Як марди 35-солаи зодаи Тоҷикистонро дар шаҳри Санкт-Петербурги Русия дар пайи тирпарронӣ аз тирезаи мошини тамғаи Nissan Almera дастгир кардаанд. Видеои ин тирпарронӣ ва бозпусии марди дастгиршударо рӯзи 21 феврал пулиси пойтахти шимолии Русия нашр кард.
Бино ба иттилои хадамоти матбуоти РВКД шаҳри Санкт-Петербург ва вилояти Ленинград, шаби 20 ба 21 феврал як шоҳиди ҳодиса ба пулис занг зада, хабар додааст, ки аз тирезаи як мошин, ки тавассути Синопская набережнаям ба самти Обводной канал ҳаракат мекард, аз як олати монанд ба пистолет тирпарронӣ кардаанд.
Барои боздошти қонуншиканҳо амалиёти “Перехват” ба роҳ андохта шуд ва мошинро кормандони пулис дар кӯчаи Салов, дар назди бинои №150 пайдо карданд.
“Ду шаҳрванди яке аз кишварҳои хориҷаи наздик, ки яке 25 ва дуюмӣ 31 сол доштанд, ба кормандони пулис иқрор карданд, ки ҳангоми таҷлили тӯй як шиноси онҳо аз дохили мошин тир парронд, вале ӯ дар роҳ дар назди истгоҳи метрои “Ломоносовска” фаромад. Кормандони пулис пистолетро аз дохили мошин ёфта, барои ташхис фиристоданд. Экипажи ДПС бо изи гарм худи гумонбаршавандаро ҳам, ки 35 сол дорад, дастгир кард”, – гуфта мешавад дар иттилоияи пулиси Санкт-Петербург.
Марди дастгиршуда зимни бозпурсӣ гуфт, аз кори кардааш пушаймон шудааст. Ӯ дар шарҳи тирпаррониаш гуфт, ки мехост бо ин роҳ анъанаҳои тӯёнаро риоя кунад. Вале анъанаи тирпароно дар рӯзи тӯй бештар хоси мардумони Қафқози шимолист, на Осиёи Марказӣ.
Нисбат ба ин зодаи Тоҷикистон бар асоси қисми дуюми моддаи 213 Кодекси ҷиноятии Русия бо иттиҳоми авбошӣ парвандаи ҷиноятӣ кушодаанд. Ба ӯ бар асоси ин банди қонун ҳамчун ҷазо ҷарима ба маблағи аз ним миллион то як миллион рубл ваё корҳои ислоҳӣ ба муддати то 5 сол ваё аз 3 то 7 соли зиндон таҳдид мекунад.
Манбаи видео: Хадамоти матбуоти РВКД шаҳри Санкт-Петербург ва вилояти Ленинград