Овозхони ҷавон аз Тоҷикистон Фахриддин Ҳакимов дар даври навбатии озмуни Х-Фактор дар телевизиони Беларус бори дигар ҳакамонро бо иҷрои як таронаи итолиёӣ мафтун кард. Яке аз ҳакамон муҷрии машҳури ТВ Русия Олга Бузова буд, ки чанд дафъа ба такрор хитоб ба Фахриддин гуфт: “Дар ёдамон ҳаст, дар ёдамон ҳаст”. Бузова зоҳиран ҳунарнамоии барҷастаи овозхони ҷавони тоҷик дар даври аввали ин озмунро ба ёд овард.
Фахриддин Ҳакимов ҳафтаи гузашта дар даври аввали озмуни Х-Фактор дар телевизиони Беларус ҳам ҳакамон ва ҳам тамошобинонро бо таронаи Максим Фадеев «Танцы на стёклах» (“Рақс дар рӯи шиша”) мафтун карда буд. Ӯ ин таронаро чунон зебо ва олиҷаноб хонд, ки ҳар се узви ҳайъати ҳакамон барояш “Бале” гуфтанд ва барои иштироки овозхони тоҷик дар даври баъдии озмун роҳхат доданд.
Фахриддин дар бораи худ нақл кард, ки аз хурдӣ ба таври ҷиддӣ машқи гуштини юнониву румӣ мекард ва орзу дошт, ки чемпиони олимпӣ шавад, вале зарурати таъмини рӯзгори хонавода маҷбураш кард, ки аз паси ҷустуҷӯи кор шавад ва варзишро бо орзуи чемпиони олимпӣ шудан як сӯ гузорад.
Фахриддин бо худ як села медалҳои дар мусобиқаҳоти гуногун ба даст овардаашро низ ба ин озмун ҳамроҳ оварда буд ва намоиш дод. Ӯ ба муҷрии барнома то чӣ андоза устоди гуштин буданашро ҳам намоиш дод ва барандаро бо як ҳилаи моҳиронаи гуштингирӣ тоб дода, ба осмон бардошт. Баранда зуд таслим шуд ва аз Фахриддин хост, ки ба саҳна барояд.
Фахриддин гуфт, ахиран дар худ ҳунари наверо кашф кард ва акнун мехоҳад ҷиддан машғули овозхонӣ шавад.
Фахриддин Ҳакимов зодаи шаҳри Истаравшан буда, баъди хатми мактаби миёнаи №2 дар зодгоҳаш ба Маскав кӯчидааст.