ОШКОР ШУДАНИ ДУ ҲОЛАТИ ҚАЛЛОБӢ БА МАБЛАҒИ ҚАРИБ 2 МЛН РУБЛ ВА 325 ҲАЗОР СОМОНӢ
Маркази матбуоти ВКД Тоҷикистон рӯзи 26 октябри соли 2022 аз ошкор шудани ду ҳолати қаллобӣ: яке ба маблағи қариб 2 миллион рубли русӣ ва дуюмӣ ба маблағи 325 ҳазор сомонӣ, ё беш аз 30 ҳазор доллар хабар дод.
Бино ба иттилои ВКД, ба ШВКД-2 дар ноҳияи Фирдавсӣ бо ариза марди 28-солаи сокини ноҳияи Рӯдакӣ муроҷиат намудааст, ки соли 2022 марди 33-солаи сокини пойтахт бо роҳи фиреб ба бовариаш даромада, аз ӯ 1 миллиону 870 ҳазор рубли русиро гирифта ваъда додааст, ки дар муддати 2 шабонарӯз онҳоро бармегардонад. Аммо ин сокини пойтахт ваъдаашро иҷро накарда, то ҳол маблағҳои зикргардидаро барнагардонидааст.
Ҳамчунин, нисбат ба марди 33-солаи сокини шаҳри Хуҷанд аз тарафи кормандони ШВКД дар ноҳияи Б.Ғафуров парвандаи ҷиноятӣ бо моддаи 247 қисми 4 Кодекси ҷиноятии Ҷумҳурии Тоҷикистон оғоз карда шудааст.
Чунончи ӯ соли 2021, бо роҳи фиреб ба боварии марди 35-солаи сокини ҳамин ноҳия даромада, бо ваъдаи таъмини сохтмони бинои баландошёна бо масолеҳи сохтмонӣ аз ӯ дар умум 325 ҳазор сомонӣ пул гирифта, маблағашро то ҳол барнагардонидааст.
Аз рӯи ин ҳолатҳо тафтишот идома дорад.