Шаҳрдори Душанбе Рустами Эмомалӣ рӯзи 14 ноябри соли 2022 Шавкат Раҳимов, дастпарвари МД “Мактаби махсуси варзишии захираҳои олимпии №9 оид ба бокс”-и шаҳри Душанберо, ки ахиран сазовори камарбанди қаҳрамони ҷаҳон тибқи фарзияи IBF (Федератсияи байналмилалии бокс) ва нахустин қаҳрамони ҷаҳон аз Тоҷикистон дар бокси касбӣ шуд, шахсан ба ҳузур пазируфт ва ба ӯ ҳамчун нишони қадрдонӣ калиди хонаи дуҳуҷрагиро дар пойтахт супурд. Рустами Эмомалӣ ахиран бо судури як қарор ба Шавкат Раҳимов барои ноил шуданаш ба мақоми қаҳрамони бокси ҷаҳон дар пойтахт хонаи дуҳуҷрагӣ тақдим кард. Хадамоти матбуоти шаҳрдории Душанбе гуфт, Рустами Эмомалӣ Шавкат Раҳимовро барои сазовор шудан ба мақоми қаҳрамони ҷаҳон табрик гуфта, ба ӯ дар мусобиқаҳои оянда барору музаффарият таманно кардааст.
Шавкат Раҳимов, ки 14 августи соли 1994 дар шаҳри Қӯрғонтеппа (ҳоло Бохтар) дар ҷануби Тоҷикистон ба дунё омадааст, дар толори “Архангел Михаил” дар шаҳри Екатеринбурги Русия машқ мекунад. Шавкатҷон Шокирович Раҳимов се карат қаҳрамони бокси Тоҷикистон буда, соли 2017 тибқи фарзияи IBO, як созмони дигари байналмилалии бокс низ унвони қаҳрамони ҷаҳонро ба даст оварда буд ва то соли 2019 унвони қаҳрамониро пеши худ нигоҳ дошта буд.
Шавкат Раҳимов санаи 5 ноябр дар шаҳри Абу Забӣ, пойтахти Имороти Муттаҳидаи Араб, дар раунди нуҳум муштзани бритониёӣ Зелфа Барреттро ба нокаут фиристод ва бори нахуст дар таърихи бокси касбии тоҷик соҳиби унвони IBF гардид. IBF яке аз бузургтарин созмонҳои бокси касбӣ дар ҷаҳон дониста шуда, соли 1983 дар Амрико таъсис ёфтааст. Дар гузашта муштзанҳои машҳури дунё, аз қабили Ҷорҷ Форман, Эвандер Ҳолифирд, Майк Тайсон, Владимир Кличко сазовори унвони қаҳрамони ҷаҳон тибқи фарзияи IBF шудаанд.
Дар ду моҳи охир Шавкат Раҳимов инак сеюмин варзишгари тоҷик аст, ки Рустами Эмомалӣ ба онҳо барои пирӯзӣ дар мусобиқаҳои муътабари байналмилалӣ дар пойтахт хона туҳфа мекунад.
Ӯ дар аввали моҳи сентябри соли 2022 ба паҳлавони ҷавони тоҷик Нуралии Эмомалӣ барои пирӯзиаш дар чемпионати ҷаҳон оид ба гуштини дзюдо дар байни ҷавонон дар Душанбе як хонаи нави дуҳуҷрагӣ бо тамоми шароити рӯзгор туҳфа карда буд.
Ҳамин тавр, рӯзи 7 ноябр Рустами Эмомалӣ ба Темур Раҳимов – паҳлавони шинохта ва узви яккачини дастаи мунтахаби Ҷумҳурии Тоҷикистон, дастпарвари “Мактаби ҷумҳуриявии маҳорати олии варзишӣ оид ба намудҳои гуштин”, барои гирифтани ҷои якум ва ба даст овардани медали тилло дар мусобиқаи “Тоскулоҳи бузурги Боку 2022” (“Baku Grand Slam 2022”) хонаи дуҳуҷрагӣ дар пойтахт бо тамоми шароити рӯзгор ва ба Муллораҷаб Халифаев – дастпарвари “Мактаби махсуси варзишии захираҳои олимпии №6 оид ба намудҳои гӯштин”-и шаҳри Душанбе барои ҷои дуюм ва гирифтани медали нуқраи ҳамин мусобиқа 100 000 сомонӣ тақдим кард.
Рӯзи 11 ноябр шаҳрдори Душанбе Темур Раҳимов ва Муллораҷаб Халифаевро баъди бозгашташон ба Ватан шахсан ба ҳузур пазируфт ва онҳоро барои ноил гардидан ба медалҳои тилло ва нуқра дар мусобиқаи Тоскулоҳи бузурги Боку 2022 «Baku Grand Slam 2022» ва парафшон кардани парчами Тоҷикистон табрик гуфта, туҳфаҳои эълоншударо ба онҳо супурд.
Хотиррасон менамоем, ки рӯзҳои 04 то 06 ноябри соли ҷорӣ дар шаҳри Бокуи Озарбойҷон мусобиқаи Тоскулоҳи бузурги Боку 2022 «Baku Grand Slam 2022» оид ба гуштини ҷудо баргузор гардид, ки дар он варзишгарони зиёда аз 60 давлати ҷаҳон иштирок намуданд. Дар ин мусобиқаи бонуфузи сатҳи олӣ, варзишгарони тоҷик Темур Раҳимов медали тилло ва Муллораҷаб Халифаев медали нуқраро соҳиб гардиданд.
Бино ба иттилои шаҳрдорӣ, раиси шаҳри Душанбе ба варзишгарон барору комёбӣ таманно карда гуфтааст, ки ҷавонони бо нангу номус муаррифгар ва номбардори ватани хеш маҳсуб меёбанд ва ҳамеша зери таваҷҷуҳ ва ғамхориҳои пайваста қарор доранд.