СЕ САДАМАИ МАРГОВАР ДАР КӮЛОБ, КӮШОНИЁН ВА РОҲИ БОХТАР – ПАНҶИ ПОЁН
Маркази матбуоти ВКД Тоҷикистон хабар дод, ки рӯзҳои 15 ва 16 декабри соли 2023 дар се садамаи нақлиётӣ дар ҷануби Тоҷикистон чор нафар, аз ҷумла як кӯдаки шашсола, ба ҳалокат расида, якеи дигар ҷароҳат бардоштааст.
Аз ҷумла шаби 15-уми декабри соли 2023, тахминан соати 21:40-дақиқа, ронандаи мошини тамғаи «Тойота-Версу», Мирзоев Сайдакбар Абдулҳакимович, соли таваллудаш 1992, сокини шаҳри Кӯлоб, ҳангоми ҳаракат аз хиёбони И.Сомонӣ ба самти ҷамоати деҳоти Зиракӣ, дар ҳудуди мавзеи Гулбоғ ба самти муқобили ҳаракати роҳ баромада, ба мошини тамғаи “ДЭУ-Нексия”, таҳти идораи ронанда, Қараев Лутфулло Сайдалиевич, соли таваллудаш 1983, сокини ҳамин шаҳр бархӯрдааст.
Дар натиҷа, ронандаи мошини тамғаи “ДЭУ-Нексия”, Қараев Л.С. ва мусофираш Пулатова Райҳона Зайдуллоевна, соли таваллудаш 1982, сокини шаҳри Кӯлоб ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидаанд. Ронандаи мошини тамғаи “Тойота-Версу”, Мирзоев С.А. ҷароҳати ҷисмонӣ бардошта, дар беморхона бистарӣ гардидааст.
Нимаи дуюми рӯзи 15-уми декабри соли 2023, тахминан соати 16:30-дақиқа ронандаи мошини тамғаи «Опел-Астра», Қурбонов Ҳукмиддин Тайёрович, соли таваллудаш 1996, сокини ноҳияи А.Ҷомӣ, ҳангоми ҳаракат аз самти шаҳри Бохтар ба самти шаҳри Душанбе, дар ҳудуди ҷамоати деҳоти Ориёни ноҳияи Кӯшониён аз уҳдаи идораи воситаи нақлиёт набаромада, пиёдагарди хурдсол Товушев Ёсинҷон Идрисович, соли таваллудаш 2017, сокини ноҳияи мазкурро пахш намудааст. Дар натиҷа, кӯдаки шашсола ҷароҳатҳои вазнини ҷисмонӣ бардошта, дар ҷойи ҳодиса ба ҳалокат расидааст.
Шаби 16-уми декабри соли 2023, тахминан соати 02:00, ронандаи мошини тамғаи “Опел-Астра”, Муҳамаддин Муъминҷони Наҷмиддинзода, соли таваллудаш 1992, сокини ноҳияи Панҷ, ҳангоми ҳаракат аз самти шаҳри Бохтар ба самти ноҳияи Панҷ, дар шоҳроҳи “Душанбе-Панҷи поён”, ҳудуди ноҳияи Ҷ.Балхӣ аз уҳдаи идораи воситаи нақлиёт набаромада, пиёдагард Абдурасулов Шариф, соли таваллудаш 1955, сокини ноҳияи Ховалингро пахш намудааст. Дар натиҷа, пиёдагард Абдурасулов Ш. ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Оид ба ин ҳодисаҳо таҳқиқот идома дорад.
Роҳҳои Тоҷикистон аз лиҳози садамаҳои марговараш пурхатар дониста мешаванд. Ҳар сол бар асари садамаҳо дар роҳҳои Тоҷикистон то 400 нафар ба ҳалокат расида, беш аз 1200 тани дигар маъюб мешаванд. Бино ба охирин омори ВКД, танҳо дар нимаи аввали соли 2023 дар роҳҳои Тоҷикистон дар 492 садама 193 нафар ба ҳалокат расида, 514 нафари дигар ҷароҳат бардоштаанд.