Трансфери аз ҳама пурсарусадо ва деринтизори сол дар футболи тоҷик билохира тасдиқ шуд! Бошгоҳи футболи Русия “Ростов” рӯзи 16 июни соли 2024 дар Телеграм-каналаш эълон кард, ки бо тими “Истиқлол” аз Душанбе дар мавриди ба “Ростов” гузаштани дарвозабони “Истиқлол” ва тими миллии Тоҷикистон ба тавофуқ даст ёфтааст ва акнун Рустам Ятимов бозигари “Ростов” шудааст!
“Рустамро дар тими худ хайрамақдам мегӯем! Ба ӯ дар мақоми посбони дарвозаи “Ростов” орзуи бозии бомуваффақият мекунем!” – навиштааст бошгоҳи “Ростов” дар Телеграм.
Рӯзи 16 июн “Истиқлол” низ расман эълон кард, ки Рустам Ятимов собиқаи варзишиашро аз ин ба баъд дар “Ростов” идома медиҳад.
“Клуби футболи «Истиқлол» ва намояндаи Лигаи Бартари Русия КФ «Ростов» созишнома дар бораи гузариши дарвозабон Рустам Ятимовро ба дастаи сармураббӣ Валерий Карпин ба имзо расониданд. Маблағи гузариши дарвозабон ба тими «Ростов» зиёда аз 250 000 доллари америкоиро ташкил медиҳад”, – гуфта мешавад дар иттилоияи расмии “Истиқлол”.
Сарусадоҳо дар бораи ба ягон бошгоҳи Русия гузаштани Рустам Ятимов алакай баъди ҳунарнамоии ҳайратовари ӯ дар Ҷоми Осиё дар Қатар баланд шуд ва ду бошгоҳи “Химки” ва “Ростов” талабгори дар ҳайъати худ дидани дарвозабони тоҷик шуданд. Моҳҳои охир исми “Ростов” ҳамчун харидори эҳтимолии Ятимов бештар садо медод ва ҳатто гуфта мешуд, ки “Ростов” барои Рустам 250 ҳазор доллар пешниҳод кардааст. Намояндаи “Истиқлол” гуфтугӯҳо бо “Ростов” дар мавриди Рустам Ятимовро тасдиқ карда буд, вале мегуфт, сухан дар бораи як маблағи дар таърихи футболи тоҷик рекордӣ, яъне бесобиқа меравад ва он хеле бештар аз 250 ҳазор долларест, ки мегӯянд. Аммо дар иттилоияи расмии “Истиқлол” дар мавриди ба “Ростов” гузаштани Рустам Ятимов низ рақами мушаххастареро ифшо накарданд ва танҳо бо ин ҷумла иктифо карданд: “Маблағи гузариши дарвозабон ба тими «Ростов» зиёда аз 250 000 доллари америкоиро ташкил медиҳад”.
Рустам Ятимов 13 июли соли 1998 дар шаҳри Нижний Новгороди Русия ба дунё омадаст. Падари ӯ Бобораҳим Ятимов тоҷик ва зодаи деҳаи Ҷӯйбодоми ҷамоати Чоряккорон аст, модараш– аз Русия.
Рустам Ятимов машқи футболро дар мактаби варзишии “Волга-СДЮСШОР-8” оғоз карда, соли 2016, алакай дар синни 18 бо тими “Волга” (Нижний Новгород) қарордод баст. Аммо ин тим банкрот шуд ва Ятимов маҷбур шуд, дар пайи ҷустуҷӯи бошгоҳи дигар шуд.
Ҳамон вақт буд, ки ҳамдастааш дар “Волга” Искандар Ҷалилов занг зад ва гуфт, ӯро мехоҳанд дар Душанбе дар бошгоҳи “Истиқлол” бубинанд. Дар “Истиқлол” ба Рустам Ятимов ваъда доданд, ки барояш шаҳрвандии Тоҷикистонро ҳам мегиранд ва ӯ метавонад дар саффи тими миллии Тоҷикистон бозӣ кунад. Сармураббии вақти “Истиқлол” ситораи машҳури футболи тоҷик Муҳсин Муҳаммадиев Рустам Ятимовро ба саффи ин бошгоҳ пазируфт ва бо дарвозабони он вақт ҳамагӣ 19-сола қарордоди панҷсола имзо карданд. Аммо гирифтани шаҳрвандии Тоҷикистон як сол тӯл кашид ва Рустам Ятимов соли 2017 аслан ба майдон баромада натавонист ва соли 2018 низ дар аввал дар саффи “Истиқлол” ҳамчун легионер ҳунарнамоӣ мекард. Аммо билохира дар соли 2018 ба Рустам Ятимов шаҳрвандии Тоҷикистонро доданд ва ӯ худи ҳамон сол се дафъа дар ҳайъати тими олимпии Тоҷикистон ба майдон баромада, 11 июни соли 2019 дар бозии рафиқона бо Афғонистон, ки бо ҳисоби 1:1 анҷом ёфт, бори нахуст дар ҳайъати тими миллии Тоҷикистон ба майдон баромад.
Рустам Ятимов тайи 6 соли ҳунарнамоӣ дар “Истиқлол” 6 маротиба қаҳрамони Тоҷикистон, 4 маротиба барандаи Ҷом ва 4 маротиба барандаи Шоҳҷоми Тоҷикистон шуда, дар умум 92 маротиба ба майдон баромад ва 39 бозиро бе сар додани ягон гол ҷамъбаст кард. Рустам Ятимов ҳамчунин 44 маротиба дар ҳайъати тими миллии Тоҷикистон ба майдон баромадааст.
Рустам Ятимов соли 2023 беҳтарин футболбози Тоҷикистон дониста шуд ва барои ҳунарнамоии фавқулоддааш дар Ҷоми Осиё дар Қатар ба ӯ мошини нав “Тойота Королла” туҳфа карданд. Баъди бозгашт аз Қатар сокинони Ҷӯйбодом Рустамро ба деҳаи падариаш даъват карда, ба шарафи ӯ буққа куштанд ва зиёфати шоҳонааш оростанд.
Рустам дар тими миллии Тоҷикистон дурахшид, як умеде ба ояндаи футболи тоҷик буд, аслан кори хуб нашуд. Вале, варзиш ҳам як бизнес аст, касе пули бештар пешниҳод кунад, ба ҷону дил қабул!