БОКСЁРИ ТОҶИК МУҲАММАДХӮҶА ЯЪҚУБОВ ДОВТАЛАБИ УНВОНИ ҚАҲРАМОНИ ҶАҲОН ШУД (ВИДЕО)
Шаби 25 ба 26 ноябри соли 2023 дар шаҳри Лас-Вегаси Амрико набарди байни боксёри 28-солаи тоҷик Муҳаммадхӯҷа Яъқубов ва муштзани 30-сола аз Куба Пабло Висенте барои дарёфти мақоми довталаби унвони қаҳрамони ҷаҳон дар вазни сабуктарини то 59 кило тибқи фарзияи WBC (Шӯрои ҷаҳонии бокс) баргузор шуд. Бо қарори якдилонаи доварон бо натиҷаи 96-94, 97-93 ва 98-92 Яъқубов ғолиби ин набард эълон ва расман довталаби унвони қаҳрамони ҷаҳон дар ин вазн шуд.
Ин аввалин набард ва аввалин пирӯзии Яъқубов дар Амрико буд.
Дар видеои аз Лас Вегас нашршуда дида мешавад, ки як гуруҳи мухлисони тоҷик қаблан аз баромаданаш ба ринг (майдони бокс) Муҳаммадхӯҷа Яъқубовро бо шиори машҳури “Тоҷикистон, ба пеш!” рӯҳбаланд мекунанд.
Муҳаммадхӯҷа Яъқубов аз ин қабл моҳи апрели соли 2023 Ҷавоҳирбек Каримов аз Ӯзбекистонро бо нокаут дар даври аввали набард шикаст дода буд. Муштзани тоҷик дар умум 21 пирӯзӣ, аз ҷумла 11 пирӯзӣ бо нокатут, ва ҳамагӣ як бохт дошта, то набардаш бо Висенте дар рейтинги WBC дар зинаи сеюм буд.
Дар зинаи аввали ин рейтинг Пабло Висенте қарор дошт, ки дар собиқааш 23 пирӯзӣ, аз ҷумла 17 пирӯзӣ бо нокатут, ва ҳамагӣ ду бохт дорад. Аз ин қабл моҳи сентябри соли 2023 Висенте Хорхе Мойяро бо нокаути фаннӣ шикаст дода буд.
Бо пирӯзӣ бар рақами яки рейтинги WBC, Муҳаммадхӯҷа Яъқубов мақоми довталаби расмии унвони қаҳрамони ҷаҳон дар вазни то 59 кило тибқи фарзияи ин созмони муштзаниро ба даст овард ва бояд акнун бо қаҳрамони феълии ҷаҳон муштзани амрикоӣ О’Шаки Фостер рақобат кунад. Моҳи марти соли 2022 Яъқубов дар Дубай бо Фостер барои дарёфти мақоми довталаби унвони қаҳрамони ҷаҳон вориди рақобат шуда буд, вале он дафъа шикаст хӯрд ва Фостер тавонист баъдан унвони қаҳрамониро ҳам ба даст биорад. Он бохт ягона шикаст дар собиқаи варзишии Муҳаммадхӯҷа Яъқубов ба шумор меравад.
Муҳаммадхӯҷа Яъқубов яке аз маъруфтарин муштзанҳои касбӣ аз Тоҷикистон буда, ду маротиба чемпиони Осиё тибқи фарзияи WBC шудааст ва аз соли 2019 ба ин сӯ унвони қаҳрамони байналмилалии ҷаҳон тибқи фарзияи ин созмонро дар дастони худ нигоҳ медорад. Яъқубов ҳамчунин тибқи фарзияи WBО, боз як созмони муътабари байналмилалии бокс, ду маротиба қаҳрамони ҷаҳлон дар байни ҷавонон шудааст.
Яъқубов Муҳаммадхӯҷа Искандарович 31 марти соли 1995 дар Исфара ба дунё омадааст. Ӯ 12 декабри соли 2015 бори аввал дар бокси касбӣ қувваозмоӣ кард ва дар нахустин набардаш Владимир Терехов аз Русияро шикаст дод. Дар 8 сол дар бокси касбӣ муштзани тоҷик 22 маротиба ба майдон баромада, 21 маротиба пирӯзӣ ба даст овардааст. Аз ҷумла 11 пирӯзӣ бо нокаут. Ӯ ҳамагӣ як бохт дорад ва ин ҳамон шикасташ аз рақиби ояндааш Фостер аст. Фостер ҳоло муваззаф аст, ки барои ҳифзи мақоми чемпионӣ ба муқобили Яъқубов ба майдон барояд.
Умедворем, ки Муҳаммадхӯҷа Яъқубов ин бор ниқорашро аз ин рақиби амрикоӣ хоҳад гирифт ва Фостерро аз мақоми чемпиони ҷаҳон маҳрум сохта, ин унвонро ба ҷайби худ хоҳад андохт.