ВидеоДин ва боварҳоҶомеа

НОМҲОИ АЗ ҲАМА МАЪРУФИ СОЛИ 2023: ПИСАРОНА – МУҲАММАД, АБДУЛЛОҲ, АБДУРАҲМОН ВА ЮСУФ, ДУХТАРОНА – ФОТИМА, СУМАЯ ВА ОИША

Хабаргузории “Азия Плюс” менависад, ки тамоюли номгузорӣ дар Осиёи Марказӣ, аз ҷумла дар Тоҷикистон, дар солҳои охир чандон тағйир наёфтааст ва ҳамчунон номҳои мусалмонӣ дар мӯд боқӣ мондаанд. Вале талошҳои мақомоти Тоҷикистон самар додааст, зеро дигар касе ба фарзанди худ Зоғу Зоғчаву Майна ё Сангу Сафолу Кетман ном намемонад.

Дар вазорати адлияи Тоҷикистон ба “Азия Плюс” хабар доданд, дар соли 2023 номи аз ҳама маъруфи писарона дар ҷумҳурӣ Муҳаммад буд ва 4853 падару модар фарзанди худро ба шарафи Паёмбари Ислом (с) Муҳаммад ном гузоштаанд. Ҳамин тавр, 4081 нафар  фарзанди худро ба шарафи падари Паёмбар Абдуллоҳ ном гузоштаанд, ки маънояш Бандаи Аллоҳ аст.

Номҳои дигари писаронаи маъруфи соли 2023 дар Тоҷикистон инҳоянд: Абдураҳмон (3527 падару модар ин номро интихоб кардаанд), Юсуф (3001), Умар (2751), Иброҳим (1857), Имрон (1709), Сомон (1696), Абубакр (1225) ва Аҳмад (794).


Дар байни номҳои духтарона низ номҳои бо дини Ислом алоқаманд маъруф буданд. Ҷои аввалро дар байни номҳои духтарона Фотима гирифт. Соли гузашта 4018 падару модар фарзанди худро ба шарафи духтари Паёмбар Фотима ном кардаанд. Номҳои дигари маъруфи духтарона дар Тоҷикистон дар соли 2023 инҳо будаанд:  Сумайя (2998), Оиша (2321), Марям (1956), Зайнаб (1405), Осия (1354), Хадиҷа (1021), Кибриё (987) ва Амина (789).

Барои муқоиса соли 2018 низ дар Тоҷикистон аксаран ҳамин номҳои мусалмонӣ: Муҳаммад, Умар, Иброҳим, Юсуф дар байни номҳои писарона ва Оиша, Фотима, Зайнаб ва Осия  дар байни номҳои духтарона аз ҳама маъруф буданд.

Дар вазорати адлия боз чанде дигар аз номҳои маъруф дар Тоҷикистонро баршумурдаанд.

Номҳои писарона : Усмон, Ансор, Аюбҷон, Амир, Мӯсо ва Комрон.

Номҳои духтарона: Сафия, Муниса, Нурия, Ёсамин, Ҳурия ва Ирода.

Лозим ба зикр аст, ки ба ҷуз аз Ёсамин, Комрон ва Сомон дигар ҳамаи номҳои маъруф дар ҷумҳурӣ решаҳои исломӣ ва арабӣ доранд.


ҲАМСОЯҲОИ МО БА ФАРЗАНДОНИ ХУД ЧӢ НОМҲО МЕГУЗОРАНД?

Тавре аз рейтингҳои номҳои маъруф дар кишварҳои дигари Осиёи Марказӣ бармеояд, номҳои муслмонӣ дар ин ҷумҳуриҳо низ номҳои мӯд боқӣ мемонанд.

Др Қазоқистон дар байни номҳои писарона Ҳамза, Муҳаммад ва Нурислом пешсафанд ва дар байни номҳои духтарона Мадина, Оиша ва Ойлину Амина. Ҷолиб он аст, ки соли 2013 низ Алихону Амир ва Нурислом аз ҷумлаи номҳои маъруфи писарона дар ин ҷумҳурӣ ба шумор мерафт ва Оишаву Амина ҳам чандин сол боз дар садри рейтинги номҳои духтарона қарор доранд.

