Додситонии вилояти Саратови Русия аз анҷоми баррасии парвандаи истирдоди шаҳрванди 36-солаи Тоҷикистон, нозири собиқи ширкати барқ хабар дод. Ӯ дар Тоҷикистон бар асоси қисми дуюми моддаи 245 Кодекси ҷиноятии ин ҷумҳурӣ ба тасарруфи маблағҳо айбдор мешавад.
Додситонӣ гуфт, тафтиши анҷомёфта ягон монеа дар роҳи ба ҷавобгарии ҷиноятӣ кашондани ин шаҳрвандро намебинад ва ба ин далел “марди муттаҳам ба ҳабси пешакӣ гирифта шуда, дар бораи ба мақомоти ҳифзи ҳуқуқи Тоҷикистон супурдани ӯ қарор қабул карда шудааст”.
Худи боздоштшуда ё наздиконаш барои шарҳи парванда дастрас нестанд, вале бар асоси маводи парвандааш, ин нафар ба он айбдор мешавад, ки аз 1 июл то 14 июли соли 2022, яъне дар зарфи ҳамагӣ ду ҳафтаи кораш дар мақоми нозири барқи “Шабакаҳои тақсимоти барқи шаҳри Турсунзода”, “бо сӯиистифода мақом бо роҳи тасарруй пулҳои ба ӯ боваркардашуда ба маблағи 8 ҳазору 945 сомонию 60 дирам (чизе бештар аз 800 доллар)-ро, ки шаҳрвандон барои истифодаи нирӯи барқ супорида буданд, дуздидааст”.
Баъди ин, ӯ пулҳои мардумро ба киса зада, аз Тоҷикистон фирор кардааст.
Ӯро моҳи марти соли 2024, баъди қариб ду соли фирораш, дар ҳудуди ноҳияи Озинкии вилояти Саратов, дар марзи Русия бо Тоҷикистон дастгир кардаанд. Дар ин минтақа гузаргоҳи машҳури “Озинки” ҷойгир шудааст ва муҳоҷирон маъмулан тавассути ин гузаргоҳ марзи Русия бо Қазоқистонро убур мекунанд, то ки боз зуд баргарданд ва будубоши худро дар Русия дигарбора аз сари хат, яъне аз сифр шурӯъ кунанд.
Ширкати “Барқи Тоҷик”, ки ахиран ба се сохтор, аз ҷумла ба “Шабакаҳои тақсимоти барқ”, тақсим карда шуд, яке аз сохторҳои аз ҳама фасодзада дар Тоҷикистон ба шумор меравад.
Агентии мубориза бо коррупсияи Тоҷикистон ҳанӯз соли 2013 ин ширкатро айбдор карда буд, ки дидаю дониста дар санадҳояш қарзи аҳолӣ аз нирӯи барқро чанд баробар бештар нишон медиҳад. Тафтиши Агентӣ нишон дода буд, ки “Барқи Тоҷик” қарзи аҳолиро 864 миллион сомонӣ дарҷ кардааст, ки бо қурби он вақт 175 миллион долларро ташкил медод. Вале дар асл қарзи аҳолӣ аз барқ ҳамагӣ 355,5 миллион, яъне дуюним маротиба камтар будааст.
То соли 2022 қарзи умумии “Барқи Тоҷик” алакай ба 32 миллиард сомонӣ, ё қариб 3 миллиард доллар расид. Гуфта мешуд, ки танҳо дар як соли 2021 қарзи ин ширкат ба андозаи 3,3 миллиард сомонӣ, ё тақрибан 300 миллион доллар афзудааст.
Роҳбарони “Барқи Тоҷик” маъмулан истифодабарандагон, аз ҷумла аҳолиро дар афзоиши қарзи ширкат айбдор мекунанд, вале коршиносон бар инанд, ки манбаи аслии дар ин ботлоқи бетаги қарз ғӯтидани “Барқи Тоҷик” коррупсияи саросарӣ ва раҳбарии нодуруст аст.