ҶАНОЗАИ САФИЯХОНИ 9-СОЛАРО АЗ ӮЗБЕКИСТОН ОВАРДА, ДАР ХУҶАНД БА ХОК СУПУРДАНД
Ҷанозаи Сафияхон Раҳматоваи 9-соларо, ки баъди 35 рӯз аз як канал дар ҳудуди Ӯзбекистон ёфт шуд, рӯзи 13 марти соли 2024 дар шаҳри Хуҷанд ба хок супурданд. Дар аксҳои нашркардаи журналист Фарзон Муҳаммадӣ дида мешавад, ки дар маросими намози ҷаноза ва дафни ин духтараки ғӯррамарг дар Хуҷанд садҳо нафар иштирок карданд.
Маросими намози ҷаноза дар назди хонаи Раҳматовҳо дар кӯчаи ба номи Раҳмон Набиев доир шуд ва сипас Сафияхонро дар оромгоҳи “Боғи Охун” ба хок супурданд.
Ҷасади Сафияхон Раҳматоваро, ки рӯзи 7 феврал беномунишон шуда буд, баъди 5 ҳафтаи ҷустуҷӯ, рӯзи 12 март, соати 15:15 аз канали Мирзочӯли ҷанубӣ дар ҳудуди шаҳри Ширини вилояти Сирдарёи Ӯзбекистон пайдо карданд. Ширин дар тақрибан 50-километрии ғарби шаҳри Хуҷанд ҷойгир шудааст.
Кумитаи ҳолатҳои фавқулоддаи Тоҷикистон рӯзи 13 март хабар дод, ки азбаски ҷустуҷӯи ҷасади духтарак дар дарёи Сирдарё дар ҳудуди вилояти Суғд натиҷа надод, ин ниҳод рӯзи 29 феврал барои кумак ба вазорати ҳолатҳои фавқулоддаи Ӯзбекистон муроҷиат карда буд.
Дар иттилоияи расмии Кумитаи ҳолатҳои фавқулодда чунин омадааст:
«Тавре қаблан хабар дода будем, рӯзи 7 феврали соли 2024 дар ҳудуди шаҳри Хуҷанди вилояти Суғд як духтараки 9-солаи сокини ин шаҳр бедарак шуд. Барои ҷустуҷӯи наҷотбахшони раёсати ҳолатҳои фавқулоддаи вилояти Суғд ҷалб гардида, ҳар метри Сирдарёро ҷустанд.
29 феврали соли 2024 Кумитаи ҳолатҳои фавқулодда ба вазорати ҳолатҳои фавқулоддаи Ӯзбекистон дар мавриди кумак дар ташкили ҷустуҷӯ дар ҳудуди ин ҷумҳурӣ дархости хаттӣ фиристода шуд.
Рӯзи 12 марти соли 2024 аз вазорати ҳолатҳои фавқулоддаи Ӯзбекистон номаи расмӣ расид, ки аз 2 то 12 март гуруҳи ғаввосони раёсати ҳолатҳои фавқулоддаи вилояти Сирдарё дар ҳамкорӣ бо дигар ниҳодҳои қудратии Ҷумҳурии Ӯзбекистон чорабиниҳои ҷустуҷӯиро ба роҳ монда, соҳилҳоро дар ҳудуди деҳаҳои наздик ба шаҳри Ширини вилояти Сирдарё ҷустанд.
Дар натиҷаи корҳои анҷомёфта, рӯзи 12 марти соли 2024, соати 15:15, ҷасади духтарро дар соҳили рости канали Мирзочӯли ҷанубӣ дар ҳудуди шаҳри Ширини вилояти Сирдарё пайдо карданд”.
Қаблан Муяссар Раҳматова, бибии Сафияхон, гуфт, аз рӯи либосаш шинохтаанд, ки ин Сафияхон аст.
“Аз либосаш шинохтаанд. Ӯ дар панҷараи обанбор дармонда будааст. Падараш ва дигар хешовандон барои гирифтани ҷасад ба Узбекистон рафтанд. Бояд ҳуҷҷатҳоро омода карда, ба Тоҷикистон биёранд”, – гуфта буд Муяссар Раҳматова. Рӯзи 13 март дар Кумитаи ҳолатҳои фавқулодда хабар доданд, ки падари Сафияхон ҷасади духтарашро алакай шиносоӣ кардааст.
Сафияхон Раҳматова, хонандаи синфи 3-и гимназияи № 1-и шаҳри Хуҷанд, 7-уми феврали соли 20234 бедарак шуд. Бори охир ӯ ҳангоми сайругашт дар соҳили дарёи Сир дар назди Боғи ба номи Камоли Хуҷандӣ ба дурбини видеокамераҳои назоратӣ афтодааст. Хонаи онҳо дар наздикии боғ ва соҳили дарё ҷойгир шудааст. Дар сабтҳо дида мешуд, ки Сафияхон дар назди боғ сайругашт мекуунад ва сипас ба соҳили дарё мефарояд.