Алишер Назарови 26-сола, устои мошин (автомеханик) аз шаҳри Ваҳдат, ки дар Русия таҳсил кардаву ҳоло дар Қазоқистон кор мекунад, ба марҳалаи ниҳоии озмуни “Суперниндзя” дар шабакаи телевизионии русии СТС роҳхат гирифт. Рақобатҳо барои роҳ ёфтан ба финали ин сабқати телевизионӣ дар шаҳри Минералние Води доир шуд ва Алишер Назаров тавонист дар гуруҳи худаш варзишкорони машҳурро паси сар гузошта, ҷои аввалро ба даст биорад ва аввал ба нимфиналу сипас ба финал барояд.
Дар озмуни “Суперниндзя” довталабон бояд бо истифода аз ҳунари гимнастикиву акробатӣ аз мониаҳои душвор гузашта, дар анҷом ҳалқаро ҳам бо худ бигиранд. Он чӣ гузаштани довталабон аз мониаҳоро боз ҳам мушкилтар мекунад, ин аст, ки онҳо бояд ин мониаҳоро дар рӯи об гузаранд ва як иштибоҳ кофист, ки довталаб ба об сарозер шуда, орзуи пирӯзиаш нақше бар об шавад ва ҳамроҳи довталаб ин орзу ҳам зери об биравад.
Дар озмуни “Суперниндзя” 175 нафар иштирок доштанд, ки дар 25-нафарӣ дар 7 гуруҳ тақсим шуда буданд. Аз ҳар гуруҳ даҳнафарӣ ба нимфинал мебаромад ва сипас ин 70 нафар ба 35 ҷуфт тақсим шуда, барои 35 ҷой дар финал вориди рақобат шуданд. Алишер Назаров дар гуруҳаш дар байни 25 нафар ҷои аввалро гирифта, сипас дар нимфинал бо вуҷуди 10 сония фора доданаш ба духтаре, ки рақибаш буд, боз ҳам ғолиб омад ва роҳии финал шуд.
Моҳи декабр 35 довталаб, аз ҷумла Алишер Назаров рақобатҳоро дар марҳалаи ниҳоии озмуни “Суперниндзя” идома медиҳанд. Ғолибони марҳалаи ниҳоӣ сипас дар суперфинал барои шоҳҷоизаи озмун, ки 5 миллион рубл, ё беш аз 50 ҳазор доллар аст, вориди рақобат мешаванд.
Алишер Назаров дар вақташ дар донишгоҳи Маскав каси муҳандиси соҳаи кимиёро омӯхта буд, вале ҳоло дар Қазоқистон устои мошину кондитсионер аст. Алишер ҳоло диагностикаи мошинҳои барқиро омӯхта истодааст, чунки талабот ба мошинҳои барқӣ дар бозор торафт меафзояд.
Ӯ гуфт, ба озмуни “Суперниндзя” тақрибан бидуни тайёрии вижа омад, чунки барои машқу тамрин вақт ҳам надошт, бояд кор кунад.
Алишер Назаров гуфт, ӯ дар Ваҳдати Тоҷикистон дар як оилаи серфарзанд ба воя расида, дар даврони кӯдакиаш зиндагии сахту гоҳо ҳатто азоби гуруснагиро ҳам кашидааст ва ҳоло мехоҳад, дар сурати пирӯзӣ бо пуле, ки аз озмуни “Суперниндзя” ба даст хоҳад овард, барои падару модараш дар Тоҷикистон хонаву дари нав бисозад, то дар пиронсолӣ роҳат кунанд. Боқимондаи пулро ӯ мехоҳад барои кумак ба ниёзмандон сарф кунад.
Бисёриҳо ба Алишер Назаров барои ҳунарнамоии олӣ дар озмуни “Суперниндзя” офарин хонда, барояш дар ин сабқат орзуи муваффақият кардаанд. Мухлисон менависанд, нияти неке, ки Алишер дорад, яъне сохтани хона барои падару модараш аз пули пирӯзӣ дар ин озмун ва ба муҳтоҷон тақсим кардани боқимондаи он, худ ба сари худ амали савобест, ки Худо хоҳад, дари пирӯзиро ба рӯяш хоҳад кушод.
