ҲАЛОКАТИ ПИРАМАРД ДАР ЗЕРИ ЧАРХИ МОШИНИ РАҲГУЗАР ДАР ИСТАРАВШАН ВА ОҒОЗИ АМАЛИЁТИ “НЕЛЕГАЛ-2023” ДАР ХАТЛОН
Аз навори хабарҳои маркази матбуоти ВКД Тоҷикистон аз 20.06.2023
Ба ҳалокат расидани марди солхӯрда дар натиҷаи ҳодисаи нохуши нақлиётӣ
18-уми июни соли 2023, тахминан соати 16:00, ронандаи автомашинаи тамғаи «ДЭУ-Лабо», Камолзода Ҳусейн, соли таваллудаш 1990, сокини шаҳри Истаравшан, ҳангоми ҳаракат кардан дар хиёбони Истиқлоли ҳамин шаҳр, дар рӯ ба рӯи бозори қисмҳои эҳтиётӣ бехатарии ҳаракати роҳро таъмин карда натавониста, пиёдагард, Пардаев Ҳасан, соли таваллудаш 1952, сокини шаҳри мазкурро пахш намудааст. Дар натиҷа, пиёдагард, Пардаев Ҳ. ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст.
Оид ба ин ҳодиса таҳқиқот идома дорад.
БАРОИ МАЪЛУМОТ
Роҳҳои Тоҷикистон аз лиҳози садамаҳо пурхатар ба шумор мераванд. Танҳо дар моҳи майи соли ҷорӣ, бино ба ҳисобҳо, бар асари садамаҳо дар рорҳои ҷумҳурӣ то 40 нафар ба ҳалокат расида, аз аввали моҳи июн дар бораи дар садамаҳо ҷон бохтани алакай беш аз 20 нафари дигар хабарҳо ба даст расидаанд. Бино ба омори ВКД, соли 2022 бар асари 1096 садама дар роҳҳои ҷумҳурӣ 416 нафар ба ҳалокат расида, 1197 тани дигар маҷруҳ шуданд. Соли 2021 бошад дар роҳҳои Тоҷикистон дар натиҷаи 1102 садама 395 нафар ҷон бохта, 1217 тани дигар ҷароҳат бардоштанд. Мутаассифона, садҳо нафар аз ин қурбониёни садамаҳо дар роҳҳои Тоҷикистон кӯдакону наврасонанд.
Оғози амалиёти “Нелегал- 2023” дар вилояти Хатлон
Мутобиқи Нақшаи гузаронидани амалиёти минтақавии Созмони Аҳдномаи амнияти дастҷамъии СААД оид ба муқовимат бо муҳоҷирати ғайриқонунии “Нелегал-2023”, ки аз 15 апрели соли 2023 тасдиқ шудааст, дар ҳудуди давлатҳои аъзои СААД амалиёти минтақавии “Нелегал-2023”, дар ду марҳила гузаронида мешавад.
Марҳилаи якуми амалиёт бо номи “Нелегал-Трафик” аз 19 то 25 июни соли 2023 ва марҳилаи дуюм бо номи “Нелегал-Кордон” аз 2 то 8 октябри соли 2023.
Амалиёти мазкур бо ҷалби қувва ва ҳайати шахсии сохторҳои масъули Раёсати ВКД, КДАМ Ҷумурии Ҷумҳурии Тоҷикистон дар вилояти Хатлон ва Хадамоти муҳоҷират ва шуғли аҳолӣ дар вилояти Хатлон гузаронида мешавад.
Вазифаҳои асосии амалиёти мазкур, санҷиши тартиби риояи буду боши шаҳрвандони хориҷӣ ва шахсони бешаҳрванд, дар фурудгоҳҳо, истгоҳҳои роҳи оҳан, манзилҳои истиқоматӣ, меҳмонхонаҳо, хобгоҳҳо ва иншоотҳои корӣ, ошкор намудани шаҳрвандони хориҷӣ ва шахсони бешаҳрванде, ки бе раводид, бе қайди шиноснома дар мақомоти корҳои дохилӣ, бе иҷозат барои кор ва шиносномаҳои беэътибор дар Ҷумҳурии Тоҷикистон буду бош ва фаъолияти меҳнатӣ доранд, иборат мебошад.
Амалиёти “Нелегал-2023” айни замон дар шаҳру ноҳияҳои вилояти Хатлон идома дорад.
Офоқ Қодириён, полковники милитсия