Чанде аз номҳои маъруфи писарона дар Қазоқистон: Алихон, Умар, Амир, Алдиёр, Ойсултон, Алан, Алӣ, Нурислом, Муҳаммад ва Ҳамза.

Номҳои духтарона: Мадина, Оиша, Ойлин, Асалам (Асылым), Сафия, Томирис, Раяна, Амина, Аяла ва Ойим.


Дар Ӯзбекистон соли 2023 номи аз ҳама маъруфи духтарона Солиҳа (Солеҳа) ва дар байни номҳои писарона Муҳаммадалӣ буд. Ин номҳо солҳои қабл низ пешсаф будаанд.

Бино ба маълумоти вазорати адлияи Ӯзбекистон рейтинги номҳои аз ҳама маъруфи писарона  дар ин кишвар чунин аст:

Муҳаммадалӣ (27 431), Мустафо (22 880), Абдуллоҳ (18 116), Муҳаммад (17 025), Муҳаммадюсуф (13 774), Муҳаммадамин (12 450), Нурмуҳаммад (9017), Муҳаммадҷон (8843), Имронбек (8591) ва Музаммадзиё (8135).

Рейтинги номҳои маъруфи духтарона дар Ӯзбекистон чунин аст:

Солиҳа (24 365), Ясмина (19 911), Муслима (15 918), Хадиҷа (10 759), Имона (10 310), Шукрона (9330), Сумайя (9279), Ифора (7586), Саъдия (6639) ва Мубина (6585).


Вазорати рушди рақамии Қирғизистон низ рӯйхати номҳои аз ҳама маъруфи соли гузаштаро тартиб додааст.

Номҳои духтарона: Солиҳа (3 878), Амина (2 926), Фотима (2 897),  Алия ё Олия (2 838), Раяна (2 529), Сафия (2 526), Алфия (2 522), Ойлин (2 503), Оиша (2 219) ва Аруузот (2 126)., ки номи қирғизӣ буда, маънояш “аз зоти пок” аст.

Номҳои писарона: Муҳаммад (6 176), Умар (4 847), Алӣ (3 300), Амир (2 621), Алихон (2 275), Билол (2 263), Алинур (2 155), Усмон (2 095), Нурислом (1 866) ва Амир (1 748).  

Агар Шумо шоҳиди ҳодисаи ҷолибе шудед, видео ва акс бигиред ва бо ин шумора ба “Бомдод” фиристед. Шумораи мо (WhatsApp, Viber, IMO, Telegram): +420 777 404 854

2 Comments

  1. Ҳасан Абдуғаффор Холмуҳаммадзода, Мутахассиси сатҳи баланди номгузорӣ гуяд:

    Касоне, ки 14-аср қабл вафот кардаанд, номашон ҳанӯз вирди забонҳост, касе, ки 32-сол роҳбари кишвар бошаду номаш дар қаттори номҳои маъруфи соли 2023 (дар назди миллат) “ҷой” наёбад, маълум мешавад, ки мардум пропагандаи давлатиро тавассути телевизион тамошо намекунанд, агар тамошо ҳам кунанд, “чеҳра”-и асосии пропаганда ҳеч арзише надорад, вагарна 10-нафар номи писарашро ба номи “пешво”, ки номи саҳобаи гиромӣ ҳам ҳаст, мегузоштанд.

  2. Ҳасан Абдуғаффор Холи Муҳаммад зода, филолог, номшинос, худшинос гуяд:

    Ягона чизе, ки баъд аз таваллӯд (ҳатто имрӯзҳо қабл аз таваллӯд ном мегузоранд) то дами марг ва баъди марг то рӯзи қиёмат, баъд аз қиёмат абад-ул-абад ҳамеша бо инсон аст, номи ӯст. Онҳое, ки номашон “теша” ё “қайчӣ” буд, рӯзи қиёмат бо чӣ ном садо зада мешаванд? Оё “теша”-ро Абдуллоҳ садо мезананд? Оё “абӯҷаҳл”-ро абӯилм фарёд мекунанд? Пас бояд номе бигузорем, ки дар рӯзи маҳшар худову расул аз номи мо, ки мусалмон ҳастем, шарм накунанд.

Назари Шумо чист?

Шарҳҳое, ки дар он таҳқиру дашном ва ё иттилооти дурӯғ бошад, нашр карда намешаванд!

Back to top button