ДУЗДИИ ПУЛУ ТЕЛЕФОН ДАР ҲИСОР ВА ОШКОР ШУДАНИ ДУ ҚАЛЛОБӢ ДАР ПАНҶАКЕНТ
Аз навори хабарҳои маркази матбуоти ВКД Тоҷикистон аз 12.04.2023
Боздошт гардидани марди 31-сола бо гумони дуздии телефони мобилӣ ва маблағи пулӣ
Ба ШВКД дар шаҳри Ҳисор аризаи марди 27-солаи сокини шаҳри мазкур ворид гардидааст, ки 5-уми апрели соли 2023, шахси номаълум бо роҳи пинҳонӣ аз дохили воситаи нақлиёташ тамғаи “Мерседес спринтер”, ки дар дохили бозори марказӣ беназорат меистод, як адад телефони мобилии тамғаи “Самсунг а-12” ва 10 ҳазор сомониашро дуздида, аз ҷойи ҳодиса ғайб задааст.
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия марди 31-солаи сокини ҳамин шаҳр бо гумони содир намудани ҷинояти дуздӣ дастгир карда шуд.
Аз рӯи ҳодисаи мазкур тафтишот идома дорад.
Оғоз гардидани парвандаи ҷиноятӣ нисбати ду нафар бо ҷурми қаллобӣ
Парвандаи ҷиноятӣ бо моддаи 247 қисми 3 Кодекси ҷиноятии Ҷумҳурии Тоҷикистон нисбати марди 49-солаи сокини шаҳри Панҷакент оғоз карда шудааст.
Номбурда, моҳи сентябри соли 2021 бо роҳи фиреб ба боварии марди 50-солаи сокини шаҳри мазкур даромада, аз ӯ 75 ҳазор сомонӣ гирифта, то ҳол маблағашро барнагардонидааст.
Инчунин, парвандаи ҷиноятӣ бо моддаи 247 қисми 4 Кодекси ҷиноятии Ҷумҳурии Тоҷикистон нисбати марди 42-солаи сокини шаҳри Панҷакент, оғоз карда шудааст.
Номбурда, моҳи ноябри соли 2021 бо роҳи фиреб ба боварии марди 47-солаи сокини ҳамин шаҳр даромада, аз ӯ 43 ҳазор сомонӣ гирифта, то ҳол маблағашро барнагардонидааст.
Оид ба ин ҳодисаҳо тафтишот идома дорад.