ДУ САДАМАИ МУҲЛИК ДАР СПИТАМЕНУ ФАРХОР ВА БОЗДОШТИ СОКИНИ ДУШАНБЕ БАРОИ ШИКОРИ 1200 ДОНА МОҲӢ
Як сокини 40-солаи ноҳияи Б.Ғафуров субҳи 25 ноябр дар ҳудуди ноҳияи Спитамен дар шоҳроҳи Душанбе-Хуҷанд-Чаноқ зери чархи мошини “Ҳюндай Соната” ҷон бохта, шоми ҳамон рӯз дар ҳудуди ҷамоати Гулшани ноҳияи Фархор як кхдаки сесола зери чархи мошини “Ҳюндай Старекс” ба ҳалокат расидааст.
ххххххххххххх
Сокини 40-солаи Душанбе ба он гумонбар мешавад, ки моҳи сентябр дар ҳудуди деҳаи Эсанбойи ноҳияи Рӯдакӣ аз дарёи Кофарниҳон бо усули маҳви оммавӣ, яъне бо истифода аз қаиқи резинӣ ва асбобҳои худсози барқдиҳанда 1200 дона лақамоҳӣ ва ширмоҳиро сайд карда, ба муҳити зист ба маблағи 76 ҳазору 800 сомонӣ, ё тақрибан 7500 доллар зарар расондааст.
Аз навори хабарҳои маркази матбуоти ВКД Тоҷикистон аз 26.11. 2022
Ҳалокати пиёдагард ва ноболиғ бар асари садамаҳои нохуш
25-уми ноябри соли 2022, тахминан соати 08:20-дақиқа, ронандаи автомашинаи тамғаи «Ҳюндай Соната», Наҷмиддинов Хайриддин Сайфиддинович, соли таваллудаш 1984, сокини ноҳияи И.Сомонӣ, ҳангоми ҳаракат дар шоҳроҳи “Душанбе-Хуҷанд-Чаннок” дар ҳудуди ноҳияи Спитамен аз уҳдаи идораи воситаи нақлиёт набаромада, пиёдагард Раҳимов Наимҷон Нодирҷонович, соли таваллудаш 1982, сокини ноҳияи Б.Ғафуровро пахш намудааст.
Дар натиҷа, Раҳимов Н.Н. ҷароҳатҳои ҷисмонӣ ба саломатиаш бардошта, дар ҷойи ҳодиса ба ҳалокат расидааст.
25-уми ноябри соли 2022, тахминан соати 17:20-дақиқа, ронандаи автомашинаи мусофиркаши тамғаи “Ҳюндай-Старекс”, Назаров Шоҳзамон Латифович, соли таваллудаш 1993, сокини ноҳияи Фархор, ҳангоми ҳаракат дар ҳудуди ҷамоати деҳоти Ватан, аз уҳдаи идораи воситаи нақлиёт набаромада, пиёдагарди хурдсол Қосимов Умарҷон Ҷонибекович, соли таваллудаш 2019, сокини ноҳияи мазкурро пахш намудааст.
Дар натиҷа, Қосимов У.Ҷ. ҷароҳати вазнини ҷисмонӣ бардошта, ҳангоми ба беморхона бурдан дар роҳ ба ҳалокат расидааст.
Аз рӯи ин ҳодисаҳо таҳқиқот идома дорад.
Ҳар сол бар асари садамаҳо дар роҳҳои Тоҷикистон то 400 нафар ба ҳалокат расида, беш аз 1200 тани дигар маъюб мешаванд. Бино ба охирин маълумоти ВКД, дар 6 моҳи аввали соли 2022 дар Тоҷикистон 482 садама рӯй додааст. Дар ин садамаҳо 180 нафар ба ҳалокат расида ва 509 нафар ҷароҳат бардоштаанд.
Худро ва азизони худро эҳтиёт кунед!
Ошкор шудани сайди ғайриқонунии ҳайвоноти обӣ дар деҳаи Эсанбой
Ҳангоми гузаронидани чорабиниҳои оперативӣ-ҷустуҷӯӣ аз ҷониби кормандони милитсия муайян карда шуд, ки марди 40-солаи сокини шаҳри Душанбе, 27-уми сентябри соли 2022, тахминан соати 20:00, дар ҳудуди деҳаи Эсанбойи ноҳияи Рӯдакӣ аз дарёи “Кофарниҳон” бо усули маҳви оммавӣ, яъне бо истифода аз қаиқи резинӣ ва асбобҳои худсози барқдиҳанда ба сайди ғайриқонунии 1 ҳазору 200 дона моҳиҳои намуди “лақамоҳӣ” ва “ширмоҳӣ” машғул шудааст.
Мувофиқи маълумотномаи Кумитаи ҳифзи муҳити зисти назди Ҳукумати Ҷумҳурии Тоҷикистон маблағи зарари расонидашуда 76 ҳазору 800 сомониро ташкил медиҳад.
Аз рӯи ин ҳодиса тафтишот идома дорад.