ДАР ХУҶАНД КАМАЗ ДУ ЗАНРО ПАХШ КАРД. ЯКЕ ҲАЛОК ШУД, ДУЮМӢ – ДАР БЕМОРХОНА
Маркази матбуоти ВКД Тоҷикистон хабар дод, ки рӯзи 11-уми феврали соли 2022, тахминан соати 13:40, ронандаи мошини боркаш тамғаи «КАМАЗ-Дулан», Салимов Сабур Солиевич, соли таваллудаш 1992, сокини шаҳри Истаравшан, ҳангоми ҳаракат дар ҳудуди шаҳри Хуҷанд, бехатарии ҳаракати роҳро таъмин карда натавониста, ду пиёдагард аз ноҳияи Бобоҷон Ғафуровро пахш кардааст. Дар натиҷа, Солиева Матлуба Каримовна, соли таваллудаш 1986, аз ҷароҳатҳои ҷисмонии бардоштааш дар ҷойи ҳодиса ба ҳалокат расидааст. Пиёдагарди дигар, ки ҳамроҳи ӯ қарор дошт, Дадобоева Мухбира Ғайбуллоевна, соли таваллудаш 1988, ҷароҳати ҷисмонӣ бардошта дар беморхона бистарӣ гаштааст.
Вобаста ба ин ҳодиса таҳқиқот идома дорад.
Маркази матбуоти ВКД Тоҷикистон қаблан дар бораи ҳалокати як пиёдагард дар роҳи Душанбе – Хуҷанд – Чаноқ, ягона роҳи мошингарди байни вилояти Суғд ва маркази кишвар хабар дода буд.
Бино ба ин манбаъ, шаби 10-уми феврали соли 2022, тахминан соати 00:10-дақиқа, ронандаи автомашинаи тамғаи «Газел», Олтмишев Қаҳрамон Алишерович, соли таваллудаш 1984, сокини пойтахт, ҳангоми ҳаракат дар шоҳроҳи Душанбе-Чаноқ, аз уҳдаи идораи воситаи нақлиёт набаромада, пиёдагард, Усмонзода Манучеҳр соли таваллудаш 1981, сокини ноҳияи Ҷ.Расуловро пахш намудааст. Дар натиҷа, пиёдагард Усмонзода М. ҷароҳати ҷисмонӣ бардошта, дар ҷойи ҳодиса ба ҳалокат расидааст.
Бино ба омори расмии ВКД Тоҷикистон, соли 2021 бар асари 1102 садамаи нақлиётӣ дар роҳҳои ин кишвар 395 нафар ба ҳалокат расида, 1 218 нафар ҷароҳати ҷисмонӣ бардоштаанд. Даҳҳо нафар аз қурбониёни садамаҳои нақлиётӣ пиёдагардон ё дучархаронҳоянд, ки зери чархи мошинҳои сабукраву боркаш ҷон медиҳанд. Суръати баланди ҳаракат ва риоя накардани қоидаҳои ҳаракат дар роҳ, ҳамчунин роҳҳову мошинҳои фарсуда аз иллатҳои умдаи садамаҳо, аз ҷумла садамаҳои марговар дар роҳҳои Тоҷикистон ном бурда мешаванд.
Вақтҳои охир истифодаи телефонҳои мобил ва дигар васоили электронӣ ҳангоми рондани мошин ба як омили дигари садамазо табдил ёфтааст.
Дар фасли зимистон хатари садамаҳо дар роҳҳо боз ҳам бештар мешавад.