АКС АЗ ҶОИ ҲОДИСА: ҶАСАДИ ШАҲНОЗАРО АЗ ДАРЁИ ДУШАНБЕ ПАЙДО КАРДААНД
РВКД Душанбе хабар дод, ки санаи 1-уми июни соли 2022, тақрибан соати 16:00 аз соҳили дарёи Душанбе, дар кӯчаи Ҳ.Шерозӣ, дар наздикии Маркази барқугармидиҳии Душанбе-2 ҷасади як духтари ҷавон бе аломатҳои марги маҷбурӣ ёфта шудааст. Зимни санҷиш муайян гардидааст, ки ин ҷасади шаҳрванд Ғаффорова Шаҳноза Маҳмадшоевна, соли таваллудаш 05.08.2000, истиқоматкунандаи шаҳри Душанбе, ноҳияи Сино, кӯчаи Зарафшон мебошад.
Бино ба иттилои милитсияи пойтахт, Шаҳноза Ғаффорова санаи 26-уми майи соли ҷорӣ аз беэҳтиётӣ ба дарёи Варзоб ғарқ шуда, то ба ин рӯз аз ҷониби кормандони милитсия ва Кумитаи ҳолатҳои фавқулодда мавриди ҷустуҷӯ қарор дошт.
Дар ду рӯзи охир ин алакай дуюмин ҷасад аст, ки аз дарёи Душанбе пайдо мекунанд.
Кумитаи ҳолатҳои фавқулоддаи Тоҷикистон қаблан хабар дод, ки субҳи рӯзи 31-уми майи соли 2022 навбатдори шуъбаи корҳои дохилии ноҳияи Исмоили Сомонӣ ба қисми навбатдории Кумитаи ҳолатҳои фавқулодда аз намудор шудани ҷасаде дар соҳили рӯди Душанбе, дар шафати боғи фарҳанг ва истироҳати ба номи Умари Хайём хабар дод. Ин боғ дар назди бинои Донишгоҳи миллӣ, дар маҳаллаи маъруф ба “Ҷазира” ҷойгир шудааст.
Бо дарёфти хабар дастаи зудамали Раёсати КҲФ дар шаҳри Душанбе ба ҷойи ҳодиса равон шуд. Наҷотбахшон ҷасадро бо истифода аз таҷҳизоти махсуси наҷот аз поён ба боло бароварданд ва ба мақомоти ҳифзи ҳуқуқ супурданд.
КҲФ гуфт, ин ҷасади марде буд, ки ба зоҳир 45-50 сола менмуд, вале шахсияташро ҳанӯз муайян накардаанд. Дар иттилоия гуфтам мешавад, ки мақомоти ҳифзи ҳуқуқ барои муайян кардани шахсияти фавтида ва сабабҳои маргаш тафтишот оғоз кардаанд.
КҲФ ахиран хабар дод, ки аз аввали сол дар кӯлу дарёҳои Тоҷикистон ҳудуди 30 нафар ҷон бохтаанд. Соли 2021 дар Тоҷикистон 155 нафар, аз ҷумла 75 ноболиғ ғарқ шуда буд.
