ОҒОЗИ МУРОФИАИ ПАРВАНДАИ АМРИДДИН АЛОВАТШОЕВ, ЯКЕ АЗ ЛИДЕРҲОИ ҒАЙРИРАСМИИ БАДАХШОН
Нимаи дуюми рӯзи 29 апрели соли 2022, соати 14 дар Боздоштгоҳи №1 дар шаҳри Душанбе мурофиаи парвандаи Амриддин Аловатшоев, яке аз лидерҳои ғайрирасмии Вилояти Мухтори Кӯҳистони Бадахшон оғоз ёфт, вале наздикони ӯро ба мурофиа роҳ надодаанд.
Радиои Озодӣ бо такя ба манбааш хабар дод, ки парвандаро додрасе аз додгоҳи Вилояти Мухтори Кӯҳистони Бадахшон баррасӣ мекунад. “Вакилони дифоъро дер хабардор карданд. Хешу табораш ба назди Боздоштгоҳ рафтанд, аммо онҳоро ба дохил роҳ надоданд,” – гуфтааст ҳамсуҳбати Озодӣ.
Амриддин Аловатшоев 21-уми декабри соли 1977 дар ноҳияи Роштқалъаи ВМКБ ба дунё омада, ду фарзанд дорад. Исми ӯ бори аввал дар октябри соли 2018 вақте дар сархатти хабарҳо афтод, ки мақомот дар қатори 7 лидери ғайрирасмии Бадахшон бо Аловатшоев низ як протоколи алоҳида имзо карданд. Бар асоси он санад, Аловатшоев уҳдадор мешуд, ки аз ташкили гуруҳҳои ҷиноӣ даст кашида, ҷавононро ба зидди ҳукумат нашӯронад.
Аловатшоев соли 2019 ба Русия рафт ва ба зудӣ яке аз лидерҳои бонуфузи диаспораи зодагони Бадахшон дар ин кишвар шуд. Гуфта мешавад, ки Аловатшоев дар ҳалли мушкилоте, ки ба сари муҳоҷирони бадахшонӣ дар Русия меомад, кумак мекард ва барои ҷавонони ин минтақа дар Маскав ва дигар шаҳрҳои Русия толорҳои варзишӣ ташкил мекард.
Амриддин Аловатшоевро яке аз ташкилкунандагони митинги шоми 25 ноябр дар назди сафорати Тоҷикистон дар шаҳри Маскав мешуморанд. Ӯ аз ҷумлаи онҳое буд, ки он шом бо сафири Тоҷикистон дар Русия Давлатшо Гулмаҳмадзода мулоқот карданд ва талабҳои эътирозгаронро ба вай расонданд. Алишер Мирзонабот, раиси ВМКБ ва Далер Ҷумъа, вазири энергетикаи Тоҷикистон рӯзи 10 январ дар як ҷаласа дар Хоруғ Аловатшоевро “саркардаи гуруҳи ҷиноӣ” ном бурда, ба он айбдор карданд, ки зодагони ин вилоятро дар Русия ба зидди ҳукумат мешӯронд.
Амриддин Аловатшоев рӯзи 11 январ дар вилояти Белгороди Русия дастгир шуд ва бино ба хабарҳо, алакай рӯзе баъд аз тариқи Маскав ба Душанбе оварда шуд. Мақомоти Тоҷикистон танҳо рӯзи 2 феврал тасдиқ карданд, ки ӯ дар Душанбе дар ҳабс қарор дорад.