ҚАЛЛОБӢ БО “ЛЕКСУС”-У “КАМРИ” ВА 8 СОТИХ ЗАМИН ВА ДУЗДИИ ТЕЛЕФОН ВА КОРТИ БОНКӢ
Аз навори хабарҳои маркази матбуоти ВКД Тоҷикистон аз 05.04.2023
Боздошт гардидани марди дузд
Зимни баргузор намудани чорабиниҳои оперативӣ-ҷустуҷӯӣ аз ҷониби кормандони милитсия марди 30-солаи сокини шаҳри Душанбе бо гумони содир намудани ҷинояти дуздӣ дастгир карда шуд.
Номбурда, 18-уми марти соли 2023, тахминан соати 14:30-дақиқа, ҳангоми дар кӯчаи А.Қаҳҳорови пойтахт қарор доштанаш, бо роҳи пинҳонӣ аз нуқтаи таъмири воситаҳои нақлиёт 1-адад телефони мобилии тамғаи «Самсунг А-12», ки дар дохилаш корти бонкӣ бо маблағи 4 ҳазору 300 сомонӣ буд ва ба марди 47-солаи сокини ноҳияи Восеъ тааллуқ дошт, дуздида аз ҷойи ҳодиса ғайб задааст.
Дар натиҷа, ба номбурда 6 ҳазору 300 сомонӣ зарари моддӣ расонидааст.
Оид ба ҳодисаи мазкур тафтишот идома дорад.
Ифшо гардидани якчанд кирдори қаллобӣ
Ба ШВКД-2 дар ноҳияи Сино аризаи марди 26-солаи сокини ноҳияи мазкур ворид гардидааст, ки моҳи июни соли 2018, дар кӯчаи Н.Махсуми пойтахт, марди 41-солаи сокини ҳамин ноҳия бо роҳи фиреб ба бовариаш даромада, аз ӯ 1-адад автомашинаи тамғаи «Лексус-460»-ро гирифта, ваъда додааст, ки бар иваз 15 ҳазор доллари амрикоӣ медиҳад, аммо номбурда ба ваъдааш наистода боз 5 ҳазор доллари амрикоиро гирифта, ба ҷабрдида ҷамъ ба маблағи 20 ҳазор доллари амрикоӣ зарари моддӣ расонидааст.
Инчунин, парвандаи ҷиноятӣ бо моддаи 247 қисми 3 Кодекси ҷиноятии Ҷумҳурии Тоҷикистон нисбати зани 64-солаи сокини ноҳияи Б.Ғафуров оғоз карда шудааст.
Номбурда, моҳи феврали соли 2021, бо роҳи фиреб ба боварии марди 72-солаи сокини шаҳри Хуҷанд даромада, бо баҳонаи харидорӣ намуда додани автомашинаи тамғаи «Тойота-Камри» аз ӯ ба маблағи 85 ҳазору 240 сомонӣ гирифта, ба манфиати шахсиаш сарф намуда, то ҳол маблағашро барнагардонидааст.
Ҳамзамон, парвандаи ҷиноятӣ бо моддаи 247 қисми 3 Кодекси ҷиноятии Ҷумҳурии Тоҷикистон нисбати марди 46-солаи сокини шаҳри Истаравшан, ки соли 2016 бо моддаи 247 қисми 4 Кодекси ҷиноятии Ҷумҳурии Тоҷикистон суд шудааст, оғоз карда гардидааст.
Номбурда, 10-уми январи соли 2023, бо роҳи фиреб ба боварии марди 36-солаи сокини шаҳри мазкур даромада, бо баҳонаи фурӯхта додани замини наздиҳавлигиаш, ба миқдори 0,08 га, аз ӯ маблағаҳои 676 ҳазор рубли русӣ ва 6 ҳазор сомонӣ гирифта, ба манфиати шахсиаш сарф намуда, то ҳол маблағашро барнагардонидааст.
Аз рӯи ин ҳодисаҳо тафтишот идома дорад.