БОЗДОШТИ РОНАНДАЕ, КИ ПИЁДАГАРДРО ШАБОНА БО МОШИНАШ ЗАДА КУШТУ ФИРОР КАРД
Раёсати корҳои дохилии вилояти Хатлон рӯзи 8 феврали соли 2024 аз боздошти ронандаи фирорие хабар дод, ки ҳафтае пеш шабона дар роҳи Панҷи Поён пиёдагарди 43-соларо пахш карда, ба ҳалокат расондааст ва ба болои ин, ноҷавонмардона аз ҷои ҳодиса фирор кардааст.
Бино ба иттилои милитсияи Хатлон, шаби 31-уми январи соли 2024, тахминан соати 21:00 ронандаи мошини номаълум, ҳангоми ҳаракат дар шоҳроҳи Душанбе – Панҷи поён дар ҳудуди ноҳияи Ҷалолиддини Балхӣ аз ӯҳдаи идораи воситаи нақлиёт набаромада, пиёдагард – марди 43-солаи сокини ноҳияи мазкур, падари 2 фарзандро пахш намудааст.
Ронанда ба ҷои кумак расонидан ба пиёдагард ноҷавонмардона аз ҷои ҳодиса ба самти номаълум ғайб задааст ва дар натиҷа пиёдагард ҷароҳатҳои гуногуни ҷисмонӣ бардошта дар ҷои ҳодиса ба ҳалокат расидааст.
Гуфта мешавад, вобаста ба ҳолати мазкур ҷиҳати муайян намудани шахсияти ронандаи фирорӣ ва боздошти ӯ аз ҷониби кормандони ботаҷрибаи милитсияи вилоят як қатор чорабиниҳои дахлдори оперативӣ-ҷустуҷӯӣ роҳандозӣ карда шуда, дар натиҷа, ронандаи мазкур муайяну боздошт ва ба мақомоти милитсия дастрас карда шуд.
Муайян гардид, ки ронандаи мошин шаҳрванд Эргашев Валибек Назирович соли таваллудаш 1984, истиқоматкунандаи ноҳияи Ҷалолиддини Балхӣ, ҷамоати Ҳалевард мебошад, ки номбурда тавассути автомашинаи шахсиаш тамғаи “Деу-Нексия”, рақами қайди давлатиаш 9841 НН 03 он садамаи нақлиётии марговарро содир намудааст.
Айни замон ронандаи фирорӣ Валибек Эргашев боздошт ва дар ҳабси пешакӣ қарор дошта, нисбаташ тибқи талаботи моддаҳои 212, қисми 2 ва 127, қисми 2 Кодекси ҷиноятии Ҷумҳурии Тоҷикистон парвандаи ҷиноятӣ оғоз карда шудааст ва тафтишот идома дорад. Ба ӯ бар асоси қисми дуюми моддаи 127 барои дар хатар монондани шахси ба кумак муҳтоҷ, ки ин амал боиси марги ҷабрдида шудааст, ҳамчун ҷазо то 3 соли зиндон, ва бар асоси қисми дуюми моддаи 212 барои вайрон кардани қоидаҳои ҳаракат дар роҳ, ки боиси марги инсон шудааст, аз 3 то 5 соли зиндон таҳдид мекунад.
Роҳҳои Тоҷикистон аз лиҳози садамаҳои марговараш пурхатар дониста мешаванд. Ҳар сол бар асари садамаҳо дар роҳҳои Тоҷикистон то 400 нафар ба ҳалокат расида, беш аз 1200 тани дигар маъюб мешаванд. Бино ба охирин омори ВКД, танҳо дар нимаи аввали соли 2023 дар роҳҳои Тоҷикистон дар 492 садама 193 нафар ба ҳалокат расида, 514 нафари дигар ҷароҳат бардоштаанд.
Муттаассифона, даҳҳо тан аз қурбониёни ин садамаҳо кӯдакону наврасонанд.