САДАМАИ МАРГОВАР ДАР ФАРХОР: МОТОСИКЛ БА “ОПЕЛ” БАРХӮРД
Маркази матбуоти ВКД Тоҷикистон хабар дод, ки рӯзи 13-уми майи соли 2022, тахминан соати 11:30, ронандаи мототсикли тамғаи “Супер-Марикс”, Фақиров Файзиддин Орифович, соли таваллудаш 1971, сокини ноҳияи Фархор, ҳангоми ҳаракат дар ҳудуди ҷамоати деҳоти Фархор, ба самти муқобили ҳаракати роҳ баромада ба мошини тамғаи “Опел-Астра”, таҳти идораи Пирназаров Содиқ Қувваталиевич, соли таваллудаш 1990, сокини ноҳияи мазкур бархӯрдааст.
Дар натиҷа ронандаи мототсикл Фақиров Ф.О. ҷароҳатҳои вазнини ҷисмонӣ бардошта, дар беморхона ба ҳалокат расидааст.
Аз рўи ин ҳодиса таҳқиқот идома дорад.
Тавре пойгоҳи “Бомдод” қаблан хабар дод, ҳафтаи гузашта дар як садамаи пурқурбонӣ дар Панҷакент се нафар ҷон бохтанд. Бино ба иттилои манобеи “Бомдод”, тақрибан соати сеи шаби 7 майи соли 2022, як ронандаи мошини “Мерседес”, ки келини ҳомилаашро аз деҳаи Сӯҷина ба таваллудхонаи шаҳри Панҷакент мебурд, дар мавқеи Қавола дар канори ин шаҳр аз уҳдаи идораи воситаи нақлиёт баромада натавониста, ба қисмати қафои як мошини боркаши тамғаи “Дулан” бархӯрдааст.
Ба гуфтаи манобеи пойгоҳи хабарии “Бомдод”, дар натиҷаи ин садама ронандаи “Мерседес” ва ҳамсару қудояш, ҳарсе сокинони деҳаи Сӯҷина дар ҷои ҳодиса ба ҳалокат расидаанд. Келини ҳомилаи ин хонаводаро дар ҳолати вазнин ба бемористон бурдаанд.
Роҳҳои Тоҷикистон аз лиҳози шумори садамаҳо пурхатар шумурда мешаванд. Бино ба омори расмӣ, соли 2021 бар асари 1102 садамаи нақлиётӣ дар роҳҳои ин кишвар 395 нафар ба ҳалокат расида, 1 218 нафар ҷароҳати ҷисмонӣ бардоштаанд. Суръати баланди ҳаракат ва риоя накардани қоидаҳои ҳаракат дар роҳ, ҳамчунин роҳҳову мошинҳои фарсуда аз иллатҳои умдаи садамаҳо, аз ҷумла садамаҳои марговар дар роҳҳои Тоҷикистон ном бурда мешаванд.
Вақтҳои охир истифодаи телефонҳои мобил ва дигар васоили электронӣ ҳангоми рондани мошин ба як омили дигари садамазо табдил ёфтааст.