БАРКАНОРИИ МУОВИНОНИ ДОДСИТОНИ КУЛ, РАҲБАРИ АГЕНТИИ ЗИДДИ НАШЪА ВА РАИСОНИ 6 НОҲИЯ, АЗ ҶУМЛА 5 НОҲИЯИ БАДАХШОН

28/01/2024

1 165 5 дақиқа хондан

Муовинони ҳозира ва барканоршудаи додситони кул. Коллажи радиои зану шӯ Аюбовҳо

Президенти Тоҷикистон Эмомалӣ Раҳмон рӯзи 27 январи соли 2024 дар идомаи тағйироти кадрӣ дар саффи ҳукуматаш муовинони Додситони кул, раҳбари Агентии мубориза бо маводи мухаддир ва раисони 6 ноҳия, аз ҷумла 5 ноҳияи вилояти мухтори Кӯҳистони Бадахшонро иваз кард.

Президент рӯзи 27 январ аз ҷумла бо як фармони худ Воҳидзода Ҳабибулло Сайдулло “бо сабаби ба кори дигар гузаштан” аз вазифаи директори Агентии назорати маводи нашъаовари Тоҷикистон озод карда, бо фармони дигари худ билофосила Самад Зафар Тағойро раҳбари ин идора таъйин кард. Зафар Самад то имрӯз муовини аввали раиси ин агентӣ буд.

Рӯзи 27 январ бо қарори ҳукумат Раҳмонзода Саиднахш Ҳаким низ “бо сабаби ба кори дигар гузаштан” аз вазифаи муовини вазири корҳои дохилии Тоҷикистон озод карда шуд. Сабаби барканорӣ ва ба кадом кори дигар гузаштани ӯ маълум нест. Аммо Ҳабибулло Воҳидзода, ки қаблан дар низоми додситонӣ (прокуратура) кор мекард, боз ба ин ниҳод баргашта, бино ба хабарҳо, муовини додситони кул – додситони ҳарбии Тоҷикистон пешбарӣ шудааст. Ҳамчунин Умед Каримзода ва Сарвар Азимзода ба мақомҳои муовини аввал ва муовини додситони кул пешбарӣ шудаанд. Номзадии муовинони додситони кулро Маҷлиси миллӣ бояд тасдиқ кунад.

Ҳамин тавр рӯзи 27 январ бо фармони президент Абдураҳмонзода Саидбурҳон Саидраҳмон бо сабаби ба нафақа баромадан аз вазифаи раиси ноҳияи Дарвоз озод карда шуда,ба ҷои ӯ Носирзода Умедҷон Саидҷон иҷрокунандаи вазифаи раиси ноҳияи Дарвоз таъйин шуд.

Ҷумъазода Ҷумъа Шофақир “бо сабаби ба кори дигар гузаштан” аз вазифаи раиси ноҳияи Шуғнон барканор шуда, ба ҷои ӯ раҳбарии ноҳияи Шуғнонро ба Шоисматуллозода Комил супурдаанд.

Додихудоев Фарух Муборакшоевичро, ки низ “бо сабаби ба кори дигар гузаштан” аз вазифаи раиси ноҳияи Рӯшон рафт, дар роҳбарии ин ноҳия Аҳмадзода Илҳом Шамол иваз кард. Илҳом Аҳмадзода то имрӯз раиси ноҳияи Хуросон буд.

Ҳамчунин Мирзозода Мусо Одинамухамадро дар мақоми раиси ноҳияи Ишкошим Иматшозода Анвар Иматшо иваз кард ва ба ҷои Шомирзозода Аъзам Мирмамад, ки низ “бо сабаби ба кори дигар гузаштан” тарки мақоми раиси ноҳияи Роштқалъа кард, рӯзи 27 январ Сафарзода Лашкар Аслам иҷрокунандаи вазифаи раиси ноҳияи Роштқалъа таъйин карда шуд. Лашкар Сафарзода то имрӯз муовини сардори раёсати кишоварзӣ ва ҳифзи муҳити зисти Дастгоҳи иҷроияи президенти Тоҷикистон буд. Сабаби барканории раисони 5 ноҳия аз 7 ноҳияи вилояти мухтори Кӯҳистони Бадахшон ва ба кадом вазифаи дигар гузаштани 4 нафари онҳо, ки барканориашон ҳамчун “бо сабаби ба кори дигар гузаштан” таъбир шуда буд, маълум нест. Аз ин миён танҳо сарнавишти баъдии раиси ҳамакнун собиқи ноҳияи Дарвоз Саидбурҳон Абдураҳмонзода маълум аст, ки ба нафақа фиристода шудааст.

ФАРМОНИ
ПРЕЗИДЕНТИ ҶУМҲУРИИ ТОҶИКИСТОН

Дар бораи аз вазифаи директори Агентии назорати маводи
нашъаовари назди Президенти Ҷумҳурии Тоҷикистон
озод кардани Воҳидзода Ҳ.С.

Мутобиқи моддаи 69 Конститутсияи Ҷумҳурии Тоҷикистон фармон медиҳам:

Воҳидзода Ҳабибулло Сайдулло бо сабаби ба кори дигар гузаштан аз вазифаи директори Агентии назорати маводи нашъаовари назди Президенти Ҷумҳурии Тоҷикистон озод карда шавад.