ДОСТОНИ МАРДИКОРЕ, КИ 21 КИЛОМЕТРРО ПОИ ЛУЧ ДАВИД (ВИДЕО)
Мардикор пойи луч марафонро давида, ба кор даъват шуд
1Муаллиф: Сайфиддин Қараев, Asia-Plus
Ӯ масофаи 21 километру 97 метрро пурра бидуни пойафзол тай кард.
Далер Раҳимов
Дар ниммарафони анъанавии Душанбе, ки ба ифтихори Рӯзи пойтахт 16 апрел гузаронида шуд, сокини Ҳисор Далер Раҳимови 34-сола, ки ба мардикорӣ машғул аст, 21 километру 97 метр масофаи ниммарафонро тай намуда, дар ҳамин ҳол, дар моҳи шарифи Рамазон рӯзадор ҳам буд.
Ӯ на сарулибоси варзишӣ дошту на пойафзол ва тамоми масофаро пойи луч тай кард, ҳарчанд баъдан худаш изҳор намуд, ки бо пойи луч давидан барои ӯ бароҳаттар аст ва имкон ҳам дорад, ки пойафзоли муносиб барои худ харад.
Дар Раёсати кор бо ҷавонон ва варзиши шаҳрдории Душанбе ба Далер ваъда доданд, ба ӯ маҷмӯи сарулибос ва пойафзоли варзишӣ таҳфа карда, расман ба кор қабул мекунанд.
Далер дар як сохтмони хусусӣ кор карда, чоҳи таҳкурсӣ меканад.
“Дар маҳалҳои сераҳолӣ чунин мешавад, ки мошинҳои калон гузашта наметавонанд. Дар инҳо одатан одамонро барои кофтани чоҳ барои таҳкурсии хонаи оянда киро мекунанд, – мегӯяд Далер. —Дар ҳама ҷо замин нарм нест. Махсусан, дар Ҳисор аксар вақт санглох буда, лозим меояд, ки дар давоми якчанд рӯз бо белу чок чуқурии зарурӣ кофта шавад”.
Лекин, ба қавли вай, дигар илоҷ нест – лозим меояд, ки бо кори вазнини ҷисмонӣ машғул шавад, то ки рӯзгори оилаашро таъмин кунад.
“Ду духтар дорам ва калониаш мактаб мехонад. Оиларо бо ҳама чизи зарурӣ таъмин кардан лозим аст, то ки кӯдакон ба хӯроку сарулибос эҳтиёҷ надошта бошанд”, – мегӯяд ӯ.
Номбурда зикр кард, ки вақте ки фармоиши кофтани чоҳи таҳкурсӣ нест, ӯ ба аробакашӣ дар бозор машғул шуда, борҳои вазнин, аз қабили 4-5 халта ордро аз бозор то нонвойхона мекашонад. Инчунин ба аробааш молу маҳсулоти гуногун гирифта, онҳоро дар ҷойи серодам мефурӯшад.
Айни замон ӯ ба сифати боғбон дар расадхона (обсерватория)-и маҳаллӣ ба кор машғул аст.
Ба ӯ дар Кумитаи варзиш ҳам кор ваъда карданд, лекин маълумот надорад. Аз ин рӯ, онҳо барояш кори муносиб меҷӯянд, то ки дар оянда ба давидан ҳам машғул шуда тавонад, зеро нишондиҳандаҳои ҷисмониаш имкон медиҳанд, ки дар мусобиқаҳои давидан ба масофаҳои дур иштирок кунад.
“Пас аз иштирок дар ниммарафон маро ба Кумитаи варзиш ба Душанбе даъват карданд. Дар пойтахт бо намояндаи Кумитаи варзиш вохӯрда, ӯ кор ёфтанро ваъда дод, – мегӯяд Далер. – Ҳоло боз ба кофтани таҳкурсии бино меравам”.
Манбаъ: Азия Плюс
Аспи този шуда маҷрӯҳ ба зери долон,
Тақви заррин ҳама бар гардани хар мебинам.