ЯК ҶАВОНИ ТОҶИКРО ДАР ПЕТЕРБУРГ БАРҚ ЗАДААСТ. ӮРО БО 60% БАДАНИ СӮХТА ХОБОНДААНД
Рӯзи 8 август дар ноҳияи Виборги шаҳри Санкт-Петербурги Русия дар кӯчаи Курчатов як шаҳрванди 27-солаи Тоҷикистонро ҳангоми кор бо хатҳои барқ нирӯи барқ задааст. Дар ин бора ба хабаргузории «Невские новости» як манбаъ дар мақомоти ҳолатҳои фавқулодда хабар дод.
Бино ба иттилои нашрия, шаҳрванди Тоҷикистонро дар Пажуҳишгоҳи “Ёрии таъҷилӣ” ба номи Ҷанелидзе бистарӣ кардаанд. Табибон ташхис додаанд, ки 60% бадани муҳоҷири тоҷик захми сӯхтании дараҷаи 3 гирифтааст. Вазъи саломатии ӯ вазнин арзёбӣ мешавад. Ҷавони тоҷикро дар шуъбаи реаниматсияи беморони сӯхтагӣ хобондаанд.
Исми шаҳрванди Тоҷикистон ва корхонае, ки ӯ онҷо дучори чунин фалокат шудааст, гуфта нашудааст.
Пажуҳишгоҳи “Ёрии таъҷилӣ” дар Санкт-Петербург ба шарафи табиби машҳур Иусти́н Ивлиа́нович Ҷанели́дзе номгузорӣ шудааст. Ҷанелидзе 20 июл (1 август) –и соли 1883 дар деҳаи Самтредиа дар вилояти Кутаиси (ҳоло – қаламрави Гурҷистон) ба дунё омада, 14 январи соли 1950 дар Ленинград (ҳоло- Санкт-Петербург) вафот кардааст. Ҷанелидзе — ҷарроҳ ва олими машҳур, Қаҳрамони меҳнати сотсиалистӣ, академики Академияи илмҳои тиббии СССР, генерал-лейтенанти хадамоти тиббии артиши Шӯравӣ буд.