Размандаи шинохтаи тоҷик Муин Ғафуров, маъруф бо лақаби “Муин-Тоҷик”, рӯзи 14 октябри соли 2022 яке аз муҳимтарин набардҳо дар собиқаи варзишиашро доир мекунад. Набарди Муин бо рақибаш аз Бразилия Диего Силва барои камарбанд ва унвони қаҳрамони лигаи «Legacy Fighting Alliance» (LFA) дар вазни аз ҳама сабук (61,2 кг) дар варзишгоҳи “Sanford Pentagon” дар шаҳри Сиу-Фолс (Sioux Falls) аёлати Дакотаи ҷанубии Амрико баргузор мешавад.
Ин набард барои Муин Ғафуров хеле муҳим аст, чунки пирӯзӣ бар рақиби бразилиягиаш Диего Силва ӯро нафақат сазовори камарбанди қаҳрамони лигаи LFA мекунад, балки роҳашро барои дарёфти роҳхат ба UFC ҳам мекушояд. LFA баъди UFC аз лиҳози эътибор дар ҷаҳони муҳорибаҳои бидуни қоида дар ҷои дуюми меистад ва қаҳрамонҳои LFA маъмулан бо лигаи UFC ҳам қарордод баста, ба он мегузаранд.
Агар Муин-Тоҷик рӯзи 14 октябр ғалаба кунад, ӯ метавонад дуюмини разманда аз Тоҷикистон дар лигаи UFC шавад. Моҳи сентябр Нурулло Алиев нахустин намояндаи Тоҷикистон шуд, ки бо Дана Уайт, раҳбари UFC қарордод баст.
Аъзои тими Муин ба пуштибонии тоҷикҳои муқими Амрикову Канада ва дигар зодагони Осиёи Марказӣ умеди зиёд доранд ва мутмаинанд, ки шумори зиёде аз мухлисонашон шаби 14 октябр барои мухлисӣ ва пуштибонии Муин ба Сиу-Фолс хоҳанд омад.
Чиптаҳо барои тамошои ин бозиро метавонад дар ин сомона фармоиш дод:
Муин Ғафуров баъди ним соли маҳрум шуданаш аз ҳаққи иштирок дар мусобиқаҳо моҳи июни соли 2022 бо пирӯзӣ ба майдони варзиши ММА баргашт.
10 июни соли 2022 дар набарди асосии мусобиқоти лигаи LFA дар шаҳри Белтони аёлати Техаси Амрико Муин Ғафуров алакай дар даври дуюми рақобат ҳарифаш аз Бразилия Ҳербет Соузаро бо нокаут шикаст дод.
Муин ба маросими эълони ғолиб ҳамроҳи дӯсташ, варзишгари ҷавони тоҷики муқими Амрико Фаридун Саидов ба майдон баромад. Ба ин суол, ки оё қабл аз набард ӯ интизор дошт, ки бо нокаут пирӯз мешавад?, Муин бо забони омехтаи тоҷикию англисӣ чунин посух дод: “Ман вақте ки инҷо меомадам, гуфта будам, ки аз ман сюрпризро интизор бошед. Ва ман дар инҷо нишон додам, ки Тоҷик рақами як аст!”
Муин Ғафуров 17 майи соли 1996 дар Душанбе ба дунё омада, аз синни ҳафтсолагӣ таҳти роҳбарии амакҳояш ба машқи варзиш сар кардааст. Мураббии аввалини ӯ амакаш Аҳтам Ҳокиров аз варзишгарон ва мураббиёни шинохтаи кишвар ба шумор рафта, раҳбари Лигаи самбои размӣ ва ММА Тоҷикистон мебошад.
Муин Ғафуров метавонист бо UFC шартнома баста, дар таърих нахустин варзишгар аз Тоҷикистон дар муътабартарин лигаи ММА шавад. Вале 7 сентябри соли 2021 дар даври ниҳоии мусобиқоти довталабони Дан Вайт аз Чед Анҳэлигер аз Канада бо бо қарори доварон (29-28, 28-29, 29-28) мағлуб шуд ва орзуяш барои пайвастан ба UFC-ро ин дафъа ҷомаи амал пӯшонда натавонист.