ВидеоМинтақа ва ҷаҳонЧеҳраҳо

ЗОДАИ ТОҶИКИСТОН СӮҲРОБ ҲОҶИМАТОВ БА ЯК МАНСАБИ БАЛАНД ДАР СОЗМОНИ МИЛАЛ ТАЪЙИН ШУД

Хадамоти матбуоти Барномаи рушди Созмони Милали Муттаҳид (ПРООН, UNDP)   рӯзи 14 августи соли 2022 хабар дод, ки зодаи Тоҷикистон Сӯҳроб Ҳоҷиматов  ба мансаби муовини Намояндаи доимии Барномаи рушди Созмони Милал дар Қазоқистон, аз лиҳози масоҳат бузургтарин ва аз лиҳози зарфиятҳои иқтисодӣ қавитарин кишвари Осиёи Марказӣ, таъйин шудааст. Солҳои охир Ҳоҷиматов муовини раиси дафтари ин созмон дар Туркия ва роҳбари Барномаи рушди Созмони Милал дар Озарбойҷон буд.

Сӯҳроб Ҳоҷиматов беш аз 25 сол таҷрибаи кор дар масоили рушд ва раҳбарии лоиҳаҳо дар созмонҳои байналмилалӣ, муассисаҳои давлатӣ ва дар бахши хусусиро дорад.

Сӯҳроб Ҳоҷиматов риштаи ҳуқуқшиносии Донишгоҳи миллии Тоҷикистон  хатм карда, баъдан  дар Донишгоҳи умумирусиягии адлия дар шаҳри Маскав ва коллеҷи миллии додгоҳии Невадаи Амрико таҳсил кардааст.

Ӯ собиқаи кориашро ба ҳайси муфаттиш дар Додситонии кулли Тоҷикистон оғоз кард, вале хеле зуд ба созмонҳои байналмилалӣ гузашт  – Сӯҳроб Ҳоҷиматов чандин сол дар мақомҳои раҳбарӣ дар тарҳҳои USAID (Агентии рушди байналмилалии Амрико) оид ба рушди ҳуқуқию иқтисодӣ дар Тоҷикистон кор кард ва сипас ба  ПРООН – Барномаи рушди Созмони Милал гузашт.

Ҳоҷиматов аз ҷумла солҳои 2006-2013  дар қароргоҳи марказии ПРООН дар шаҳри Ню-Йорки Амрико ва дафтари ин созмон дар Тоҷикистон кор кардааст.

Солҳои 2013-2017  ин зодаи Тоҷикистон муовини мудири Барномаи рушди Созмони Милал  дар Сомали ва мудири дафтари пуштибонии ПРООН дар Сомали бо қароргоҳаш дар шаҳри Найроби, пойтахти Кения буд. Солҳои 2017 – 2022 Сӯҳроб Ҳоҷиматов  ба ҳайси муовини Намояндаи доимии Барномаи рушди Созмони Милал дар Туркия ва Намояндаи доимии ин созмон дар Озарбойҷон кор карда, инак ба мақоми муовини Намояндаи доимии ПРООН дар Қазоқистон, бузургтарин кишвари Осиёи Марказӣ расид.

Барномаи рушди Созмони Милал яке аз бузургтарин муассисаҳои Милали Муттаҳид ба шумор рафта, дар Қазоқистон лоиҳаҳои марбут ба ислоҳоти низоми идораи давлатӣ, ҳифзи иҷтимоӣ, ҳифзи муҳити зист ва мубориза бо тағйири иқлим, самаранокии низоми энергетикӣ ва тақвияти иқтисоди рақамиро маблағгузорӣ мекунад ва ба ие васила аз ҳукумати Қазоқистон дар роҳи иҷрои барномаҳои афзалиятноки рушди миллиаш пуштибонӣ мекунад.

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

One Comment

  1. Ин нишон медиҳад, ки тоҷику тоҷикистонӣ аз партугалӣ ё фаронсавӣ ҳеч камӣ надорад. (Мо худро кам нишон медиҳем). Дуъо мекунем, ки Муншии умумии ССМ интихоб шавад, омин!

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд!

Back to top button