз 13 сентябри соли 2021 сиёсати гӯё “ба нестӣ расидани коронавирус дар Тоҷикистон”ро пеш гирифта, дар ин байн ҳамагӣ 5 мавриди нави сирояти ин бемориро тасдиқ карду тамом. Бори охир ин вазорат аз ошкор шудани ҳолатҳои нави коронавирус дар кишвар 20 ноябр хабар дода буд.