ТОҶИКИСТОНУ УЗБЕКИСТОНРО ЗАМИНЛАРЗАИ 5,4-БАЛЛӢ ТАКОН ДОД
Марказҳои байналмилалии зилзиланигорӣ хабар доданд, ки рӯзи 12 майи соли 2022, соати 15:27 ба вақти маҳаллӣ дар Тоҷикистону Ӯзбекистон заминларзаи сахт рух дод. Бино ба хабарҳо, замин дар умқи 10 километр ларзида, шиддати заминларза дар марказаш – 26-километрии ҷанубуғарби шаҳри Бойсун, маркази ноҳияи Бойсуни вилояти Сурхондарёи Ӯзбекистон, тибқи ҷадвали Рихтер, 5,4 баллро ташкил додааст, вале чӣ гуна ларзидани заминро сокинон дар бисёре аз шаҳрҳои Тоҷикистон низ эҳсос кардаанд. Дар бораи кадом талафоту хисорот бар асари ин офати табиӣ то ҳол гузориш нашудааст.
Тоҷикистон дар як минтақаи зилзилахези қораи Осиё ҷойгир шуда, ҳар сол дар қаламраваш садҳо заминҷунбӣ сабт мешавад. Аз ҷумла марказҳои зилзиланигорӣ танҳо дар як ҳафтаи охир дар қаламрави Тоҷикистон 5 заминларзаи шиддаташ тибқи ҷадвали Рихтер аз 1,5 балл зиёд, дар як моҳи охир 16 чунин заминларза ва дар як соли охир 214 заминларзаро сабт кардаанд.
Ёдовар мешавем, 10 июли соли 2021 бар асари заминларза дар водии Рашт 5 сокини ноҳияи Тоҷикобод ба ҳалокат расида, дар ин ноҳия ва ноҳияи Рашт беш аз 200 хона хароб шуданд.